ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បញ្ហាជម្លោះ ការប្ដឹងផ្ដល់គ្នារកខុសរកត្រូវ តែងតែកើតមានជារឿយៗនៅតាមផ្លូវសាធារណៈ ដោយពេលខ្លះអាចឈានដល់ការប្រើប្រាស់អំពើហិង្សា ដោយសារខ្វះការប្រុងប្រយ័ត្ន និងការយោគយល់អធ្យាស្រ័យគ្នា។ យ៉ាងណាក៏ដោយ បើតាមលោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិកម្ពុជា ដើម្បីដោះស្រាយបញ្ហាទាំងនេះ ក្រៅពីគោរពច្បាប់ចរាចរអ្នកបើកបរក៏ត្រូវមានក្រមសីលធម៌ពេលធ្វើដំណើរតាមផ្លូវសាធារណៈ។
លោកបណ្ឌិត ឈត ប៊ុនថង មានប្រសាសន៍ថា ការទាស់ទែងគ្នានៅពេលធ្វើដំណើរតាមទីសាធារណៈ ហើយឈានដល់ការប្រើប្រាស់អំពើហិង្សា ជាចំណុចដែលគួរពិចារណាទាំងអស់គ្នា ហើយរួមគ្នាកាត់បន្ថយ ឬលុបបំបាត់អំពើហិង្សាឱ្យបាន ។ ជាក់ស្ដែង នៅពេលដែលយើងត្រូវគេជះទឹកដាក់ យើងអាចគិតថា យើងជាអ្នករងគ្រោះ ប៉ុន្តែនៅពេលដែលយើងប្រើអំពើហិង្សាទៅលើគេវិញ យើងបានផ្លាស់ប្ដូរខ្លួនពីជនរងគ្រោះទៅជាអ្នកប្រព្រឹត្តកំហុស ឬជាអ្នកបង្កហិង្សាដាក់អ្នកដ៏ទៃ។
លោកបណ្ឌិត ឈត ប៊ុនថង បញ្ជាក់បន្ថែមថា ទោះបើជាអ្នកបើកបរប៉ះពារគេ សាចទឹកដាក់គេក៏មានកំហុស អ្នកប្រើហិង្សាក៏មានកំហុស ដូច្នេះ គួរចៀសវាងធ្វើយ៉ាងណា កុំឱ្យមានកំហុសទាំងអស់គ្នា។ ទន្ទឹមនោះ ប្រសិនបើរងគ្រោះតិចតួច ឬកម្រិតស្រាល ហើយគេបានសុំទោស សុំអធ្យាស្រ័យដោយទន់ភ្លន់ ដូច្នេះ អ្នករងគ្រោះនោះក៏គួរយោគយល់អត់ឱនអធ្យាស្រ័យផងដែរ ។
ទោះជាយ៉ាងនេះក្ដី លោកបណ្ឌិត ឈត ប៊ុនថង មានប្រសាសន៍ទៀតថា មនុស្សមួយចំនួនបានប្រព្រឹត្តកំហុសតិចតួចអំឡុងពេលបើកបរ ហើយក៏បានសុំទោស សុំអធ្យាស្រ័យ ក៏គេនៅតែមិនអធ្យាស្រ័យហើយថែមទាំងប្រើអំពើហិង្សាទៅលើអ្នកទន់ខ្សោយជាងខ្លួន ឬប្រើអំពើហិង្សាលើស្រ្តីជាដើម។ ការប្រើប្រាស់អំពើហិង្សានេះ បើទោះជាប្រព្រឹត្តិទៅលើស្រ្តី ឬបុរសក៏នៅតែជាកំហុស ពោលគឺមិនគួរប្រើអំពើហិង្សាជាដំណោះស្រាយឡើយ ប្រសិនមានរឿងអ្វីយើងជជែកគ្នា បើជជែកមិនដាច់ស្រេច គឺអាចរកអាជ្ញាធរមកដោះស្រាយ។
លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា មានប្រសាសន៍ថា «ជាយោបល់ខ្ញុំ បើសិនជាកំហុសតិចតួចយើងគួរអត់ធ្មត់ អធ្យាស្រ័យ ដោះស្រាយខ្លួនឯងទៅ ព្រោះអាជ្ញាធរមានការងារច្រើនណាស់មិនអាចមកមើលយើងគ្រប់គ្នាបានទេ ហើយបើសិនយើងចូលជួបអាជ្ញាធរ ជានគរបាលចរាចរក្ដី ឬក៏រឿងធំប្ដឹងផ្ដល់ដល់តុលាការនាំឱ្យខាតពេលវេលា អំពុលទៅដល់អាជ្ញាធរ ខាតទាំងលុយយើងទៀត។ ដូច្នេះ យើងត្រូវពិចារណាហើយបញ្ចប់ជម្លោះនៅនឹងកន្លែង ឬអាចចរចារដោយសន្តិវិធី។»
លោកបណ្ឌិត ឈត ប៊ុនថង ក៏បានអំពាវនាវឱ្យបងប្អូនដែលបើកបរតាមដងផ្លូវសាធារណៈត្រូវតែបង្កើនការប្រុងប្រយ័ត្ន កុំយកគំនិតថា ប៉ះពារគេបន្តិចបន្តួចយើងអាងពាក្យសុំទោស ឬលើកឡើងថា ជាអចេតនានោះឡើយ គឺត្រូវតែប្រុងប្រយ័ត្ន ជាពិសេសកន្លែងដែលចង្អៀត កន្លែងដែលមានចរាចរមមារញឹក នៅពេលដែលមានភ្លៀង ឬមានទឹកលិចផ្លូវជាដើម ។ ទន្ទឹមគ្នានេះ ការបើកបរមានទាំងច្បាប់ចែង និងមានទាំងសីលធម៌នៃការបើកបរ ដែលយើងគួរលើកតម្លៃខ្លួនយើង តម្លៃជាតិយើង តម្លៃវប្បធម៌ ដូចគេនិយាយថា ប្រជាជនខ្មែរ ជាប្រជាជនស្លូតបូត សុភាពរាបសារ មានសេចក្ដីថ្លៃថ្នូរ និងមានសីលធម៌និងគុណធម៌ល្អ៕
