ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អគ្គលេខាធិការនៃរាជបណ្ឌិត្យសភាកម្ពុជា លោកបណ្ឌិត យង់ ពៅ បានលើកឡើងថា យុវជនក្ដី ប្រជាពលរដ្ឋទូទៅក្ដី មានគំនិតស្នេហាជាតិ ស្រឡាញ់ជាតិ គឺត្រូវតែអភិវឌ្ឍខ្លួនឯង ឱ្យមានជំនាញ និងសមត្ថភាពច្បាស់លាស់ ដើម្បីបម្រើប្រទេសជាតិឱ្យមានប្រសិទ្ធភាពទាំងផ្នែកនយោបាយ សេដ្ឋកិច្ច និងសង្គម។
លោកបណ្ឌិត មានប្រសាសន៍ថា នៅពេលដែលយុវជន និងពលរដ្ឋទាំងអស់មានសមត្ថភាព និងជំនាញពិតប្រាកដ នឹងនាំឱ្យអាចបង្កើតមុខរបរ រកការងារធ្វើដែលអាចមានប្រាក់ខែខ្ពស់, តែប្រសិនបើយុវជន មិនមានមានសមត្ថភាពពេញលេញទាំងកម្លាំងកាយ បញ្ហា ស្មារតី និងវិជ្ជាជីវៈទេ នឹងនាំឱ្យយុវជនគ្មានកម្លាំង បញ្ញា ស្មារតីសម្រាប់បង្កើនផលិតភាពជាតិបានទេ។ ដូច្នេះ យើងត្រូវតែអភិវឌ្ឍសមត្ថភាព និងជំនាញឱ្យពិតប្រាកដ ដើម្បីជាប្រយោជន៍ក្នុងការបម្រើប្រទេសជាតិ។
អគ្គលេខាធិការនៃរាជបណ្ឌិត្យសភាកម្ពុជា មានប្រសាសន៍បន្ថែមថា ការអភិវឌ្ឍសមត្ថភាពរបស់យុវជនលើជំនាញអ្វីក៏ដោយ ឱ្យតែមានជំនាញ ចំណេះដឹងពិតប្រាកដ និងក្រមសីលធម៌ល្អ គឺសុទ្ធតែបានបម្រើផលប្រយោជន៍សង្គម ពីព្រោះក្នុងសង្គមនីមួយៗត្រូវការជំនាញជាច្រើនដើម្បីបំពេញគ្នា។ ប៉ុន្តែពេលខ្លះ អ្នកមានចំណេះដឹងហើយ បែរជាគ្មានក្រមសីលធម៌ល្អ ដោយអនុវត្តចំណេះដឹងរបស់ខ្លួនជាការបំផ្លាញសង្គមជាតិទៅវិញក៏មាន។ ដូច្នេះ ពលរដ្ឋ ជាពិសេសយុវជន មានចំណេះដឹងហើយ ត្រូវតែមានក្រមសីលធម៌ល្អបន្ថែមទៀត។
ស្របទៅនឹងទស្សនៈខាងលើនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ធ្លាប់លើកឡើងថា យុវជនស្នេហាជាតិ ត្រូវមានជំនាញ និងសមត្ថភាពពិតប្រាកដ ដើម្បីបម្រើប្រទេសជាតិមានប្រសិទ្ធភាព។
ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ប្រទេសជាតិរឹងមាំ រក្សាបាននូវសុខសន្តិភាព និងការអភិវឌ្ឍប្រកបដោយចីរភាព ដរាបណាមានធនធានមនុស្សដែលមានគុណភាព មានចំណេះដឹងខ្ពស់ មានចំណេះធ្វើ និងមានសីលធម៌ដ៏ល្អប្រពៃជាពលរដ្ឋសាកល។
ដើម្បីជួយបណ្ដុះស្មារតីស្នេហាជាតិ និងស្មារតីស្រឡាញ់ប្រទេសជាតិ ក្រសួងអប់រំបានបង្កើតកម្មវិធីសិក្សាបន្ថែមដូចជា កម្មវិធីយុវជន ២១ កម្មវិធីស្ម័គ្រចិត្តដើម្បីសហគមន៍ខ្ញុំ ដែលជួយបំពេញបន្ថែមដល់ការអប់រំនៅតាមសាលារដ្ឋ ដូច្នេះឯកឧត្តមរដ្ឋមន្រ្តីអំពាវនាវឱ្យសាលារៀនទាំងអស់យកចិត្តទុកដាក់ចូលរួមអនុវត្តកម្មវិធីទាំងនេះឱ្យបានល្អ៕
