ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅសល់តែមួយខែទៀតប៉ុណ្ណោះ ថ្ងៃប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នឹងមកដល់ហើយ ដែលទាមទារឱ្យសិស្សានុសិស្សចាំបាច់ក្នុងការត្រៀមខ្លួនឱ្យបានរួចរាល់ដើម្បីបញ្ចេញសមត្ថភាពក្នុងការប្រឡងបញ្ចប់ថ្នាក់វិទ្យាល័យ។ ទន្ទឹមគ្នានេះ អតីតសិស្សនិទ្ទេសA មួយក្រុម បានប្រកាសពីការស្ម័គ្រចិត្តបង្រៀនថ្នាក់ត្រៀមបាក់ឌុបឥតគិតថ្លៃ ដើម្បីជួយដល់បេក្ខជន ក្នុងការទទួលបាននិទ្ទេសល្អក្នុងការប្រឡងនាពេលខាងមុខ។
ថ្នាក់ត្រៀមបាក់ឌុបនេះ មានបង្រៀនលើវិញ្ញាសាដូចជា គណិតវិទ្យា រូបវិទ្យា គីមីវិទ្យា ជីវវិទ្យា ភាសាខ្មែរដោយអតីតសិស្សនិន្ទេសA ឆ្នាំ២០២៣ និង២០២៤ ដែលបច្ចុប្បនពួកគេកំពុងសិស្សានៅសាកលវិទ្យាល័យខេមតិច។
កញ្ញា ឃីន ស៊ីយ៉ា ជានិស្សិតឆ្នាំទី២ ជំនាញស្ថាបត្យកម្ម នៃសាកលវិទ្យាល័យខេមតិច និងជាតំណាងថ្នាក់ត្រៀមបាក់ឌុប បានឱ្យដឹងថា កម្មវិធីត្រៀមបាក់ឌុប បង្កើតឡើងជាពិសេសសម្រាប់ប្អូនៗសិស្សានុសិស្សដែលត្រៀមប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ដោយមានការបង្រៀនធ្វើវិញ្ញាសាត្រៀមបាក់ឌុបគ្រប់មុខវិជ្ជា ក៏ដូចជាចែករំលែកបទពិសោធន៍ក្នុងការត្រៀមខ្លួនមុនប្រឡង និងអំឡុងពេលប្រឡងបាក់ឌុប។
ស៊ីយ៉ា បន្ថែមថា នៅសល់ពេលមួយខែ ប្អូនៗត្រៀមបាក់ឌុបអាចមានអារម្មណ៍ភ័យមិនដឹងថា ត្រូវធ្វើអ្វី គឺពួកគាត់អាចមករៀននៅថ្នាក់ត្រៀមបាក់ឌុបបាន ដើម្បីអាចដឹងពីគន្លឹះផ្សេងៗដែលសិស្សច្បងធ្លាប់ធ្វើ ហើយអាចយកទៅអនុវត្តតាម។ លើសពីនេះ សិស្សច្បងទាំងអស់អាចជួយស្រាយរាល់ចង្ងល់ដែលប្អូនៗមិនទាន់ច្បាស់ក្នុងមេរៀនផងដែរ។
កញ្ញា ឃីន ស៊ីយ៉ា បញ្ជាក់ថា បើទោះជាក្រុមរបស់ខ្លួនជានិស្សិតរៀននៅសាកលវិទ្យាល័យហើយក៏ពិតមែន ប៉ុន្តែក៏ត្រូវគិតដល់ប្អូនៗដែលកំពុងនៅថ្នាក់វិទ្យាល័យដែរ។ ស៊ីយ៉ា រំពឹងថា ប្អូនៗថ្នាក់ទី១២ នឹងបានចូលរៀនក្នុងថ្នាក់ត្រៀមបាក់ឌុបនេះច្រើន ក៏ដូចជាការបង្រៀននេះអាចជួយឱ្យប្អូនៗប្រឡងបាក់ឌុបជាប់បានច្រើន និងទទួលបាននិទ្ទេសល្អផងដែរ។
បើតាមកញ្ញា ស៊ីយ៉ា ការបង្រៀនត្រៀមបាក់ឌុបនេះ ក្រុមរបស់ខ្លួននឹងបង្រៀន រយៈពេលពេញមួយខែកក្កដា នៅសាកលវិទ្យាល័យខេមតិច ដូច្នេះសម្រាប់ប្អូនៗជាសិស្សកំពុងរៀនថ្នាក់ទី១២ ដែលចង់ចូលរួម អាចចុះឈ្មោះឥឡូវនេះតាមរយៈតំណភ្ជាប់ https://forms.gle/wg89WdKxiZrKjkTL9 ៕
