ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឧបសគ្គក្នុងជីវិតរបស់មនុស្សម្នាក់ៗតែងតែជួបខុសៗគ្នាមិនថាការសិក្សា ឬការបំពេញការងារឡើយ ដូចនេះអ្នកត្រូវមានស្មារតីដាស់តឿនខ្លួនឯង និងសិក្សារៀនសូត្រជារៀងរាល់ថ្ងៃ គឺរៀនអ្វីៗដែលថ្មីសម្រាប់ខ្លួនឯង ។ ការរស់នៅដែលមានគោលដៅអនាគត រួមជាមួយការរៀនសូត្រជាអ្វីដែលបុគ្គលគ្រប់រូបត្រូវមាន និងចែករំលែកទៅវិញទៅមកដោយមិនអាត្មានិយម ។ នេះជាការលើកឡើងរបស់ អ្នកឧកញ៉ាវេជ្ជបណ្ឌិត គួច ម៉េងលី នៅក្នុងសិក្ខាសាលា «កុំរស់ជាមួយរសជាតិជីវិត រស់ជាមួយការរៀបចំជីវិត» កាលពីពេលថ្មីៗនេះ។
អ្នកឧកញ៉ា វេជ្ជបណ្ឌិត គួច ម៉េងលី បានលើកឡើងថា ធ្វើជាមនុស្សត្រូវមានការជ្រោមជ្រែងខ្លួនឯង និងអ្នកដទៃដើម្បីភាពរីកចម្រើនរួមទៅកាន់ប្រទេសជាតិ និងអ្នកជុំវិញខ្លួន ។ អ្នកឧកញ៉ា វេជ្ជបណ្ឌិតបន្ថែមថា អ្នកត្រូវរស់នៅដោយមានផែនការជីវិត ត្រូវមានការរៀបចំ ចេះរៀបចំផែនការជីវិតឱ្យបានល្អ និងមានការកត់ត្រា មើលពីអនាគត និងគោលដៅរបស់ខ្លួនឯង ។ នៅពេលដែលយើងធ្វើការកត់ត្រាច្រើន នោះយើងកាន់តែស្រាវជ្រាវ កាន់តែអាន និងសិក្សាពីវប្បធម៌ សង្គមធម៌ បញ្ហាក្នុងប្រទេស និងក្នុងពិភពលោក ។
អ្នកឧកញ៉ាបណ្ឌិតបន្តថា ការរៀនសូត្រ និងយល់ដឹងច្រើនធ្វើឱ្យអ្នកក្លាយជាធនធានសកម្មក្នុងការជួយប្រទេសឱ្យមានភាពរីកចម្រើន និងជាបុគ្គលគម្រូសម្រាប់គ្រួសារ និងកូនៗនៅពេលអនាគតផងដែរ ។
« ការកត់ត្រាការងារប្រចាំថ្ងៃ ធ្វើឱ្យអ្នករីកចម្រើនចំណេះដឹងយ៉ាងទូលំទូលាយកាន់តែប្រសើរ និងបំពេញការងារផ្សេៗបានទាន់ពេលវេលា »
អ្នកឧកញ៉ា វេជ្ជបណ្ឌិត គួច ម៉េងលី
ជាមួយគ្នានេះ ឯកឧត្តម វ៉េង សេរីវុឌ្ឍ ប្រធានក្រុមប្រឹក្សាភិបាលសាកលវិទ្យាល័យបញ្ញាសាស្ត្រកម្ពុជា និងជាអ្នកនិពន្ធសៀវភៅគ្មាននរណាកើតមកក្រទេ បានលើកឡើងថា អ្វីដែលជីវិតយើងបានឆ្លងកាត់ជាច្រើន មិនថាជារឿងបែបណាសុទ្ធតែជាតម្លៃសម្រាប់សិក្សាពីមជ្ឈដ្ឋានជុំវិញខ្លួន ដើម្បីពង្រឹងខ្លួនឯង និងអភិវឌ្ឍខ្លួនឯងឱ្យបានល្អរហូតគេទទួលស្គាល់សមត្ថភាពរបស់អ្នក ។
ឯកឧត្តមបន្ថែមថា ព្រោះតែការខិតខំរៀនសូត្រ និងមិនត្រាំចិត្តជាមួយអ្វីដែលគេមើលស្រាលពីសមត្ថភាព ទើបធ្វើឱ្យឯកឧត្តមសម្រេចបានសមទ្ធិផលជាច្រើនក្នុងជីវិត ហើយនេះហើយជារស់ជាតិជីវិត តែយើងត្រូវចេះរស់នៅជាមួយការរៀបចំជីវិត ។
« ខ្ញុំដឹងគេដើរជៀសខ្ញុំ ខ្ញុំដឹងគេមើលស្រាលខ្ញុំ ប៉ុន្តែខ្ញុំមិនដែលទន់ទោ ព្រោះខ្ញុំមានស្មារតីលើខ្លួនឯង និងខិតខំឱ្យអស់ពីសមត្ថភាព»
ឯកឧត្តម វ៉េង សេរីវុឌ្ឍ
គួរបញ្ជាក់ដែរថា សិក្ខាសាលា «កុំរស់ជាមួយរស់ជាតិជីវិត រស់ជាមួយការរៀបចំជីវិត » បានរៀបចំធ្វើឡើងកាលពីថ្ងៃទី២២ ខែកញ្ញា ឆ្នាំ២០២៣ ដោយមានការចូលរួមពីសំណាក់លោកបណ្ឌិត សេង ប៊ុនធឿន សាកលវិទ្យាធិការរងនៃសាកលវិទ្យាល័យជាតិគ្រប់គ្រង, ព្រះសង្ឃ សិស្សានុសិស្ស និងសាធារណជនជាងប្រាំរយនាក់ នៅមជ្ឈមណ្ឌលសហប្រតិបត្តិការកម្ពុជា-កូរ៉េ(CKCC) នៃសាកលវិទ្យាល័យភូមិន្ទភ្នំពេញ ៕
