ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – យោងតាមរបាយការណ៍របស់អង្គការសុខភាពពិភពលោក (WHO) ចំនួនអ្នកកើតជំងឺគ្រោះថ្នាក់សរសៃឈាមខួរក្បាលក្នុងមួយឆ្នាំៗ មានចំនួនប្រហែល ១៥លាននាក់ ហើយក្នុងនោះមាន ៥លាននាក់អាចប្រឈមដល់អាយុជីវិតបាន ។ មធ្យោបាយប្រសើរបំផុតតែមួយគត់ដែលអាចជួយសង្គ្រោះសុខភាពបញ្ជៀសពីជំងឺគ្រោះថ្នាក់សរសៃឈាមខួរក្បាល គឺគ្រប់គ្នាត្រូវដឹងពីរោគសញ្ញានៃជំងឺ និងឆាប់បញ្ជូនអ្នកជំងឺមកកាន់មន្ទីរពេទ្យឱ្យបានលឿនបំផុត ដើម្បីជួយសង្គ្រោះទាន់ពេលវេលា ។ នេះបើតាមការផ្សព្វផ្សាយរបស់មន្ទីរពេទ្យកាល់ម៉ែត នៅដើមខែធ្នូ ឆ្នាំ២០២៣នេះ ។
រោគសញ្ញានៃជំងឺគ្រោះថ្នាក់សរសៃឈាមខួរក្បាល មានដូចជា ពិបាកនិយាយភ្លាមៗ រឺនិយាយមិនបាន, ទន់ដៃ ទន់ជើង ទន់មួយចំហៀងភ្លាមៗ (ឬហៅថាស្លាប់មួយចំហៀងខ្លួន), និងវៀចមុខភ្លាមៗ ជាដើម ។ មន្ទីរពេទ្យកាល់ម៉ែតបានបញ្ជាក់បន្ថែមថា ប្រសិនបើអ្នកជំងឺបានមកដល់មន្ទីរពេទ្យក្នុងថេរៈវេលា ៤ម៉ោងដំបូងក្នុងករណីស្ទះសរសៃឈាមខួរក្បាល អ្នកជំងឺអាចទទួលបានការព្យាបាលដោយឱសថទំនើបចុងក្រោយ (Thrombolysis) ដែលអាចរំលាយដុំកំណកឈាមនោះបាន (ប៉ុន្តែការប្រើប្រាស់ឱសថនេះមានប្រសិទ្ធភាពខ្ពស់ ប្រសិនបើអ្នកជំងឺមិនមានកត្តារំខានផ្សេងៗទៀតចំពោះការប្រើប្រាស់ថ្នាំនេះ) ។
ការចុះផ្សាយរបស់មន្ទីរពេទ្យបានឱ្យដឹងទៀតថា ការយឺតយ៉ាវក្នុងការព្យាបាល ជំងឺគ្រោះថ្នាក់សរសៃឈាមខួរក្បាលអាចឱ្យអ្នកជំងឺធ្លាក់ខ្លួនពិការ ដែលជាការខាតបង់ធំធេងចំពោះខ្លួនឯង គ្រួសារ សង្គមជាតិទាំងមូល ។
ស្របគ្នានេះ ស្តង់ដារសាកលសម្រាប់ការថែទាំ និងការព្យាបាលដែលមានប្រសិទ្ធិភាព និងសុវត្ថិភាពខ្ពស់បំផុត គឺគ្រប់អ្នកជំងឺគ្រោះថ្នាក់សរសៃឈាមខួរក្បាល ត្រូវតែបានទទួលការព្យាបាលនៅក្នុងបន្ទប់ព្យាបាលបន្ទាន់នៃជំងឺគ្រោះថ្នាក់សរសៃឈាមខួរក្បាល (Stroke Unit) ដែលមានគ្រប់ផ្នែកជំនាញឯកទេសពាក់ព័ន្ធ ដូចជា ខាងសង្គ្រោះបន្ទាន់ ខាងរូបភាពវេជ្ជសាស្រ្ត ខាងប្រសាទសាស្រ្ត សរសៃឈាមខួរក្បាល ខាងវះកាត់ប្រព័ន្ធប្រសាទ និងខាងព្យាបាលដោយចលនា។ នេះបើតាមមន្ទីរពេទ្យកាល់ម៉ែត ។
គួរបញ្ជាក់ថា ប្រសិនបើអ្នកជំងឺមានរោគសញ្ញាជំងឺគ្រោះថ្នាក់សរសៃឈាមខួរក្បាល (Stroke) ដូចខាងលើ គួរអញ្ជើញមកកាន់មន្ទីរពេទ្យជាបន្ទាន់ នៅផ្នែកថែទាំ និងព្យាបាលជំនាញជំងឺស្ទះសរសៃឈាមខួរក្បាល ឬ Stroke Unit នៃមន្ទីរពេទ្យកាល់ម៉ែត ដែលអាចកាត់បន្ថយពិការភាព និងការកាត់បន្ថយកត្តាប្រឈមអាយុជីវិតដោយសារជំងឺគ្រោះថ្នាក់សរសៃឈាមខួរក្បាលនេះ ៕
