ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងឱកាសជាវាគ្មិនក្នុងកិច្ចពិភាក្សាតុមូល ស្តីពី «ការជ្រើសរើសមុខជំនាញនៅថ្នាក់ឧត្តមសិក្សា និងក្រោយឧត្តមសិក្សា» កាលពីព្រឹកថ្ងៃទី១៤ ខែធ្នូ ឆ្នាំ២០២៣ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិតសភាកម្ពុជា បានលើកទឹកចិត្តទៅដល់យុវជនសម្រេចចិត្តជ្រើសរើសមុខជំនាញសិក្សា ដោយផ្តោតការយកចិត្តទុកដាក់ទៅលើទេពកោសល្យ ជាជាងការសម្រេចចិត្តតាមគ្រួសារ ដើម្បីពង្រឹងសមត្ថភាព ពេទកោសល្យដែលខ្លួនមាន ឈានទៅបង្កើតការងារសម្រាប់ខ្លួនឯង និងអ្នកដទៃ។
ឯកឧត្ដមបណ្ឌិតសភាចារ្យ សុខ ទូច បានក្រើនរំឭកដល់យុវជន ត្រូវពិចារណាឱ្យបានគ្រប់ជ្រុងជ្រោយមុននឹងសម្រេចចិត្តជ្រើសរើសមុខជំនាញដើម្បីឈានទៅចាប់យកឱកាសការងារនាពេលខាងមុខនេះ ។ ក្នុងនោះឯកឧត្ដមបណ្ឌិត បានផ្ដល់អនុសាសន៍ ដល់យុវជនពិចារណាក្នុងការចាប់យកមុខជំនាញណាមួយក្នុងចំណោមមុខជំនាញទាំង៣កម្រិត ដែលរួមមាន បឋមជំនាញ ដែលសំដៅលើយុវជនដែលចប់ថ្នាក់ទី៩ អាចជ្រើសរើសជំនាញផ្សេងៗ យកទៅប្រកបមុខរបរសេដ្ឋកិច្ចក្រៅប្រព័ន្ធ និងការងារមួយចំនួនទៀត, មធ្យមជំនាញ ដែលសំដៅដល់អ្នកជាប់ ឬធ្លាក់បាក់ឌុប ដែលអាចចាប់យកជំនាញដែលកំពុងមានតម្រូវការខ្ពស់ និងឧត្ដមជំនាញដែលសំដៅទៅលើការសិក្សាថ្នាក់ឧត្ដមសិក្សា និងក្រោយឧត្ដមសិក្សា ដើម្បីឆ្ពោះទៅប្រកបដោយមុខរបរចិញ្ចឹមជីវិតប្រចាំថ្ងៃនាពេលអនាគត។
តែយ៉ាងណាក៏ដោយបើតាមប្រសាសន៍របស់ឯកឧត្តមបណ្ឌិត សុខ ទូច ភាពជោគជ័យដែលឯកឧត្តមស្គាល់ឃើញកន្លងមក គឺរៀនតាមទេពកោសល្យ ដោយថា ប្រសិនបើយុវជនមានទេពកោសល្យតាំងពីធម្មជាតិ នោះនឹងធ្វើឱ្យគេអាចបង្កើតទីផ្សារការងារ បង្កើតឈ្មោះជាផលិតផល នៃប្រទេសខ្លួនឯង មានការទទួលស្គាល់នៅលើឆាកអន្តរជាតិ ។ ឯកឧត្តមជឿជាក់ថា អ្វីដែលមានទេពកោសល្យជាធម្មជាតិ បូកនិងការសិក្សាស្រាវជ្រាវ នោះនឹងកាន់តែល្អប្រសើរ៕
