ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – លោកឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប និងត្រូវបានចាត់ទុកថា គឺជាអ្នកជំនាញផ្នែកអប់រំមួយរូប បានលើកឡើងថា “រដ្ឋាភិបាលបាននិងកំពុងអនុវត្តបណ្តើរៗលើសង្គមឌីជីថលដែលមានន័យថា រដ្ឋាភិបាលផ្តោតលើការបញ្ចូលបច្ចេកវិទ្យានៅគ្រប់វិស័យទាំងរដ្ឋ និងឯកជន ដើម្បីពន្លឿនប្រតិបត្តិការផ្សេងៗ ក៏ដូចជាដើរឱ្យទាន់ការរីកចម្រើននៃបច្ចេកវិទ្យាពិភពលោក។
លោកឧកញ៉ាបន្តថា គ្រូបង្រៀនត្រូវចូលរួមគាំទ្រ និងអភិវឌ្ឍសមត្ថភាព ព្រមទាំងចាប់យកបច្ចេកវិទ្យាថ្មីៗ ពីព្រោះវិធីសាស្រ្តបង្រៀននឹងប្រែប្រួលឆ្ពោះទៅរកការបង្រៀនបែបចម្រុះ ដែលវិធីសាស្រ្តនេះអនុញ្ញាតឱ្យសិស្សរៀនក្នុងថ្នាក់ខ្លះ រៀនតាមអនឡាញខ្លះ និងសិក្សាដោយខ្លួនឯងតាមរយៈមេរៀនជាវីដេអូ និងប្រភពឯកសារអនឡាញ ក៏ដូចជាអ៊េបរបស់សាលាផងដែរ។
លោកបានបន្ថែមទៀតថា ការប្រើប្រាស់បច្ចេកវិទ្យាឌីជីថលក្នុងការបង្រៀន នឹងជួយជំរុញសិស្សានុសិស្សអាចត្រៀម និងសម្របខ្លួនបណ្តើរក្នុងការសិក្សា ក៏ដូចជារស់នៅក្នុងបរិបទសង្គមថ្មីនេះ។
លោកឧកញ៉ា ប៉ិច បូឡែន
“លោកគ្រូអ្នកគ្រូគួរផ្លាស់ប្តូរវិធីសាស្រ្តបង្រៀនបែបបុរាណ ដែលគ្រូបង្រៀនមានតួនាទីជាអ្នកផ្ទេរចំណេះដឹង មកប្រើវិធីសាស្រ្តបែបសិស្សមជ្ឈមណ្ឌលវិញ ដែលគ្រូបង្រៀនមានតួនាទីជាអ្នកសម្របសម្រួលការសិក្សា ដោយដឹកនាំសកម្មភាពសិស្សសិក្សាស្រាវជ្រាវ និងណែនាំពីប្រភពមេរៀន។ ការកែប្រែនេះនឹងឆ្លើយតបនឹងបម្រែបម្រួលប្រព័ន្ធអប់រំគរុកោសល្យថ្មីរបស់ពិភពលោកផងដែរ”
ជាមួយគ្នានេះដែរ លោកឧកញ៉ា ប៉ិច បូឡែន ក៏បានរំលឹកដែរថា ក្នុងសម័យកូវីដ សាលារៀនជាច្រើនបានប្រើប្រាស់បច្ចេកវិទ្យាឌីជីថលក្នុងការបង្រៀនសិស្សពីចម្ងាយ តែបច្ចុប្បន្ននេះកូវីដចប់ពិតមែន ប៉ុន្តែការបង្រៀនតាមប្រព័ន្ធឌីជីថលមិនទាន់បញ្ចប់ទេ នៅតែបន្តរហូតដល់ថ្ងៃអនាគត។ ដូច្នេះលោកគ្រូអ្នកគ្រូត្រូវផ្តោតសំខាន់លើការប្រើប្រាស់បច្ចេកវិទ្យាឌីជីថល គរុកោសល្យបង្រៀនបែបចម្រុះ និងសិស្សមជ្ឈមណ្ឌល ដែលជាបំណិនថ្មីត្រូវចាប់យក ដើម្បីជួយជំរុញវិស័យអប់រំប្រកបដោយគុណភាពសម្រាប់យុវជនជំនាន់ក្រោយ”៕
