ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – រាជរដ្ឋាភិបាលកម្ពុជាបានចាត់ទុកការអភិវឌ្ឍយុវជនជាអាទិភាពមួយ ដើម្បីកសាងធនធានមនុស្ស ដែលបំពាក់ដោយជំនាញបច្ចេកទេស និងវិជ្ជាជីវៈត្រឹមត្រូវសម្រាប់បំពេញតម្រូវការទីផ្សារការងារដែលកំពុងវិឌ្ឍន៍ ។ ទោះជាយ៉ាងណាក៏ដោយ អត្រាបោះបង់ការសិក្សាខ្ពស់ជាបន្តបន្ទាប់ ជាពិសេសនៅកម្រិតមធ្យមសិក្សាបឋមភូមិ ដែលមានន័យថា យុវជនមួយភាគធំកំពុងស្ថិតនៅក្រៅប្រព័ន្ធអប់រំផ្លូវការ ដោយពួកគេមិនមានលក្ខណៈសម្បត្តិគ្រប់គ្រាន់សម្រាប់ចុះឈ្មោះចូលរៀនក្នុងការអប់រំបន្ថែម និងការអភិវឌ្ឍជំនាញនៅតាមវិទ្យាស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ និងវិទ្យាល័យចំណេះទូទៅ និងបច្ចេកទេសឡើយ។
ឆ្លើយតបទៅនឹងបញ្ហាខាងលើនេះ អង្គការយូណេស្កូ រួមជាមួយក្រសួងការងារ និងបណ្តុះបណ្តាលវិជ្ជាជីវៈ និងក្រសួងអប់រំ យុវជន និងកីឡា កាលពីឆ្នាំ២០១៩ បានដាក់ឱ្យដំណើរការកម្មវិធីសមមូលអប់រំកម្រិតមូលដ្ឋានតាមអ៊ីនធឺណិត (ប៊ីប) ដើម្បីជាស្ពានដល់យុវជនដែលបោះបង់ការសិក្សា ឱ្យចូលការបណ្តុះបណ្តាលជំនាញ និងមានឱកាសទទួលបានការងារសមរម្យ ដែលពួកគេអាចរួមចំណែក និងដើរតួនាទីក្នុងអនាគត នៃសេដ្ឋកិច្ច និងសង្គមកម្ពុជា។
តាមរយៈកម្មវិធី ប៊ីប យុវជនដែលនៅក្រៅសាលាត្រូវបានផ្តល់ឱកាសដើម្បីសិក្សាមុខវិជ្ជាផ្សេងៗដូចជាសហគ្រិនភាព ជំនាញឌីជីថល ជំនាញនៅកន្លែងធ្វើការ និងជំនាញសតវត្សទី២១ ដែលត្រៀមឱ្យពួកគេចូលសិក្សាក្នុងកម្មវិធីបណ្តុះបណ្តាលជំនាញផ្លូវការ ។ នៅពេលបញ្ចប់ការសិក្សាតាមកម្មវិធីប៊ីប អ្នកសិក្សានឹងទទួលបានវិញ្ញាបនបត្រស្មើនឹងថ្នាក់ទី៩ ដែលទទួលស្គាល់ដោយក្រសួងអប់រំ យុវជន និងកីឡា និងក្រសួងការងារ និងបណ្តុះបណ្តាលវិជ្ជាជីវៈ។
សូមបញ្ជាក់ថា កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត (ប៊ីប) គឺជាផ្នែកមួយ នៃកម្មវិធីការងារ និងមុខរបរសមរម្យសម្រាប់យុវជននៅកម្ពុជា ដំណាក់កាលទីពីរ ។ តាមរយៈការសិក្សាបែបឌីជីថល ដែលអាចបត់បែនបាន និងអាចឱ្យអ្នកសិក្សាបញ្ចប់វគ្គសិក្សាបានគ្រប់ពេលវេលា គ្រប់ទីកន្លែង និងតាមល្បឿនរបស់ពួកគេ ដើម្បីធានាថា យុវជនកម្ពុជាទាំងអស់ ជាពិសេសអ្នកដែលមកពីមជ្ឈដ្ឋានលំបាក និងនៅក្រៅប្រព័ន្ធអប់រំផ្លូវការ មានលទ្ធភាពទទួលបានជំនាញ និងការងារសមរម្យ។
ចាប់តាំងពីមមណ្ឌលសិក្សា ប៊ីប ដំបូងត្រូវបានបង្កើតឡើងក្នុងខែកុម្ភៈ ឆ្នាំ២០១៩ កម្មវិធីនេះ បានបង្កើតភាពជាដៃគូយុទ្ធសាស្រ្តថ្មីជាមួយដៃគូក្នុងវិស័យឯកជន ដើម្បីផ្តល់នូវដំណោះស្រាយបច្ចេកវិទ្យាឌីជីថល ដើម្បីឈានទៅដល់យុវជនកាន់តែច្រើននៅទូទាំងប្រទេសកម្ពុជា។ សព្វថ្ងៃនេះ ប៊ីប បាននិងកំពុងដំណើរការមជ្ឈមណ្ឌលសិក្សាចំនួន ២៧ នៅក្នុងខេត្តចំនួន១៦នៅទូទាំងប្រទេស។ យុវជនកម្ពុជាជាង ២០០០នាក់បានទទួលអត្ថប្រយោជន៍ពីកម្មវិធីនេះ៕
