ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីរសៀលថ្ងៃអង្គារ (៣ ខែកុម្ភៈ) ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបពិភាក្សាការងារជាមួយ លោកស្រី វ៉្លាដាន់កា អាន់ឌ្រេវ៉ា (Vladanka Andreeva) អ្នកសម្របសម្រួលថ្មីរបស់អង្គការសហប្រជាជាតិប្រចាំកម្ពុជា ដើម្បីដាក់ចេញនូវទិសដៅពង្រឹងភាពជាដៃគូឱ្យកាន់តែស៊ីជម្រៅ។
ក្នុងជំនួបនោះ ភាគីទាំងពីរបានសង្កត់ធ្ងន់លើការជំរុញការបណ្ដុះបណ្ដាលជំនាញបច្ចេកទេស និងវិជ្ជាជីវៈ (TVET) និងការអនុវត្តកម្មវិធីការងារសមរម្យសម្រាប់យុវជន (ដូចជាកម្មវិធី DEY III និង DWCP)។ ជាមួយគ្នាឯកឧត្តមរដ្ឋមន្ត្រីបានលើកឡើងពីសមិទ្ធផលក្នុងការកែលម្អលក្ខខណ្ឌការងារ ការកំណត់ប្រាក់ឈ្នួលអប្បបរមា និងការពង្រីករបបសន្តិសុខសង្គមជូនកម្មករនិយោជិត ព្រមជាមួយការយកចិត្តទុកដាក់លើការបង្កើតវេទិកាការងារទូទាំងប្រទេស ជាពិសេសសម្រាប់យុវជន និងពលករដែលត្រឡប់មកពីក្រៅប្រទេស។
តាមរយៈការពង្រឹងភាពជាដៃគូយ៉ាងជិតស្និទ្ធជាមួយអង្គការសហប្រជាជាតិ ឯកឧត្តម ហេង សួរ រំពឹងថា នឹងបង្កើនផលិតភាពកម្លាំងពលកម្មកម្ពុជាឱ្យស្របតាមគោលដៅអភិវឌ្ឍន៍សេដ្ឋកិច្ចប្រកបដោយចីរភាព និងបរិយាបន្ន។
“យើងជឿជាក់យ៉ាងមុតមាំថា កិច្ចសហប្រតិបត្តិការដំណាក់កាលបន្ទាប់នេះ នឹងផ្តោតសំខាន់លើការអភិវឌ្ឍជំនាញសម្រាប់យុវជន និងកម្លាំងពលកម្មកម្ពុជា ប្រកបដោយផលិតភាពខ្ពស់ និងប្រសិទ្ធភាព” — ឯកឧត្ដម ហេង សួរ
ជាការឆ្លើយតប លោកស្រី វ៉្លាដាន់កា អាន់ឌ្រេវ៉ា បានបញ្ជាក់ពីការប្តេជ្ញាចិត្តរបស់អង្គការសហប្រជាជាតិ ក្នុងការបន្តកិច្ចសហការគាំទ្រដល់ការអភិវឌ្ឍកម្ពុជាប្រកបដោយចីរភាព តាមរយៈវិធីសាស្ត្រដ៏មានប្រសិទ្ធភាព ភាពរហ័សរហួន និងការសម្របសម្រួលយ៉ាងល្អ ដើម្បីកសាងអនាគតដែលរួមបញ្ចូល និងមានភាពធន់សម្រាប់ប្រជាជនកម្ពុជា។ ហើយលោកស្រីមានជំនឿថា ភាពជាដៃគូដ៏ចាំបាច់នេះ នឹងចូលរួមចំណែកយ៉ាងសំខាន់ដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាព និងចក្ខុវិស័យសេដ្ឋកិច្ចរបស់កម្ពុជានាពេលអនាគត៕
