ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងបាឋកថាសាធារណៈជាស៊េរី «ឧត្តមគតិ» លើកទី២ ក្រោមប្រធានបទ «ការអប់រំ ដើម្បីពង្រឹងសតិជាតិរបស់មនុស្សខ្មែរ» ឯកឧត្តមសាស្រ្តាចារ្យបណ្ឌិត ហោ ប៉េង សាកលវិទ្យាធិការនៃសាកលវិទ្យាល័យជាតិគ្រប់គ្រង (NUM) បានគូសបញ្ជាក់ពីលក្ខណៈសម្គាល់សំខាន់ៗចំនួន ៥ យ៉ាង ក្នុងការកំណត់ថា បុគ្គល ឬពលរដ្ឋម្នាក់មានទឹកចិត្តស្រលាញ់ជាតិពិតប្រាកដ។
បើតាម ឯកឧត្តមសាស្រ្តាចារ្យបណ្ឌិត ហោ ប៉េង ចំពោះ បុគ្គល ឬពលរដ្ឋ ដែលមានលក្ខណៈសម្គាល់ថា ស្នេហាជាតិ រួមមាន៖
១. ស្រឡាញ់ និងអភិវឌ្ឍខ្លួនឯង ៖ បុគ្គលត្រូវកសាងសមត្ថភាព ចំណេះដឹង និងជំនាញឱ្យរឹងមាំ ដើម្បីប្រែក្លាយខ្លួនជាធនធានមនុស្សដ៏មានតម្លៃរបស់ជាតិ និងចៀសវាងការក្លាយជាបន្ទុកសង្គម។
២. ស្រឡាញ់ទឹកដី ៖ ផ្សារភ្ជាប់ទំនាក់ទំនងជិតស្និទ្ធជាមួយមូលដ្ឋានរស់នៅ យ៉ាងហោចណាស់ក៏បានបញ្ចប់ការសិក្សាកម្រិតបឋមសិក្សានៅក្នុងភូមិកំណើត ដើម្បីបណ្ដុះស្មារតីនិងភាពជាម្ចាស់ទឹកដី។
៣. គោរពច្បាប់រដ្ឋ ៖ ការគោរពច្បាប់ គឺជាការបង្ហាញពីឆន្ទៈជាតិ និងការរក្សាសណ្ដាប់ធ្នាប់សង្គម ជាពិសេសការអនុវត្តឱ្យបានខ្ជាប់ខ្ជួននូវច្បាប់ចរាចរណ៍។
៤. កតញ្ញូតាធម៌ចំពោះគ្រួសារ ៖ គោរព ស្រឡាញ់ឪពុកម្ដាយ ព្រមទាំងសាច់ញាតិ ដោយមិនបោះបង់ពួកគាត់ចោលក្នុងកាលៈទេសៈណាមួយឡើយ។
៥. គោរពសិទ្ធិមនុស្ស ៖ យល់ដឹង និងអនុវត្តតាមគោលការណ៍សិទ្ធិមនុស្ស ដែលជាបទដ្ឋានសកលក្នុងការរស់នៅជាមួយគ្នាក្នុងសង្គមប្រកបដោយសេចក្តីថ្លៃថ្នូរ។
ជាមួយគ្នានេះ ឯកឧត្តមសាកលវិទ្យាធិការ ក៏បានក្រើនរំលឹកដល់យុវជនឱ្យប្រកាន់ខ្ជាប់នូវសីលធម៌ និងគុណធម៌ ដោយចេះគោរពសិទ្ធិអ្នកដទៃ ចៀសវាងការបៀតបៀន ឬរិះគន់ដោយអគតិ ព្រោះតម្លៃទាំងនេះជាមូលដ្ឋានគ្រឹះដ៏រឹងមាំរបស់សង្គមខ្មែរ។
បន្ថែមពីលើនេះ ឯកឧត្តមបានលើកឡើងពី «តួនាទីស្នូលទាំង ៣ របស់បុគ្គល» ដែលរួមមាន៖ ១. ភាពជាគំរូ ៖ ស្គាល់ពីទេពកោសល្យ ចំណេះដឹង និងចូលរួមចែករំលែកជាវិជ្ជមានដល់សង្គម, ២. ភាពជាម្ចាស់ប្រទេស៖ មានភាពក្លាហានក្នុងការឆ្លើយតប ការពារ និងចូលរួមដោះស្រាយបញ្ហាជាតិរួមគ្នា, ៣. ចេះរក្សា និងចេះទទួលយក៖ ដោយចេះថែរក្សាការពារអត្តសញ្ញាណ និងមរតកដែលខ្មែរមាន ព្រមទាំងបើកចិត្តទទួលយកចំណេះដឹង និងបច្ចេកវិទ្យាថ្មីៗដែលមានប្រយោជន៍ ដើម្បីជំរុញការអភិវឌ្ឍសហគមន៍ និងប្រទេសជាតិឱ្យកាន់តែរីកចម្រើន៕
