ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងសន្ទរកថាបើកសន្និបាតបូកសរុបការងារអប់រំ យុវជន និងកីឡា ឆ្នាំសិក្សា២០២១-២០២២ និងលើកទិសដៅសម្រាប់ឆ្នាំសិក្សា២០២២-២០២៣ កាលពីថ្ងៃទី១០ ខែមេសា ឆ្នាំ២០២៣ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានចូលរួមចែករំលែកនូវទស្សនាទានផ្ទាល់ខ្លួន និងចង្អុលបង្ហាញអំពីបញ្ហាសំខាន់ៗចំនួន៧ចំណុច សម្រាប់កិច្ចពិភាក្សា ក្នុងការអភិវឌ្ឍវិស័យអប់រំ យុវជន និងកីឡា។
ទស្សនាទានទាំង៧ចំណុចនោះរួមមាន ៖
ទី១. ការពង្រឹងគុណភាពអប់រំគ្រប់កម្រិត គឺជាអាទិភាពចម្បងបំផុត, ជាពិសេសនៅកម្រិតបឋមសិក្សា ដើម្បីធានាថា សិស្សានុសិស្សមានមូលដ្ឋានរឹងមាំ និងមានសមត្ថភាពគ្រប់គ្រាន់ ក្នុងការបន្តការសិក្សានៅកម្រិតមធ្យមសិក្សា និងឧត្តមសិក្សា ប្រកបដោយភាពជឿជាក់ សំដៅឆ្លើយតបទៅនឹងភាពបន្ទាន់នៃតម្រូវការមូលធនមនុស្ស ដែលមានគុណភាព។
ទី២. ការពង្រឹងគុណភាព នៃការបង្រៀន, ការសិក្សា និងការស្រាវជ្រាវ និងការពង្រីកមុខវិជ្ជា និងជំនាញថ្មីៗនៅឧត្តមសិក្សា គឺជាអាទិភាពចម្បងមួយទៀតដើម្បីឆ្លើយតបទៅនឹងការវិវឌ្ឍយ៉ាងលឿន នៃសង្គម-សេដ្ឋកិច្ច បច្ចុប្បន្ន និងទៅអនាគត។
ទី៣. ការពង្រឹងគុណភាពអប់រំ តម្រូវឱ្យមានការពង្រឹងអភិបាលកិច្ច និងប្រសិទ្ធភាពគ្រប់គ្រង នៅតាមមន្ទីរអប់រំ យុវជន និងកីឡា និងតាមសាលារៀនគ្រប់កម្រិត ក៏ដូចជាការជំរុញនូវការចូលរួមរបស់អាណាព្យាបាល, សហគមន៍ និងវិស័យឯកជន ផងដែរ។
ទី៤. ការពង្រឹងការបណ្តុះបណ្តាលគ្រូបង្រៀន និងវិក្រិតការ ក៏ដូចជាការបន្តលើកកម្ពស់ជីវភាព, សមត្ថភាព និងគុណតម្លៃរបស់គ្រូបង្រៀន ដើម្បីឱ្យស័ក្តិសមជាកម្លាំងជួរមុខរបស់កម្ពុជា ក្នុងការកសាងមូលធនមនុស្សឆ្ពោះទៅសម្រេចបាននូវ ចក្ខុវិស័យកម្ពុជាឆ្នាំ២០៥០ គឺជាកិច្ចការដែលកាន់តែមានសារៈសំខាន់, ជាពិសេស ក្នុងបរិការណ៍នៃការអប់រំ តាមគន្លងប្រក្រតីភាពថ្មី។
ទី៥. ក្នុងបរិបទ នៃការកើនឡើងនូវការធ្វើពាណិជ្ជូបនីយកម្ម (commercialization) និងការប្រកួតប្រជែង ដើម្បីដណ្តើមយកការចាប់អារម្មណ៍, សាលារៀនត្រូវតែមានការកែទម្រង់ជាបន្តបន្ទាប់ តាមរយៈការជំរុញការបង្កើតសាលារៀនជំនាន់ថ្មី និងសាលាគំរូ និងការបន្តធ្វើបច្ចុប្បន្នកម្មកម្មវិធីសិក្សានៅគ្រប់កម្រិតសិក្សា ដើម្បីបង្កើតបរិយាកាសមួយដែលធានាថា សាលារៀន គឺជាទីកន្លែងដែលសិស្សានុសិស្ស ចង់ទៅរៀន និងដែលផ្តល់នូវចំណេះដឹង និងការអប់រំ ប្រកបដោយគុណភាព ឆ្លើយតបទៅនឹងតម្រូវការ នៃការអភិវឌ្ឍសេដ្ឋកិច្ច និងសង្គម។
ទី៦. ការាប់យកកាលានុវត្តភាព ដែលលេចចេញពីបដិវត្តន៍ឧស្សាហកម្មជំនាន់ទី៤.០ និងបរិវត្តកម្មដ៏លឿន នៃបច្ចេកវិទ្យា, ពិសេស បច្ចេកវិទ្យាឌីជីថល, ទាមទារឱ្យមានការលើកកម្ពស់ការអប់រំឌីជីថល, ការអភិវឌ្ឍហេដ្ឋារចនាសម្ព័ន្ធឌីជីថល តាមសាលារៀន, និង ការជំរុញនូវការចាប់យកមុខវិជ្ជាវិទ្យាសាស្រ្ត បច្ចេកវិទ្យា វិស្វកម្ម សិល្បៈ និងគណិតវិទ្យា (STEAM)។
និង ទី៧. យុវជន គឺជាស្នូល នៃមូលធនមនុស្សរបស់កម្ពុជា ដែលយើងចាំបាច់ត្រូវការឱ្យពួកគាត់មានសុខភាពល្អ, មានគំនិតច្នៃប្រឌិតខ្ពស់ និងមានសីលធម៌ល្អ ស័ក្តិសមជាពលរដ្ឋល្អ ក្នុងសង្គមកម្ពុជា ដែលប្រកបដោយអារ្យធម៌ខ្ពស់។ ក្នុងន័យនេះ ក្រសួងអប់រំ យុវជន និងកីឡា មានភាពចាំបាច់ក្នុងការពង្រឹងនូវការលើកកម្ពស់សុខភាពសិក្សារបស់សិស្ស-និស្សិត ដោយផ្សារភ្ជាប់វិស័យកីឡាទៅនឹងវិស័យអប់រំ, ការបន្តជំរុញចលនា «យុវជនម្នាក់ ចេះកីឡាមួយប្រភេទយ៉ាងតិច ប្រចាំជីវិត» និងការផ្តល់ឱកាសឱ្យយុវជនបញ្ចេញនូវទេពកោសល្យរបស់ខ្លួន។ ទន្ទឹមនេះ ក្រសួង ក៏ត្រូវផ្តោតជាសំខាន់ផងដែរ លើការងប់រំសីលធម៌ និងសុជីវធម៌, ការបណ្តុះទម្លាប់ និងស្មារតីគោរពច្បាប់ និងវិន័យល្អ ក្នុងនាមជាពលរដ្ឋ, ព្រមទាំងការបណ្តុះមនសិការស្រឡាញ់ និងការពារវប្បធម៌ និងអត្តសញ្ញាណជាតិ៕
