ស្ថានទូតបារាំ​ងប្រចាំកម្ពុជា និងវិទ្យាស្ថានបារាំងប្រចាំកម្ពុជា បានប្រកាសដាក់ឱ្យដំណើរការជាផ្លូវការនូវគម្រោងថ្មីមួយ​ឈ្មោះថា «ចតុ» ដើម្បីជួយគាំទ្រដល់ការតែងនិពន្ធ និងការបង្កើតស្នាដៃថ្មីៗរបស់យុវជនកម្ពុជាដែល​មានទេពកោសល្យ​នៅ​ក្នុងឧស្សាហកម្មវប្បធម៌ និងច្នៃប្រឌិត។ គម្រោង «​ចតុ» នេះ មានគោលដៅពង្រឹងសមត្ថភាពយុវជន យុវនារីកម្ពុជា ដែលមានទេពកោសល្យក្នុងវិស័យសំខាន់ៗចំនួន៤ គឺ​គំនូរជីវចល ភាពយន្ត តន្ត្រី និងការរាំ។

លោកស្រី Fanny Pagès នាយិកាប្រតិភូ និងជាមន្ត្រីទទួលបន្ទុកផ្នែកវប្បធម៌ នៃវិទ្យាស្ថានបារាំងនៅកម្ពុជា មានប្រសាសន៍ថា ការដាក់ឈ្មោះកម្មវិធីនេះថា «ចតុ» ដោយសារពាក្យនេះ ឆ្លុះបញ្ចាំងពីភាពច្នៃប្រឌិត និងលើកស្ទួយតម្លៃភាសា និងវប្បធម៌ខ្មែរ។ ចតុ មានន័យថា បួន ហើយជាពាក្យដ៏សំខាន់មួយនៅក្នុងវប្បធម៌ខ្មែរ ដូចជា ​ទិសធំៗទាំងបួននៃសាលសន្និសីទចតុមុខដែលស្ថិតនៅចំណុចប្រសព្វនៃទន្លេទាំងបួន ឬ​ឈ្មោះ​ប្រវត្តិ​សាស្រ្ត​របស់រាជធានីភ្នំពេញជាដើម។

នាយិកាប្រតិភូ និងជាមន្ត្រីទទួលបន្ទុកផ្នែកវប្បធម៌នៃវិទ្យាស្ថានបារាំងនៅកម្ពុជា បន្ថែមថា «ចតុ» មានគោលដៅយូរអង្វែង ដើម្បីពង្រឹងចំណងវប្បធម៌ និងច្នៃប្រឌិតរវាងកម្ពុជា និងបារាំង ដោយលើកកម្ពស់ភាពសម្បូរបែប និងភាពចម្រុះនៃទេពកោសល្យកម្ពុជា។

គម្រោង «ចតុ» ​មានគោលដៅសំខាន់ៗ ៣ គឺ ការពង្រឹងសមត្ថភាពសិល្បៈ ការអភិវឌ្ឍសមត្ថភាពផ្នែកសហគ្រិនភាព​នៅក្នុង​វិស័យវប្បធម៌ និងការរៀបចំសិក្ខាសាលាកម្រិតតំបន់មួយ​ ដែលផ្តោតលើឧស្សាហកម្មវប្បធម៌ និងច្នៃប្រឌិត។ កម្មវិធីនេះ ផ្តោតជាពិសេសលើសារសំខាន់នៃការតែងនិពន្ធក្នុងដំណើរការច្នៃប្រឌិត ដែលជាមូលដ្ឋានគ្រឹះសម្រាប់ការអភិវឌ្ឍឧស្សាហកម្ម​វប្បធម៌ និងច្នៃប្រឌិត។ លើសពីនេះ បណ្តុះបណ្តាលអ្នកប្រកបវិជ្ជាជីវៈតាមរយៈការផ្តល់ការអប់រំមួយស្របតាមតម្រូវការជាក់ស្តែងក្នុងស្រុក និងគោលដៅនៃការអភិវឌ្ឍប្រកបដោយចីរភាពក្នុងឧស្សាហកម្មវប្បធម៌ និងច្នៃប្រឌិត។

យុវជនកម្ពុជា ត្រូវបានជ្រើសរើសតាមរយៈការប្រកាសទទួលបេក្ខភាពដែលត្រូវបានផ្សព្វផ្សាយនៅលើគេហទំព័រ និងបណ្តាញសង្គមរបស់វិទ្យាស្ថានបារាំងនៅកម្ពុជា និងដៃគូ។ បេក្ខជនត្រូវមានសញ្ជាតិខ្មែរ មានបទពិសោធន៍ និងត្រូវបង្ហាញគម្រោងសិល្បៈមួយ ដែលខ្លួនចង់បង្កើតឡើងនៅក្នុងជំនាញរបស់ខ្លួន។ ក្នុងនោះ បេក្ខជន៦០នាក់ដែលត្រូវបានជ្រើសរើស (១៥នាក់ក្នុងមួយមុខជំនាញ) មានឱកាសចូលរួមក្នុងវគ្គសិក្សាពេញម៉ោងដឹកនាំដោយគ្រូជនជាតិបារាំង ដែលនឹងផ្តល់ឱ្យពួកគេនូវចក្ខុវិស័យអន្តរជាតិ និងសមត្ថភាពដ៏មុតស្រួចក្នុងជំនាញនីមួយៗ។

គួរជម្រាបជូនថា គម្រោង «ចតុ» នេះ មានរយៈពេលមួយឆ្នាំ ដោយទទួលហិរញ្ញវត្ថុ​ពី​មូលនិធិ Equipe France Création នៃក្រសួងអឺរ៉ុប និងការបរទេសបារាំង ដោយអនុវត្តក្នុងភាពជាដៃគូជាមួយ​តួអង្គសំខាន់ៗនៃវិស័យវប្បធម៌កម្ពុជា រួមមាន គ្រឹះស្ថានបោះពុម្ពផ្សាយស៊ីប៉ា, ​ផលិតកម្ម Anti-Archive, ផលិតកម្មកងចក្រ និងអង្គការសិល្បៈខ្មែរអមតៈ៕