ឪពុកម្ដាយរាប់លាននាក់ក្នុងប្រទេសចិនងាកមកប្រើ AI Chatbot ដើម្បីបង្រៀនកូន ដោយនិយាយថា វាជួយសន្សំសំចៃពេលវេលា កាត់បន្ថយការចំណាយ និងជួយកាត់បន្ថយជម្លោះអំឡុងពេលធ្វើកិច្ចការផ្ទះ, នេះបើយោងតាម កាសែត VN Express ។

រាល់ពេលដែលគាត់រវល់ លោកស្រី Lu Qijun តែងតែដាក់ទូរស័ព្ទគាត់ នៅលើតុរៀនកូនប្រុសរបស់គាត់ និងបើកកាម៉េរា ហើយបើកកម្មវិធីពិសេសមួយ។ ប្រសិនបើកូនប្រុសរបស់គាត់មិនផ្ដោតអារម្មណ៍លើការរៀន សំឡេងពីក្នុងទូរសព្ទនឹងរំលឹកគាត់ភ្លាមៗ។

សំឡេងនេះមិនមែនជារបស់លោកស្រី Lu ទេ វាគឺជា Dola – AI chatbot ដែលបង្កើតឡើងដោយ ByteDance ដែលជាក្រុមហ៊ុនមេរបស់ TikTok។ យោងតាម QuestMobile មនុស្សប្រហែល ១៧២ លាននាក់នៅក្នុងប្រទេសចិន ប្រើប្រាស់កម្មវិធីនេះ ដើម្បីតាមដាន ឬបង្រៀនកូនៗរបស់ខ្លួន។ សម្រាប់លោកស្រី Lu ភាពទាក់ទាញនៃបច្ចេកវិទ្យានេះ ស្ថិតត្រង់ភាពងាយស្រួល និងប្រសិទ្ធភាពចំណាយរបស់វា។

នៅពេលដែលកំណើនសេដ្ឋកិច្ចរបស់ប្រទេសចិនថយចុះ គ្រួសារជាច្រើនកំពុងវាយតម្លៃឡើងវិញលើការចំណាយលើការអប់រំរបស់កូនៗ។ ការបង្រៀនឯកជន ដែលធ្លាប់តែជារឿងធម្មតាក្នុងចំណោមគ្រួសារក្នុងទីក្រុង ស្ថិតក្នុងវណ្ណៈកណ្ដាលរបស់ចិន បានក្លាយជារឿងមួយ ដែលមានតម្លៃថ្លៃ តម្រូវឱ្យគ្រួសារនីមួយៗបន្ថយការចំណាយ។ ជាមួយនឹងហានិភ័យនៃការកើនឡើង នៃភាពអត់ការងារធ្វើរបស់យុវជន ទោះបីមានការវិនិយោគលើការអប់រំច្រើនឆ្នាំក៏ដោយនោះ ឪពុកម្ដាយចិន បានបង្ខំចិត្តពិចារណាឡើងវិញលើការចំណាយរបស់ខ្លួន។

លោកស្រី Lu បានប្រាប់អ្នកកាសែតនៅក្នុងខេត្តក្វាងទុង ភាគខាងត្បូងប្រទេសចិនថា នាងទុកចិត្តថា វានឹងជួយបំពេញចំណុចខ្វះខាត និងតម្រូវការរបស់កូនប្រុសគាត់។ លោកស្រីយល់ថា បច្ចេកវិទ្យា AI អាចមើលកូនរបស់គាត់ជំនួសគាត់បាន។

ដូឡា អាចជួយបង្រៀនកូនប្រុសខ្ញុំ ជំនួសខ្ញុំបាន!

វាមិនត្រឹមតែជួយពិនិត្យមើលកិច្ចការផ្ទះប៉ុណ្ណោះទេ ថែមទាំងជួយពន្យល់ពីកំហុសឆ្គងយ៉ាងលម្អិត និងផ្ដល់លំហាត់ស្រដៀងគ្នានេះ ដើម្បីពង្រឹងចំណុចខ្វះខាតរបស់កូនប្រុសគាត់ទៀតផង។ ចំពោះលោកស្រី Lu វាបានក្លាយជា «ព្រះគម្ពីរសម្រាប់ឪពុកម្ដាយ – parenting bible» របស់គាត់។ គាត់បន្ថែមថា ឥឡូវនេះ គាត់អាចអានសៀវភៅ ឬឆ្លើយសារបាន ខណៈពេលដែលកូនគាត់កំពុងធ្វើកិច្ចការផ្ទះ។

លោកស្រី Wu Ling ជាគ្រូបង្រៀននៅសាកលវិទ្យាល័យ បានប្រាប់ Rest of World ថា គាត់បានធ្វើឱ្យកូនប្រុសរបស់គាត់ធ្វើលំហាត់ភាសាចិន អង់គ្លេស និងគណិតវិទ្យានៅលើថេប្លេតរៀន AI iFlytek ដែលជាឧបករណ៍ រចនាឡើងសម្រាប់កុមាររៀនដោយឯករាជ្យ។ ថេប្លេតនេះបង្កើតការធ្វើតេស្តផ្ទាល់ខ្លួន និងតាមដានការអនុវត្ត និងមានតម្លៃជាង ១,៥០០ដុល្លារ។ លោកស្រី Wu បានរកឃើញថា វាមានតម្លៃថោកជាងការរៀនដោយផ្ទាល់ក្នុងថ្នាក់រៀន។ លោកស្រី បានសង្កត់ធ្ងន់ថា «យើងអាចរស់នៅដោយគ្មានគ្រូបង្រៀនជាមនុស្ស»។

នៅទីក្រុង Hangzhou ភាគខាងកើត លោកស្រី Tong Mingbo អាយុ ៣១ឆ្នាំ អនុញ្ញាតឱ្យកូនប្រុសអាយុ ៤ឆ្នាំរបស់គាត់ជជែកជាមួយ Doubao ដែលជា chatbot AI ByteDance មួយផ្សេងទៀត នៅពេលដែលគាត់ត្រូវការសម្រាក។

កម្មវិធី Doubao អាចរៀបរាប់រឿងរ៉ាវ ឬលួងលោមកុមារនៅពេលពួកគេយំ ខណៈពេលដែលលោកស្រី Tong ព្រួយបារម្ភអំពីផលប៉ះពាល់ ដែលអាចកើតមាននៃការអភិវឌ្ឍនៃការប៉ះពាល់ AI ។ គាត់យល់ថា chatbot មានប្រយោជន៍នៅពេលដែលគាត់ហត់នឿយពេក មិនអាចថែទាំកូនប្រុសរបស់គាត់បាន។

លោកស្រី Tong បានប្រាប់ Rest of World ថា បើមិនធ្វើដូច្នេះទេ កូនរបស់គាត់ នឹងមិនឱ្យគាត់គេងលក់នោះទេ, អំឡុងពេលដែលកូនគាត់ជជែកលេងជាមួយ Doubao គាត់អាចគេងលក់បាន 20 នាទី។

នៅក្នុងវប្បធម៌ចិន ឪពុកម្ដាយត្រូវបានគេរំពឹងថា ត្រូវចូលរួមយ៉ាងជិតស្និទ្ធក្នុងការអប់រំកូនៗបន្ទាប់ពីពួកគេសិក្សានៅសាលា។ កិច្ចការផ្ទះ និងមេរៀនក្រៅម៉ោងសិក្សា ជារឿយៗត្រូវបានចែករំលែក តាមរយៈការជជែកជាក្រុម ដែលទាមទារឱ្យឪពុកម្ដាយតាមដានព័ត៌មានថ្មីៗ និងរាយការណ៍ទៅគ្រូបង្រៀនអំពីការរីកចម្រើនរបស់កូន។ ចំណុចនេះ អាចនាំឱ្យមានភាពតានតឹងយ៉ាងខ្លាំងសម្រាប់អាណាព្យាបាល ជាពិសេសសម្រាប់គ្រួសារវណ្ណៈកម្មករ នេះបើយោងតាមការកត់សម្គាល់របស់ ABC News។

ឪពុកម្តាយ ដែលកើតក្រោមគោលនយោបាយកូនទោលរបស់ចិន ត្រូវតែទទួលខុសត្រូវក្នុងការថែទាំឪពុកម្តាយវ័យចំណាស់ ការដោះស្រាយសម្ពាធការងារ និងការចិញ្ចឹមកូន ដែលធ្វើឱ្យពួកគាត់ ពិបាកក្នុងការជួយកូនៗលើការរៀបចំកិច្ចការសាលា។

សម្រាប់ឪពុកម្ដាយមួយចំនួន គ្រូបង្រៀន AI អាចជួយបន្ធូរបន្ថយភាពតានតឹងនោះ។ លោកស្រី Wu Yuting ដែលជាម្តាយរបស់កូន ដែលកំពុងសិក្សាកម្រិតបឋមសិក្សា បានទទួលស្គាល់ថា លោកស្រីធ្លាប់មានការខកចិត្ត ខណៈពេលកំពុងបង្រៀនកូនទាំង ២របស់គាត់រៀងរាល់ល្ងាច។

លោកស្រី Wu និយាយថា​ «កូនៗរបស់ខ្ញុំមានអាកប្បកិរិយាល្អពេលនៅជាមួយ AI ជាងពេលនៅជាមួយខ្ញុំ។ ពួកគេគិតថា ខ្ញុំនិយាយច្រើន។» លោកស្រីបានកត់សម្គាល់ឃើញថា AI មានភាពអត់ធ្មត់ និងសំឡេងស្ងប់ជាងសំឡេងមនុស្ស ដែលធ្វើឱ្យឪពុកម្ដាយជាច្រើនចាប់អារម្មណ៍ប្រើបច្ចេកវិទ្យានេះ ដើម្បីជួយបង្រៀនកូនៗជំនួសគាត់ បន្ទាប់ពីមកពីធ្វើការរកស៊ី ហត់នឿយពេញមួយថ្ងៃ៕