រាជធានីភ្នំពេញ — កាលពីដើមសប្តាហ៍នេះ ក្រសួងការងារ និង​បណ្តុះបណ្តាលវិជ្ជាជីវៈ បានសម្ពោធដាក់​ឱ្យ​ប្រើប្រាស់​រោងជាងឌីជីថល និងបញ្ញាសិប្បនិម្មិត នៅវិទ្យាស្ថានជាតិពហុបច្ចេកទេសកម្ពុជា (NPIC) ។ រោងជាងឌីជីថល ក្រោមជំនួយ​របស់​ក្រុមហ៊ុន​ចិន Jiangsu Huibo Robotics Technology នេះ គេ​រំពឹងថា នឹងជួយ​ពង្រឹងសមត្ថភាពពលកម្មជំនាញរបស់កម្ពុជា ដើម្បីបង្កើនការទាក់ទាញវិនិយោគិនបរទេសកាន់តែច្រើនឡើង។

ថ្លែងក្នុងពិធីសម្ពោធនោះ ឯកឧត្តម ហេង សួរ រដ្ឋមន្រ្តីក្រសួងការងារ និង​បណ្តុះបណ្តាលវិជ្ជាជីវៈ បានគូសបញ្ជាក់ថា សមិទ្ធផលរោងជាងឌីជីថល និងបញ្ញាសិប្បនិម្មិតនេះ នឹងធ្វើឱ្យយុវជនកម្ពុជា និយាយជារួម និងសិស្ស-និស្សិតដែលសិក្សានៅវិទ្យាស្ថាន NPIC និយាយដោយឡែក កាន់តែមានសមត្ថភាពជំនាញកាន់តែខ្ពស់បន្ថែមទៀត ដែលស្របទៅតាមតម្រូវការទីផ្សារការងារដែលកំពុងសម្បូរបែបក្នុងបរិបទបច្ចេកវិទ្យាទំនើបនាពេលបច្ចុប្បន្ន។ ឯកឧត្តម​បញ្ជាក់ថា ការខិតខំបំពាក់បំប៉នដល់សិស្ស-និស្សិតកម្ពុជានូវជំនាញឌីជីថល និងបញ្ញាសិប្បនិម្មិតនេះដែរ ក៏ជាគន្លឹះសំខាន់មួយក្នុងការបង្កើនការទាក់ទាញវិនិយោគិនពីបរទេសឱ្យមកបណ្ដាក់ទុនវិនិយោគនៅកម្ពុជាផងដែរ។

“ប្រសិនជាគ្មានការរីកចម្រើនផ្នែកធនធានមនុស្សជំនាញបច្ចេកទេសនិងវិជ្ជាជីវៈ និងផលិតភាពនោះទេ កម្ពុជាក៏មិនអាចពង្រីកឧត្តមភាពនៃការប្រកួតប្រជែងជាមួយបណ្ដាប្រទេសនានាក្នុងការទាក់ទាញគម្រោងវិនិយោគថ្មីៗនោះឡើយ”

ឯកឧត្តមរដ្ឋមន្ត្រីសង្កត់ធ្ងន់ថា ការអភិវឌ្ឍធនធានមនុស្ស គឺជានយោបាយសំខាន់មួយរបស់រាជរដ្ឋាភិបាលនីតិកាលទី៧ ក្រោមអាណត្តិដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញគោលនយោបាយអភិវឌ្ឍន៍ធនធានមនុស្ស ក្នុងគោលបំណងធានាឱ្យបានធនធានមនុស្សកាន់តែល្អ ប្រកបដោយគុណភាព និងមានលទ្ធភាពប្រកួតប្រជែងនៅក្នុងទីផ្សារ។

បើតាម ឯកឧត្តម ស៊ុន មេសា អ្នកនាំពាក្យ​ក្រសួងការងារ និង​បណ្តុះបណ្តាលវិជ្ជាជីវៈ សម្រាប់រោងជាងឌីជីថល និង​បញ្ញាសិប្បនិម្មិត នេះ គឺទទួលបានការផ្គត់ផ្គត់ជា​គ្រឿងបរិក្ខាបច្ចេកទេស ​និង​ឧបទេសដ៏ទំនើប​ពីក្រុមហ៊ុនចិន Jiangsu Huibo Robotics Technology ដើម្បីបណ្តុះបណ្តាល​ទៅ​ដល់​សិស្ស​និស្សិត​កម្ពុជា​ឱ្យ​មាន​សមត្ថភាព​កាន់តែខ្ពស់បន្ថែមទៀត។ ឯកឧត្តមបញ្ជាក់ថា គ្រឿង​បរិក្ខា​បច្ចេកទេស ឧបទេស ទាំងនោះ គឺសម្រាប់​ប្រព័ន្ធវៃឆ្លាត ដែល​គេ​ប្រើប្រាស់​នៅក្នុងរោងចក្រ​ទំនើបៗ​នៅលើពិភពលោក ក៏​ដូចជា​រោងចក្រ​ទំនើបៗ​ដែល​គ្រោង​នាំ​មក​កម្ពុជា តាមរយៈ​វិនិយោគិននាពេលខាងមុខផងដែរ។

អ្នកនាំពាក្យ​ក្រសួងការងារបន្ថែមថា បច្ចុប្បន្ននេះ ចិន មានបច្ចេកវិទ្យាដ៏ទំនើប​នៅ​ក្នុង​ប្រតិបត្តិការ​រោងចក្រលឿន រហ័ស ជា​អ្វី​ដែល​យើងនឹង​យក​មក​សម្រាប់​បំពាក់​ជូនសិស្សានុសិស្ស​យើង​ នៅ​សាលា NPIC ដើម្បី​ឱ្យ​ពួកគេ​មានសមត្ថភាពខ្ពស់​បម្រើ​ទៅ​តាម​តម្រូវការ​ទីផ្សារ ដែលមាន​នាពេលបច្ចុប្បន្ន ក៏​ដូចជាដើម្បីទាក់ទាញ​ការវិនិយោគធំៗបន្ថែមទៀត​មក​កាន់កម្ពុជា ដែលធ្វើ​ឱ្យ​តម្លៃកម្លាំងពលកម្មរបស់ពួកគាត់ចេញទៅមានតម្លៃខ្ពស់៕