ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សៀមរាប – ក្រុងចំនួន៥របស់កម្ពុជា រួមជាមួយប្រទេសចំនួន៥ នៅក្នុងតំបន់អាស៊ីបានប្រកាសពីការតាំងចិត្តរបស់ខ្លួនក្នុងការអនុវត្តគោលដៅ ទឹកស្អាត ដីស្អាត និងខ្យល់អាកាសបរិសុទ្ធ ។ ការប្រកាសតាំងចិត្តនេះ បានធ្វើឡើងនៅក្នុងកិច្ចប្រជុំកម្រិតខ្ពស់ថ្នាក់តំបន់អាស៊ី និងប៉ាស៊ីហ្វិកលើកទី១១ ស្តីពី « 3R និងសេដ្ឋកិច្ចវិលជុំ » ដែលប្រព្រឹត្តធ្វើឡើងនៅខេត្តសៀមរាប កាលពីពេលថ្មីៗនេះ។
ក្រុងចំនួន៥របស់កម្ពុជា ដែលបានប្រកាសពីការតាំងចិត្តក្នុងការអនុវត្តគោលដៅ ទឹកស្អាត ដីស្អាត និងខ្យល់អាកាសបរិសុទ្ធ គឺរួមមាន ក្រុងសែនមនោរម្យ នៃខេត្តមណ្ឌលគីរី, ក្រុងពោធិ៍សាត់ នៃខេត្តពោធិ៍សាត់, ក្រុងកែប នៃខេត្តកែប, ក្រុងព្រះសីហនុ នៃខេត្តព្រះសីហនុ និងក្រុងសៀមរាប នៃខេត្តសៀមរាប ។ ដោយឡែកប្រទេសចំនួន៥ ដែលបានប្រកាសពីការប្តេជ្ញាចិត្តឆ្ពោះទៅកាន់ការសម្រេចបាននូវទឹកស្អាត ដីស្អាត និងខ្យល់អាកាសបរិសុទ្ធ រួមមាន ប្រទេសជប៉ុន ឥណ្ឌា ឥណ្ឌូនេស៊ី ម៉ាឡេស៊ី និងប្រទេសថៃ។
ឯកឧត្តម នេត្រ ភក្ត្រា រដ្ឋលេខាធិការនិងជាមន្ត្រីនាំពាក្យក្រសួងបរិស្ថាន បានប្រសាសន៍ថា អភិបាលក្រុងទាំង៥របស់កម្ពុជា បានចុះហត្ថលេខាក្នុងទិសដៅធ្វើយ៉ាងណាឱ្យមាន ទឹកស្អាត ដីស្អាត និងខ្យល់ស្អាតសម្រាប់ការរស់នៅ ។ ឯកឧត្តមបន្តថា ចំពោះបញ្ហាទាំងអស់នេះ ក៏មានការធ្វើបទបង្ហាញពីបណ្តាប្រទេសផ្សេងៗ ជាពិសេសប្រទេសចិន អំពីការកសាងទីក្រុងមួយដែលគ្មានសំណល់ ពោលគឺធ្វើយ៉ាងណាឱ្យទីក្រុងត្រូវបានគ្រប់គ្រងទាំងស្រុងនូវសំណល់ដែលបានបង្កើតឡើង។
សម្រាប់កម្ពុជា បើតាមការបញ្ជាក់របស់ ឯកឧត្តម នេត្រ ភត្រ្តា ក៏មានការតាំងចិត្តនៅក្នុងការរៀបចំទីក្រុងដែលគ្មានសំណល់នៅក្នុងសង្គមដែរ ដោយទី១ គឺកម្ពុជាដាក់ចុះនូវគោលនយោបាយជាតិស្តីពីការគ្រប់គ្រងសំណល់រឹងតាមទីប្រជុំជន, ទី២ ការរៀបចំទីលានចាក់សំរាមទៅតាមបច្ចេកទេស, ទី៣ សំរាមដែលត្រូវយកទៅចាក់ចោល ត្រូវមានការញែកតាមបច្ចេកទេសឱ្យបានត្រឹមត្រូវ ដូចជាសំណល់សរីរាង្គ សំណល់ប្លាស្ទិក និងសំណល់រឹង និងទី៤ គឺការផ្លាស់ប្តូរឥរិយាបទប្រជាពលរដ្ឋ និងការជំរុញប្រជាពលរដ្ឋឱ្យចូលរួមគ្រប់គ្រង និងវេចខ្ចប់សំណល់សំរាមរបស់ខ្លួនឱ្យបានត្រឹមត្រូវ ។
គួរបញ្ជាក់ថា គិតមកដល់ពេលនេះ មានប្រទេសក្នុងតំបន់អាស៊ីប៉ាស៊ីហ្វិកចំនួន៤៦ប្រទេសហើយ ដែលបានចុះហត្ថលេខាលើសេចក្តីប្រកាស Indore 3R ក្នុងការអនុវត្តគោលដៅ ទឹកស្អាត ដីស្អាត និងខ្យល់អាកាសបរិសុទ្ធ៕
