កំពត — កាលពីព្រឹកថ្ងៃទី១៨ ខែមិថុនា ឆ្នាំ២០២៥ ស្របនឹងថ្ងៃដ៏មានមហាសិរីមង្គល ឧត្តុងឧត្តមបំផុត ក្នុងឱកាសព្រះរាជពិធីចម្រើនព្រះជន្មាយុ ថ្វាយចំពោះសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សមាគមកាយឫទ្ធិនារីកម្ពុជា បានប្រារព្ធធ្វើពិធីសច្ចាបញ្ចូលសមាជិកថ្មី លើកទី៣៣ ក្រោមអធិបតីរបស់លោកជំទាវបណ្ឌិត ពេជ ចន្ទមុន្និ ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជា ដោយក្នុងនោះក៏បានប្រកាសតែងតាំងលោកជំទាវ ឌិត នីតា ជាប្រធានក្រុមប្រឹក្សាសមាគមកាយឬទ្ធិនារីកម្ពុជាប្រចាំសាខាខេត្តកំពត និងលោកស្រី ក្រង់ ស៊ីថាវី ជាប្រធានក្រុមប្រឹក្សា​សមាគមកាយឬទ្ធិនារីកម្ពុជាសាខាខេត្តសៀមរាប។

ក្នុង​ពិធីប្រកាសបញ្ចូលសមាជិកថ្មី កាយឬទ្ធិនារីកម្ពុជាខេត្តកំពត និងខេត្តសៀមរាប សរុបចំនួន ៣៨៤នាក់ នៅសាលសន្និសីទបូកគោ នៃសាលាខេត្ដកំពត លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានសម្ដែងអំណរគុណយ៉ាងជ្រាលជ្រៅ និងស្វាគមន៍យ៉ាងកក់ក្ដៅចំពោះវត្ដមានរបស់សមាជិកចាស់ និងថ្មីទាំងអស់ ដែលចូលមកពី៧សាខារាជធានី-ខេត្ដ សរុបប្រមាណ ៧៩៦នាក់។ លោកជំទាវបណ្ឌិតមានប្រសាសន៍ថា ការចូលជាសមាជិករបស់សមាគមកាយឫទ្ធិនារីកម្ពុជា គឺជាកម្លាំងស្ម័គ្រចិត្តរួម ដែលផ្ដល់ឱ្យសមាជិកនូវចំណេះដឹង បទពិសោធន៍ទាំងជីវិតការងារ និង លទ្ធភាពធ្វើការរួមគ្នា ដើម្បីផលប្រយោជន៍សង្គម។ លើសពីនេះ កុមារី យុវតី និងសមាជិករបស់សមាគម ត្រូវបានបណ្ដុះបណ្ដាលភាពជាអ្នកដឹកនាំ ធ្វើការងារជាក្រុមក្លាយជាធនធានដ៏ល្អ ជួយអភិវឌ្ឍប្រទេសជាតិ។ មិនតែប៉ុណ្ណោះសមាជិកទាំងអស់ ត្រូវបានជំរុញលើកទឹកចិត្ត ឱ្យ​ក្លាយជាកូនល្អ សិស្សល្អ ពលរដ្ឋល្អ តាមគោលបំណងបេសកកម្ម និងពាក្យស្លោករបស់សមាគម គឺ “កម្លាំងស្ម័គ្រចិត្ត ដើម្បីកុមារីនិងយុវតីកម្ពុជា”។

ជាមួយ​គ្នានេះ ​លោកជំទាវបណ្ឌិត ក៏​បាន​លើកទឹកចិត្តដល់ក្រុមការងារ បន្ថែមការបណ្តុះបណ្តាលទាំងជំទាញទន់ (Soft Skill) និងជំនាញរឹង (Hard Skill) ជូនដល់ក្មួយៗ​ដែលជាសមាជិកាសកម្ម ដោយកុំភ្លេចបន្ថែមនូវសីលធម៌ គុណធម៌ ហើយនិងចរិយាធម៌ ធ្វើយ៉ាងយ៉ាង​​ឱ្យ​ក្មួយៗ​រក្សា​បាននូវអត្តសញ្ញាណជាខ្មែរ។

“…ទោះជា​ពូកែយ៉ាងណា បើ​គ្មានចរិយាធម៌ គ្មានគុណធម៌ គ្មានសីលធម៌នោះទេ គឺគាត់មិនអាច​ក្លាយទៅជាធនធាន​មនុស្សដ៏​ល្អសម្រាប់​ប្រទេស​ជាតិយើងទៅថ្ងៃក្រោយបាននោះទេ”

តបទៅនឹងការទុកចិត្តតែងតាំងប្រគល់ភារកិច្ចដ៏សំខាន់ជាប្រធានក្រុមប្រឹក្សាសមាគមកាយឫទ្ធិនារីកម្ពុជាសាខាខេត្តកំពត លោកជំទាវ ឌិត នីតា បានបង្ហាញ​ការ​ប្តេជ្ញាចិត្ត ក្នុងការ​ដឹកនាំសមាគមកាយឫទ្ធិនារីកម្ពុជាសាខាខេត្តកំពត ឱ្យ​អស់​ពីកម្លាំងកាយ កម្លាំងចិត្ត ប្រាជ្ញាស្មារតី ដើម្បីសម្រេច​ឱ្យ​បាននូវ​ទស្សនវិស័យ និង​បេសកកម្ម​របស់កាយឫទ្ធិនារីកម្ពុជា ដែលចង់ឃើញកុមារី យុវតីកម្ពុជា រស់​នៅ​ក្នុង​សីលធម៌ សេរីភាព សមភាព សេចក្តីថ្លៃថ្នូរ និងមោទនភាព​ចំពោះវប្បធម៌ និង​អត្តសញ្ញាណរបស់ខ្លួន។

សូមជម្រាបថា សមាគមកាយឫទ្ធិនារីកម្ពុជា ត្រូវ​បានបង្កើតឡើងវិញ​ដោយ​សម្តេចព្រះមហាក្សត្រី ព្រះវររាជមាតាជាតិខ្មែរ នៅឆ្នាំ១៩៩៩ ហើយ​គិតត្រឹមឆ្នាំ២០២៥នេះ សមាគមកាយឬទ្ធិនារីកម្ពុជា មានចំនួន៧សាខា ដែលមានសមាជិកាសរុប ៨៤៩៣នាក់ ដោយ​នឹងបន្តពង្រីកឱ្យ​មានសាខាទូទាំង ២៥ រាជធានី-ខេត្ត។

សមាគមកាយឫទ្ធិនារីកម្ពុជា គឺជាសមាគមក្រៅរដ្ឋាភិបាលមួយ ដែលមានទិសដៅលើកកម្ពស់ការអប់រំដល់កុមារី និងយុវតីឲ្យក្លាយទៅជាពលរដ្ឋល្អ ទទួលបាននូវចំណេះដឹងបទពិសោធន៍ទាំងជីវិតការងារ និងការងារសង្គម ដោយបានផ្តល់ឱកាស និងលទ្ធភាព ធ្វើការរួមគ្នា ដើម្បីផលប្រយោជន៍សង្គម។ លើសពីនេះ យុវតី ដែលជាសមាជិករបស់សមាគម ត្រូវបានបណ្ដុះបណ្ដាលភាពជាអ្នកដឹកនាំធ្វើការជាក្រុមដើម្បីក្លាយជាធនធានដ៏ល្អជួយអភិវឌ្ឍប្រទេសជាតិ៕