ក្រោយឆ្លងកាត់ការការ​ប្រកួតជម្រុះ និង​ទទួល​បាន​ការ​បណ្តុះបណ្តាល ស្តីពីមូលបទនៃការប្រកួត និងតិចនិចក្នុងការនិយាយជាសាធារណៈក្នុងនាមជាអ្នកជជែកដេញដោល បេក្ខជនចំនួន៤ក្រុម នឹងធ្វើ​ការប្រកួតជជែកដេញដោលគ្នា​ក្រោមមូលបទ «ស្រ្តី និងសកលភាវូបនីយកម្ម» នៅថ្ងៃទី២៥ ឧសភា ឆ្នាំ២០២៥ ដើម្បីស្វែងរកក្រុមឆ្នើមពីរក្រុមទៅកាន់វគ្គផ្តាច់ព្រ័ត្រ។

កញ្ញា តាំង មុយលាង ដែលជាអ្នកដឹកនាំគម្រោងកម្មវិធីប្រកួតជជែកដេញដោល «ទស្សនៈយុវជន» ប្រចាំឆ្នាំ២០២៥ បានថ្លែងប្រាប់ AMS Education ថា រដូវកាលទី៥នេះ កម្មវិធីជជែកដេញដោលនឹងផ្តោតលើមូលបទ «ស្រ្តី និងសកលភាវូបនីយកម្ម» ក្រោមការសហការរៀបចំរវាង NGO-CEDAW និង RULErs ។ មកដល់ពេលនេះ បេក្ខជន បានឈានមកដល់ដំណាក់កាលវគ្គពាក់កណ្តាលផ្តាច់ព្រ័ត្រ ដែលមានបេក្ខជន ៤ក្រុម គឺក្រុម ស្រ្តីសកល​ឬទ្ធិពល, មេរ៉ាសម្បយោគបញ្ច, សណ្តែកក្រហម, និង ពុទ្ធនារីឬទ្ធី ដែលក្នុងចំណោម ៤ក្រុមនេះ មានតែពីរក្រុមប៉ុណ្ណោះនឹងឈានទៅកាន់វគ្គផ្តាច់ព្រ័ត្រ។

បើតាមប្រធានគម្រោង បានឱ្យដឹងថា ការប្រកួតក្នុងវគ្គពាក់កណ្តាលផ្តាច់ព្រ័តនេះ ក្រុមទាំងបួន នឹងជជែកដេញដោលទៅលើប្រធានបទពីរផ្សេងគ្នា។ ប្រធានបទទី១ «ការមិនអនុវត្តនូវក្រមសីលធម៌វិជ្ជាជីវៈអ្នកសារព័ត៌មានជាកត្តាជំរុញឱ្យកើនឡើងនូវវប្បធម៍ស្តីបន្ទោសជនរងគ្រោះ» ជាការប្រកួតរវាងក្រុមស្រ្តីសកលឬទ្ធិពល ជាមួយ ក្រុម មេរ៉ាសម្បយោគបញ្ច។ ប្រធានបទទី២ «ការកើនឡើងនៃការប្រើប្រាស់បណ្តាញសង្គមជាកត្តាជំរុញនាំឱ្យមានផលប៉ះពាល់ដល់ស្ត្រីជាជាងជួយស្ត្រី» ជាការប្រកួតរវាងក្រុម សណ្តែកក្រហម និង ក្រុមពុទ្ធនារីឬទ្ធី។ ក្នុងចំណោមទាំងបួនក្រុមខាងលើ នឹងត្រូវជម្រុះយកតែពីរក្រុមប៉ុណ្ណោះដើម្បីឈានទៅកាន់វគ្គផ្តាច់ព្រ័ត្រ។

នៅក្នុងការជជែកដេញដោលវគ្គពាក់កណ្ដាលផ្ដាច់ព្រ័ត្រ «ទស្សនៈយុវជន» រដូវកាលទី៥ នឹងមានការចូលរួមដាក់ពិន្ទុដោយគណៈកម្មការវាយតម្លៃ៣រូប កញ្ញា ហេង បូដាលីន លោក ងួន វ៉ាយុ និង លោកស្រី អេង ចាន់ឌី។ គណៈកម្មការទាំង៣រូប សុទ្ធតែជាអ្នកដែលមានបទពិសោធន៍ពាក់ព័ន្ធជាមួយនឹងស្រ្តី ផ្នត់គំនិតយេនឌ័រ ការងារសង្គម និងបច្ចេកទេសនៅក្នុងការជជែកដេញដោល។

ការប្រកួតនេះនឹងប្រព្រឹត្តទៅនៅថ្ងៃទី២៥ ឧសភា ២០២៥ ដែលនឹងធ្វើនៅទីតាំង Anik Palace Hotel ចាប់ពីម៉ោង ១រសៀល ដល់ម៉ោង ៥ល្ងាច។ ប្រសិនបើមានចំណាប់អារម្មណ៍ក្នុងការចុះឈ្មោះ សូមចូលទៅកាន់តំណភ្ជាប់ចុះឈ្មោះឱ្យបានរួសរាន់ ព្រោះចំនួនមានកំណត់។

កញ្ញា មុយលាង បានបន្តរៀបរាប់ថា ទម្រាំមកដល់វគ្គពាក់កណ្តាលផ្តាច់ព្រ័ត្រនេះ បេក្ខជនទាំង ១៦ រូប បានឆ្លងកាត់ដំណាក់កាលជាច្រើនដូចជា ការដាក់ពាក្យអនឡាញ ការសម្ភាសន៍ ការបណ្តុះបណ្តាលពីរលើក ដែលណែនាំពីមូលបទនៃការប្រកួតនៅឆ្នាំនេះ ព្រមទាំងតិចនិចក្នុងការនិយាយជាសាធារណៈក្នុងនាមជាអ្នកជជែកដេញដោលផងដែរ ដែលត្រូវបានបណ្តុះបណ្តាលដោយអ្នកដែលមានបទពិសោធន៍ដូចជា បុគ្គលិកនៃ NGO-CEDAW អ្នកនាង សៀក ពេជ្ររចនា និងលោក ងួន វ៉ាយុ ដែលជាអ្នកមានបទពិសោធន៍ និងទទួលបានជ័យលាភីក្នុងការប្រកួតជាច្រើនទាំងកម្មវិធីថ្នាក់ជាតិ។

គួរបញ្ជាក់ផងដែរថា ឆ្នាំនេះជាលើកទី៥ហើយដែលក្រុមការងារ RULErs និង NGO-CEDAW បានសហការគ្នាក្នុងការរៀបចំការប្រកួតជជែកដេញដោលលើប្រធានបទជុំវិញសិទ្ធស្រ្តី និងសមភាពយេនឌ័រ៕