កម្ពុជាគ្រោងនឹងរៀបចំកម្មវិធីការប្រកួតសរសេរតាមអានជាសាធារណៈ​លើកដំបូងគេ ដែលមានឈ្មោះថា «សំណេរអង្គរ» នៅថ្ងៃទី២១ ខែមករា ឆ្នាំ២០២៤ខាងមុខ ឯស្ពានហាល ខាងលិចប្រាសាទអង្គរវត្ត ក្នុងនោះ ឯកឧត្តមឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និង​កីឡា គឺជាអ្នកអានអត្ថបទសរសេរតាមអាននេះដោយផ្ទាល់។

លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ មានប្រសាសន៍ថា កម្មវិធីប្រកួតសរសេរតាមអានជាសាធារណៈ នេះ នឹងរួមចំណែកធ្វើឱ្យសាធារណៈជន សិស្ស និស្សិត បណ្ដុះទម្លាប់ចូលចិត្តអានសៀវភៅ និងយកចិត្តទុកដាក់ទាំងវេយ្យាករណ៍ ទាំងអក្ខរាវិរុទ្ធ។

លោកបណ្ឌិត ឈត ប៊ុនថង មានប្រសាសន៍បន្ថែមថា កម្មវិធីប្រកួតសរសេរតាមអានជាសាធារណៈនេះនឹងចូលរួមលើកស្ទួយវិស័យអក្សរសាស្ត្រខ្មែរក៏នឹងអនុញ្ញាត​ឱ្យអ្នកចូលរួមដោយផ្ទាល់ពង្រីកចំណេះដឹងទូទៅរបស់ខ្លួន ដោយត្រូវយល់ច្បាស់ពាក្យគន្លឹះទាក់ទងជាមួយអង្គរវត្ត ប្រាសាទបុរាណ ពាក្យគន្លឹះវប្បធម៌ រួមមាន តួអង្គព្រះមហាក្សត្រ ជំនឿ ស្ថាបត្យកម្ម និងរឿងរ៉ាវផ្សេងៗ ។ លោកបណ្ឌិតបន្តថា ប្រសិនបើអ្នកចូលរួមប្រកួតមិនបានត្រៀមមុនទេ គឺអាចសរសេរមិនត្រូវ ឬសរសេរមិនទាន់ ។ លើសពីនេះ មានតែការអានប៉ុណ្ណោះជួយឱ្យសាធារណជនចេះច្រើន ដឹងព័ត៌មានសំខាន់ៗតាមរយៈសាច់រឿងបានច្រើន។

ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ មានប្រសាសន៍ថា កន្លងមកការសរសេរតាមអាននៅក្នុងថ្នាក់តាមសាលារៀនដូចជាមិនសូវផុសផុលនោះទេ ប៉ុន្តែឥឡូវឃើញថា មានការល្អប្រសើរឡើងវិញច្រើន រហូតដល់មានការបង្កើតកម្មវិធីសរសេរតាមអានលើប្រធានបទដ៏សំខាន់ និងជារឿងល្អដែលត្រូវចូលរួមអបអរសាទរក្នុងការផ្ដួចផ្ដើមឱ្យមានការប្រកួតសរសេរតាមអានជាសាធារណៈ លើប្រធានបទ «សំណេរអង្គរ» នេះ។

“សព្វថ្ងៃនេះ មានការអូសទាញច្រើនពីក្រុមក្មេងទំនើង ប្រើប្រាស់គ្រឿងញៀនច្រើន ដូច្នេះនៅពេលមានកម្មវិធីបែបនេះ នឹងបានរួមចំណែកបង្វែរយុវជនងាកមកគិតផ្នែកអក្សរសាស្រ្ត ភាសា វប្បធម៌បានកាន់តែច្រើន​”

លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ

គួរបញ្ជាក់ថា កម្មវិធីប្រកួតសរសេរតាមអានជាសាធារណៈលើកទី១ មានការគាំទ្រពីក្រសួងអប់រំ យុវជន និងកីឡា, ក្រសួងវប្បធម៌ និង​វិចិត្រសិល្បៈ, អាជ្ញាធរជាតិអប្សរា, អង្គការ​ស៊ីប៉ា ។ បើតាម​ក្រសួងអប់រំ យុវជន និង​កីឡា កម្មវិធីប្រកួតសរសេរតាមអានជាសាធារណៈ ត្រូវរៀបចំឡើងដើម្បីជាការលើកស្ទួយ​អក្សរសាស្រ្តខ្មែរ និង​ទាញចំណាប់អារម្មណ៍ប្រជាជនខ្មែរ ឱ្យ​យក​ចិត្តទុកដាក់​លើ​ការ​សរសេរអក្សរខ្មែរ​ឱ្យបានត្រឹមត្រូវ។

សម្រាប់សាធារណៈជនដែលមានបំណងចង់ចូលរួមប្រកួត អាចចុះឈ្មោះចូលរួមតាមរយៈផ្ញើសារតេឡេក្រាមទៅលេខទូរស័ព្ទ ០៩២ ៣៣៧ ៦២៦។ ផុតកំណត់ចុះឈ្មោះចូលរួមថ្ងៃទី ទី៧ ខែមករា ឆ្នាំ២០២៤។

សម្រាប់អត្ថប្រយោជន៍ដែលទទួលបានពីកម្មវិធីប្រកួតនេះ រួមមាន ជ័យលាភីលេខ១ ទទួលបានការស្នាក់នៅសណ្ឋាគារផ្កាយប្រាំ ១បន្ទប់គ្រែ២ ៣យប់ នៅខេត្តសៀមរាប រួមជាមួយថវិកា ១,២០០,០០០រៀល។ ជ័យលាភីលេខ២ ទទួលបានការស្នាក់នៅសណ្ឋាគារផ្កាយបួន ១បន្ទប់ គ្រែ២ ៣យប់ នៅសៀមរាបនិងថវិកា ១,២០០,០០០រៀល។ ជ័យលាភីលេខ៣៖ ទទួលបានការស្នាក់នៅសណ្ឋាគារផ្កាយបី ១បន្ទប់ គ្រែ២ ៣យប់ នៅសៀមរាបនិងថវិកា ៤០០,០០០រៀល និងរង្វាន់លួងចិត្តច្រើនរង្វាន់៕