ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងរយៈពេលចុងក្រោយនេះ គេសង្កេតឃើញថា សាលារៀនមួយចំនួននៅកម្ពុជា បានចាប់ផ្តើមអនុវត្តវិធានការហាមឃាត់សិស្សានុសិស្សមិនឱ្យយកទូរស័ព្ទដៃ Smart Phone ចូលទៅក្នុងបរិវេណសាលារៀន ឬថ្នាក់រៀន ក្រោមហេតុផលថា ការប្រើប្រាស់ទូរស័ព្ទរបស់សិស្សបានធ្វើឱ្យបាត់បង់ការប្រុងប្រយ័ត្នចំពោះការសិក្សា ដោយសិស្សមិនមើលមេរៀន លែងចាប់អារម្មណ៍នឹងការអានសៀវភៅ ឬធ្វើលំហាត់ជាដើម ។ តើការហាមឃាត់សិស្សមិនឱ្យប្រើប្រាស់ទូរស័ព្ទដៃ Smart Phone នៅបរិវេណសាលា ឬថ្នាក់រៀន ផ្ទុយទៅនឹងនិន្នាការនៃការប្រើប្រាស់បច្ចេកវិទ្យាក្នុងវិស័យអប់រំដែរ ឬទេ
ចំពោះករណីនេះ លោកបណ្ឌិត យ៉ង់ ពៅ អគ្គលេខាធិការ នៃរាជបណ្ឌិតសភាកម្ពុជា មានប្រសាសន៍ថា ការអប់រំល្អ មានគុណភាព ឬគ្មានគុណភាព វាមិនអាស្រ័យទៅលើការហាមឃាត់សិស្សមិនឱ្យប្រើប្រាស់ទូរស័ព្ទនោះទេ ។ លោកយល់ថា ការហាមមិនឱ្យសិស្សប្រើប្រាស់ទូរស័ព្ទដៃ Smart Phone គឺហាក់ដើរបញ្រ្ចាស់ទៅនឹងនិន្នាការពិភពលោក ។
លោកបណ្ឌិតមានប្រសាសន៍បញ្ជាក់ថា អ្វីដែលសំខាន់ គឺវិស័យអប់រំថ្នាក់ក្រោម ដូចជាមតេយ្យសិក្សា បឋមសិក្សា មធ្យមសិក្សា ត្រូវរៀបចំកម្មវិធីឱ្យសមស្របទៅនឹងការវិវឌ្ឍថ្មីៗ ដោយមានន័ថា សិស្សត្រូវទទួលបានការអប់រំប្រកបដោយគុណភាព ទទួលបានការអប់រំពេញមួយថ្ងៃ និងពេញមួយជីវិតរបស់ពួកគេ។
ក្រសួងអប់រំបានធ្វើហើយ គឺបង្កើតថ្នាក់សាលាជំនាន់ថ្មី … នៅសាលាជំនាន់ថ្មី សិស្សត្រូវរៀនពេញមួយថ្ងៃ ហើយសិស្សត្រូវយកទៅជាមួយនូវថេប្លេត ដើម្បីធ្វើកិច្ចការរៀនសូត្រ ដូច្នេះអ្វីដែលក្រសួងអប់រំត្រូវការ គឺការបណ្តុះបណ្តាលបែបឌីជីថល…
លោកបណ្ឌិត យ៉ង់ ពៅ អគ្គលេខាធិការរាជបណ្ឌិតសភាកម្ពុជា
សម្រាប់ជាដំណោះស្រាយបញ្ហាប្រើប្រាស់ទូរស័ព្ទដៃមិនត្រឹមត្រូវរបស់សិស្សនេះវិញ លោកបណ្ឌិត យ៉ង់ ពៅ បានផ្តល់អនុសាសន៍ថា សាលារៀនគួរតែអនុវត្តវិន័យ ពិនិត្យមើលកម្មវិធីសិក្សា ដែលនេះគឺជារឿងសំខាន់ ដោយមិនមែនជាការហាមឃាត់ការប្រើប្រាស់ទូរស័ព្ទ Smart Phone ជារឿងសំខាន់នោះទេ។
សម្រាប់ ឯកឧត្តម រស់ សុវាចា អ្នកនាំពាក្យក្រសួងអប់រំយុវជន និងកីឡា មានប្រសាសន៍ថា បើយោងតាមប្រកាសស្តីពីបទបញ្ជាផ្ទៃក្នុងសម្រាប់គ្រឹះស្ថានមធ្យមសិក្សាចំណេះទូទៅសាធារណៈ ត្រង់ប្រការ៨ ស្តីពីវិន័យ និងសីលធម៌ សិស្សទាំងអស់មិនគប្បី ប្រើប្រាស់ទូរស័ព្ទដៃ ឬលេងហ្គេមក្នុងទូរស័ព្ទដៃក្នុងពេលកំពុងរៀននោះទេ ។ តែយ៉ាងណា ក្រសួងអប់រំ យុវជន និងកីឡា មិនបានហាមការប្រើប្រាស់បច្ចេកវិទ្យា ដែលគាំទ្រដល់ការរៀន និងបង្រៀននោះឡើយ៕
