ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បណ្ណាល័យប្រយុទ្ធប្រឆាំងគ្រឿងញៀន ជាជំនួយរបស់រដ្ឋាភិបាលសាធារណរដ្ឋប្រជាមានិតចិន បានសម្ពោធដាក់ឱ្យប្រើប្រាស់ជាផ្លូវការ នៅបណ្ណាល័យសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ក្នុងបរិវេណវិទ្យាល័យបឹងត្របែក នាព្រឹកថ្ងៃទី២៥ ខែធ្នូ ឆ្នាំ២០២៣។
ឯកឧត្តមនាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន បានអរគុណដល់ភាគីមិត្តចិនដែលផ្តល់អំណោយរៀបចំបាននូវបណ្ណាល័យប្រយុទ្ធប្រឆាំងគ្រឿងញៀនមួយនេះ ស្របពេលដែលរាជរដ្ឋាភិបាលកម្ពុជាកំពុងយកចិត្តទុកដាក់លើបញ្ហាគ្រឿងញៀន។
ឯកឧត្តមនាយឧត្តមសេនីយ៍ មាស វិរិទ្ធ បញ្ជាក់បន្ថែមថា ការងារផ្សព្វផ្សាយអប់រំ ជាការងារអទិភាពដើម្បីបញ្ជូនសារចំណេះដឹងដល់សាធារណជន ពិសេសយុវជន កុំឱ្យធ្លាក់ចូលទៅក្នុងអន្ទាក់នៃគ្រឿងញៀន គឺ “យុវជនល្អមានសមត្ថភាព ប្រទេសអភិវឌ្ឍន៍លឿន”។
លោក ចាង ឈាង (Mr. CHANG JIAN) អនុប្រធានបេសកកម្មនៃស្ថានទូតសាធារណរដ្ឋប្រជាមានិតចិន ប្រចាំកម្ពុជា មានប្រសាសន៍ថា “យុវជនខ្លាំង ប្រទេសខ្លាំង” យើងត្រូវបង្កើនការផ្សព្វផ្សាយអប់រំបង្ការទប់ស្កាត់បញ្ហាគ្រឿងញៀន ដើម្បីឱ្យយុវជនមានការយល់ដឹង និងចៀសផុតពីបញ្ហាគ្រឿងញៀន។
លោក ចាង ឈាង បន្តថា ភាគីចិននឹងបន្តអនុវត្តគោលការណ៍បន្តជួយគ្នាទៅវិញទៅមក នឹងជួយគាំទ្រដល់ការងារប្រយុទ្ធប្រឆាំងគ្រឿងញៀននៃមិត្តភាពគ្រប់ជ្រុងជ្រោយ រវាងរាជរដ្ឋាភិបាលកម្ពុជា និងរដ្ឋាភិបាលចិន ក្នុងទម្រង់មិត្តភាពត្បូងពេជ្រ។
ក្នុងឱកាសនោះ លោក ជួន ជីវិន រដ្ឋលេខាធិការក្រសួងអប់រំ យុវជន និងកីឡា ថ្លែងកោតសសើរ និងអរគុណដល់គ្រប់អ្នកពាក់ព័ន្ធ ពិសេសរដ្ឋាភិបាលសាធារណរដ្ឋប្រជាមានិតចិន ក្នុងការអនុវត្តនៃគោលការណ៍មិត្តភាពគ្រប់ជ្រុងជ្រោយ រវាងរាជរដ្ឋាភិបាលកម្ពុជា និងរដ្ឋាភិបាលចិន។
រដ្ឋលេខាធិការក្រសួងអប់រំ យុវជន និងកីឡា បន្តថា បណ្ណាល័យប្រយុទ្ធប្រឆាំងគ្រឿងញៀននេះ ពិតជាថ្នាលពង្រឹងចំណេះដឹងចូលរួមបង្ការទប់ស្កាត់កាត់បន្ថយបានបញ្ហាគ្រឿងញៀនការពារបាននូវធនធានមនុស្សសម្រាប់ការអភិវឌ្ឍជាតិស្របតាមគោលដៅអភិវឌ្ឍន៍ជាតិកម្ពុជា៕
