គ្រឹះស្ថាន​ឧត្តមសិក្សា​របស់​កម្ពុជា​ចំនួន៤ រួមមាន វិទ្យាស្ថាន​បច្ចេកវិទ្យាកម្ពុជា សាកលវិទ្យាល័យ​ជាតិ​បាត់ដំបង សាកលវិទ្យាល័យ​ភូមិន្ទកសិកម្ម និង​សាកលវិទ្យាល័យ​ស្វាយរៀង ត្រូវ​បាន​សម្រេច​ក្លាយ​ជា​សមាជិកផ្លូវការ​នៃបណ្តាញ​សាកលវិទ្យាល័យ​អាស៊ាន​ផ្នែក​ធានាគុណភាព ASEAN University Network-Quality Assurance (AUN-QA)។

លោក​ជំទាវបណ្ឌិត ឃួន វិច្ឆិកា អ្នកនាំពាក្យ​ក្រសួងអប់រំ យុវជន និងកីឡា មានប្រសាសន៍ថា ការចូលជា​សមាជិក AUN-QA របស់​សាកលវិទ្យាល័យ​កម្ពុជា​នេះ​ គឺពិត​ជា​មាន​សារៈសំខាន់​ណាស់​សម្រាប់​សាកលវិទ្យាល័យ​នៅកម្ពុជា ក៏ដូចជា​កម្ពុជា​ផ្ទាល់​ទាក់ទង​នឹងការ​សិក្សា​នៅ​កម្រិត​ឧត្តមសិក្សា។ ក្នុង​នោះ នឹង​ផ្ដល់​អត្ថប្រយោជន៍​ដល់​សាកលវិទ្យាល័យ រួមមាន ទី១. ការទទួល​ស្គាល់ក្នុង​កម្រិត​តំបន់ និង​កម្រិត​អន្តរជាតិ​នា​ពេល​អនាគត និងទី២. ការទទួល​បានឱកាស​ក្នុងការ​វាយតម្លៃ​កម្រិត​តំបន់​ដើម្បី​ពិនិត្យ​មើល​ទាំងកម្មវិធី​កម្រិត​ឧត្តមសិក្សា និង​គិតជា​ស្ថាប័ន​ទាំងមូល។

ជាមួយ​គ្នា​ការចូល​ជា​សមាជិក​បណ្តាញ​សាកលវិទ្យាល័យ​អាស៊ាន​នេះ នឹង​ឈាន​ទៅ​ដល់​ការដាក់​ឱ្យវាយ​តម្លៃនូវ​កម្មវិធី​អប់រំ​នៅ​ក្នុង​សាកលវិទ្យាល័យ ក៏ដូចជា​ការវាយ​តម្លៃជារួម​ក្នុងកម្រិត​ស្ថាប័ន​នា​ពេល​អនាគត។ ដូច្នេះ ការចូលរួម​នេះ ក្រៅពីការ​ចូលរួមលើក​កម្ពស់​គុណភាព​នៃការអប់រំ​នៅកម្រិត​បឋមសិក្សា ក៏ជាការ​ចូលរួម​ដើម្បី​ឱ្យមានការ​ទទួល​ស្គាល់​កម្រិត​តំបន់ និង​អន្តរជាតិ​ទៅលើ​សាកលវិទ្យាល័យ ឬកម្រិត​ឧត្តមសិក្សា​នៅ​កម្ពុជា ក្រៅពីនេះ ក៏ជាឱកាស​សម្រាប់​និស្សិត និង​គ្រូបង្រៀន​នៅតាម​សាកលវិទ្យាល័យ​ផងដែរ។

អ្នកនាំពាក្យ​ក្រសួងអប់រំ បន្ថែមថា សម្រាប់​និសិ្សត គឺអាច​ទទួល​បានផល​ប្រយោជន៍​តាមរយៈ​ការ​ផ្លាស់ប្ដូរ​និស្សិត និង​ឱកាស​សិក្សា​ផ្សេងៗ​ទៀត​នៅ​ក្នុង​តំបន់ និង​នៅក្នុង​ពិភពលោក​នា​ពេល​អនាគត។ ហើយ​សម្រាប់​គ្រូបង្រៀន​វិញ ក៏មាន​ឱកាសផ្លាស់ប្ដូរ​ចំណេះដឹង ក៏ដូច​ជា​បទពិសោធន៍ និង​ការ​សហការ​ក្នុងការ​ស្រាវជ្រាវ​ទាក់ទង​នឹងប្រធាន​បទនានា​ដែលមាន​នៅក្នុង​សាកលវិទ្យាល័យ​នានា​ជា​សមាជិក​របស់​បណ្តាញ​សាកលវិទ្យាល័យ​អាស៊ាន​ផង​ដែរ។

ការចូល​រួម​នេះ ក៏ជា​ផ្នែកមួយ​ក្នុង​ការ​ពង្រឹង​កិច្ច​សហប្រតិបត្តិការ​កម្រិត​ជាតិ ជាពិសេស​ក្នុងតំបន់​អាស៊ាន ដោយសារ​តែ AUN ស្ថិតក្នុង​ក្របខ័ណ្ឌ​នៃ​អាស៊ាន ហើយ​ក្រៅពី​ការពង្រឹង​កិច្ច​សហប្រតិបត្តិការ​តាមរយៈ​វិស័យអប់រំ​នៅកម្រិត​ឧត្តមសិក្សា​នេះ យើង​ក៏ជឿថា ក៏នឹង​បង្កើន​ភាព​ទុកចិត្ត​សម្រាប់​អន្តរជាតិ នៅក្នុងការ​សិក្សា​នៅកម្ពុជា ក៏ដូចជា​ដើម្បី​លើក​កម្ពស់​ការសិក្សា​របស់យើង​ក្នុង​កម្រិត​តំបន់ និង​ពិភពលោក។

បើតាម លោក​ជំទាវ​បណ្ឌិត ឃួន វិច្ឆិកា ជាជំហាន​បន្ទាប់ ក្រៅពីការចូលរួម​ជា​សមាជិក AUN-QA ក្រសួងអប់រំ ក៏នឹង​ជំរុញ​បន្តទៀត​សម្រាប់​សាកលវិទ្យាល័យ​ផ្សេងៗ ក៏ដូចជាវិទ្យាស្ថាន​បណ្ដុះបណ្ដាលគ្រូ​ដែល​មានតួនាទីជា​កម្រិតឧត្តមសិក្សា នៅក្នុងការចូលរួម​ជាបន្តបន្ទាប់​ក្លាយជា​សមាជិក AUN-QA ហើយ​យន្តការ​បន្ត គឺការ​ដាក់ឱ្យមាន​ការវាយ​តម្លៃទៅ​លើ​កម្មវិធី ក៏ដូច​ជាគ្រឹះស្ថាន​ឧត្តមសិក្សា ដើម្បីឱ្យមាន​ការទទួល​ស្គាល់​កម្រិត​តំបន់នេះ៕