ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តើឧត្តមានុវត្តសម្រាប់យុវជននៅក្នុងសង្គមបច្ចុប្បន្នមានអ្វីខ្លះ? នៅក្នុងកិច្ចពិភាក្សាយុវជន ដែលធ្វើឡើងដើម្បីអបអរទិវាអន្តរជាតិសម្រាប់យុវជន កាលពីថ្ងៃទី៧ សីហា វាគ្មិនដែលសុទ្ធសឹងតែជាយុវជនមានបទពិសោធន៍ល្អនៅក្នុងសង្គម បានលើកឡើងថា ឧត្តមានុវត្តសម្រាប់យុវជន គឺផ្ដើមចេញពីការមានទំនុកចិត្តលើខ្លួនឯង ចំណេះដឹង សកម្មភាពជួយសង្គម និងសុខភាពផ្លូវចិត្តរឹងមាំ។
កញ្ញា ឡូយ ច័ន្ទរស្មី និស្សិតសាកលវិទ្យាល័យ BINUS និងជាអតីតប្រតិភូយុវជនកម្ពុជា កម្មវិធី JENESYS 2023 និយាយថា ការអនុវត្តល្អមួយ គឺចាប់ផ្ដើមចេញពីការមានទំនុកចិត្តលើខ្លួនឯង ទាមទារឱ្យមនុស្សមានចំណេះដឹង ចូលរួមសកម្មភាពជួយសង្គម និងត្រូវមានសុខភាពផ្លូវចិត្តល្អ។ កញ្ញាបន្តថា នៅពេលយុវជនអាចបន្តការសិក្សានៅបរទេស នោះនឹងទទួលបានការយល់ដឹងជាសកល តាមរយៈការជួបនិស្សិតមកពីបណ្ដាប្រទេសផ្សេងៗដែលការរស់នៅមានលក្ខណៈគ្រួសារ ចេះស្រឡាញ់រាប់អានគ្នា។ ទន្ទឹមគ្នានេះ យើងក៏អាចពាំនាំវប្បធម៌ និងអរិយធម៌ខ្មែរ យកទៅបង្ហាញឱ្យបរទេសបានស្គាល់ផងដែរ។
ទាក់ទងជាមួយការអប់រំ លោក ភាព សុភ័ក ជាអ្នកនិពន្ធ មានប្រសាសន៍ថា ដើម្បីជួយឱ្យការសិក្សារបស់យុវជនទទួលបានជោគជ័យ ចំណុចសំខាន់បំផុត គឺទម្លាប់ក្នុងការរៀនរបស់សិស្សម្នាក់ៗ។ ប្រសិនបើសិស្សមានទម្លាប់រៀនបានល្អជារៀងរាល់ថ្ងៃនោះនឹងទទួលបានលទ្ធផលសិក្សាល្អ។ ដូច្នេះ សិស្សានុសិស្សត្រូវមានទម្លាប់រៀនល្អចាប់ពីថ្ងៃនេះទៅ ដើម្បីផ្លាស់ប្ដូរលទ្ធផលសិក្សារបស់ខ្លួន ជាពិសេសសិស្សដែលជាបេក្ខជនប្រឡងបាក់ឌុបខាងមុខនេះ។
ជាមួយគ្នានេះ កញ្ញា វីរៈ សុខអ៊ីម ជាយុវជនស្ម័គ្រចិត្តនៃកម្មវិធីស្ម័គ្រចិត្តដើម្បីសហគមន៍ខ្ញុំ លើកឡើងដែរថា សម្រាប់កញ្ញាការជួយអ្នកដទៃប្រៀបដូចជាការជួយខ្លួនឯងដែរ។ ទន្ទឹមគ្នានេះ ប្រសិនយុវជនមានគំនិតផ្ដួចផ្ដើមចង់ធ្វើអ្វីមួយ ហើយបើសិនរឿងនោះជារឿងល្អ គឺអាចសហការគ្នាធ្វើជាក្រុមបាន។ ការធ្វើបែបនេះ ជាកម្លាំងចិត្តដ៏ធំមួយដែលយើងអាចចូលរួមការងារស្ម័គ្រចិត្តជួយសហគមន៍បានផងដែរ។
ចំណែក កញ្ញា រិទ្ធី លំអរកេសរ ជាសិល្បៈករ ក៏បានលើកទឹកចិត្តយុវជនដែលធ្លាប់ជួបបញ្ហាប៉ះពាល់អារម្មណ៍ ពិបាកចិត្ត អាចក្រឡេកមកមើលទម្លាប់ខ្លួនឯងឡើងវិញ ។ សម្រាប់កញ្ញាផ្ទាល់ការមានទម្លាប់គេង ទម្លាប់ញ៉ាំបានល្អ អាចជួយឱ្យជីវិតប្រសើរឡើង។ ទន្ទឹមគ្នានេះ មួយថ្ងៃត្រូវធ្វើឱ្យខ្លួនឯងឱ្យមានចលនា យ៉ាងហោចណាស់ ៣០នាទី ដូចជា លេងកីឡាមួយណាដែលចូលចិត្ត ដូចជា លេងសី ហែលទឹក ទាត់បាល់ ដែលអាចជួយឱ្យខ្លួនឯងជៀសឆ្ងាយពីការទោរទន់ជាមួយអារម្មណ៍ខ្លួនឯង ឬប្រឈមមុខជាមួយការបាក់ទឹកចិត្ត។
កញ្ញា រិទ្ធី លំអរកេសរ បន្ថែមថា បើសិនយុវជនធ្វើអ្វីមួយមិនសមបំណង អាចអនុញ្ញាតិឱ្យខ្លួនឯងខកចិត្ត ឬអន់ចិត្តបាន ប៉ុន្តែកុំបន្ទោសខ្លួនឯង។ ទន្ទឹមគ្នានេះ ប្រសិនជាមានអារម្មណ៍ធុញថប់ បាក់ទឹកចិត្ត ឬមិនមានជំនឿជឿជាក់លើខ្លួនឯង សូមកុំខ្លាចក្នុងការរកជំនួយ ហើយត្រូវព្យាយាមស្វែងយល់ពីអារម្មណ៍របស់ខ្លួនឱ្យបានច្បាស់ ហើយបង្ហាញអារម្មណ៍នោះទៅមនុស្សដែលទុកចិត្ត ឬតាមរយៈការសរសេរ។ ប្រសិនអនុវត្តវិធីទាំងនេះមិនមានប្រសិទ្ធភាព នោះយុវជនក៏អាចទៅជួបអ្នកជំនាញប្រឹក្សាយោបល់ផ្នែកផ្លូវចិត្ត។
គួរជម្រាបជូនថា កិច្ចពិភាក្សាយុវជន ស្ដីពី “ឧត្តមានុវត្តសម្រាប់យុវជនក្នុងសង្គមបច្ចុប្បន្ន” ធ្វើឡើងដើម្បីអបអរសាទរទិវាអន្តរជាតិសម្រាប់យុវជន ១២ សីហា ឆ្នាំ២០២៤ ក្រោមមូលបទ ៖” នវានុវត្តន៍ផ្នែកឌីជីថលរបស់យុវជនសម្រាប់ការអភិវឌ្ឍប្រកបដោយចីរភាព”៕
