អានមិនត្រឹមតែបង្កើននូវគំនិត និងទស្សនៈថ្មីៗបន្ថែមតែប៉ុណ្ណោះទេ ប៉ុន្តែក៏បានរួមចំណែកដល់ការសរសេរ ដោយសារតែនៅក្នុងសំណេរនីមួយៗ មានបង្កប់នូវការប្រើប្រាស់ពាក្យដែលមានភាពខុសប្លែកគ្នា គំនិតខុសគ្នា ហើយការបន្តអនុត្តន៍ការអានបានជាប្រចាំ រួមចំណែកជាវិជ្ជមានដល់ការបណ្តុះទម្លាប់រៀនសូត្រពេញមួយជីវិត ហើយការរៀនសូត្រពេញមួយជីវិត ឱ្យកាន់តែមានប្រសិទ្ធភាពទៅបាន គឺនៅពេលវាក្លាយទៅជាទម្លាប់។

តាមរយៈគេហទំព័រ Readability Tutor បានឱ្យដឹងថា ការអានមិនត្រឹមតែជះឥទ្ធិពលដល់ការសរសេរ និងពង្រឹងទម្លាប់រៀនសូត្រពេញមួយជីវិត ឬការពង្រីកចំណេះដឹងទូទៅនោះទេ ប៉ុន្តែអានជាការកម្សាន្តមួយបែប ដែលរួមចំណែកទៅកាន់សុខភាពផ្លូវចិត្ត ដោយមានលម្អិតបន្ថែមនៅខាងក្រោម ៖

បង្កើនទំនុកចិត្ត និងគុណតម្លៃនៃខ្លួនឯង ៖ លើសការពង្រឹងការសរសេរ និងទម្លាប់រៀនពេញមួយជីវិត ការអានក៏មានឥទ្ធិពលក្នុងការកាត់បន្ថយស្ត្រេស ភាពរហ័សរហួននៃការគិត រក្សាការចងចាំ បង្កើនការយល់ចិត្តអាណិតអាសូរមនុស្សជុំវិញខ្លួន ហើយកាន់តែពិសេសនោះ គឺបង្កើនទំនុកចិត្ត និងគុណតម្លៃចំពោះខ្លួនឯង។ នៅពេលដែលទំនុកចិត្ត និងការស្គាល់គុណតម្លៃរបស់ខ្លួនមានការកើនឡើង នោះនឹងនាំឱ្យការប្រព្រឹត្តប្រចាំថ្ងៃឆ្លើយតបនឹងការអភិវឌ្ឍ ទាំងបុគ្គលិកលក្ខណៈ និងអាជីពវិជ្ជាជីវៈ មានដូចជាមិនខ្លាចរអាក្នុងការសន្ទនាអំពីប្រធានបទចម្រុះ ហ៊ានជួបមនុស្សប្លែកៗ និងបន្តអនុវត្តន៍ទម្លាប់វិជ្ជមានបានទៀងទាត់ប្រចាំថ្ងៃ ហើយរួមចំណែកបណ្តុះសុខុមាលភាពជារួម។

គុណសម្បត្តិនៃការរៀនសូត្រពេញមួយជីវិត ៖ ការអាន ជាសកម្មភាពមួយដែលកើតមានរាប់ទសវត្សរ៍មកហើយ មនុស្សជាច្រើនបានដឹងអំពីអត្ថប្រយោជន៍ពីវា ដែលសកម្មភាពមួយនេះ បាននាំមនុស្សឱ្យមានទំនាក់ទំនងស្និទ្ធស្នាលនឹងគ្នា មានឱកាសស្វែងយល់ពីវប្បធម៌ផ្ទុយគ្នា និងការបើកចិត្តរៀនសូត្រពីគ្នាទៅវិញទៅមក ក៏ដូចជាការស្វែងរកគំនិតបំផុសថ្មីៗ ការស្រូបយកចំណេះដឹងបន្ថែម និងជំរុញភាពច្នៃប្រតិដ្ឋក្នុងការប្រកបកិច្ចការងារ និងការប្រាស្រ័យទាក់ទង។

ការអានមានឥទ្ធិពលដល់ការសរសេរ ៖ តាមរយៈ Routledge បានឱ្យដឹងថា ការអានមានឥទ្ធិពលដល់ការសររសរ ហើយការសរសេរនៅត្រង់ចំណុចនេះសំដៅលើការសរសេរជាទូទៅ មិនថាកំណត់ហេតុ អត្ថបទផ្ទាល់ខ្លួន ឬក៏បែបអាជីពនោះទេ! ការអានបន្ថែមបានរួមចំណែកក្នុងការបន្ធូរកម្លាំង ឬក៏ពេលវេលាក្នុងការសរសេរ ដែលជាហេតុអ្នកចូលចិត្តសរសេរ តែងបន្សាំខ្លួនជាមួយនឹងការអានដូចគ្នា! ជាមួយគ្នានេះ អានបានទទួលនូវវិធីសាស្រ្ត ឬក៏រចនាបទក្នុងការសរសេរ ភាពចម្រុះក្នុងការសរសេរ និងការប្រើប្រាស់ពាក្យថ្មីៗ៕