ការគេងមិនលក់នៅពេលយប់ មិនមែនបណ្តាលមកតែពីជាតិកាហ្វេអ៊ីនក្នុងកាហ្វេ ឬតែប៉ុណ្ណោះទេ, យោងតាមអ្នកជំនាញផ្នែកអាហារូបត្ថម្ភ អាហារដែលអ្នកទទួលទានមុនពេលចូលគេងដើរតួនាទីយ៉ាងសំខាន់ក្នុងការកំណត់គុណភាពនៃដំណេករបស់អ្នក។ ខាងក្រោមនេះ គឺជា​អាហារ៧ប្រភេទ ដែលអ្នកគួរចៀសវាងបរិភោគនៅមុនពេលចូលគេង។

១. ភីហ្សា (Pizza)

ភីហ្សាគឺជាអាហារដែលមានជាតិខ្លាញ់ឆ្អែត (Saturated Fat) និងជាតិសូដ្យូមខ្ពស់។ អាហារដែលឆ្លងកាត់ការកែច្នៃខ្លាំងបែបនេះ ធ្វើឱ្យប្រព័ន្ធរំលាយអាហារធ្វើការធ្ងន់ និងអាចធ្វើឱ្យអ្នកភ្ញាក់កណ្តាលអធ្រាត្រដោយសារការស្រេកទឹក។

២. ទឹកក្រឡុក (Smoothies)

ទោះបីជាមើលទៅដូចជាអាហារសុខភាព ព្រោះមានផ្លែឈើច្រើនកិនបញ្ចូលគ្នា ប៉ុន្តែទឹកក្រឡុកមានផ្ទុកជាតិស្ករខ្ពស់។ ជាតិស្ករចម្រាញ់ធ្វើឱ្យកម្រិតជាតិស្ករក្នុងឈាមឡើងចុះលឿន ដែលជំរុញឱ្យរាងកាយបញ្ចេញជាតិអាដ្រេណាលីន (Adrenaline) ធ្វើឱ្យពិបាកក្នុងការគេង។

៣. ឈីស (Cheese)

ឈីសអាចបណ្តាលឱ្យមានសុបិនអាក្រក់ចំពោះមនុស្សមួយចំនួន។ លើសពីនេះ បើអ្នកមានបញ្ហាមិនបំបែកជាតិឡាក់តូស (Lactose Intolerant) ការញ៉ាំឈីសមុនចូលគេងនឹងធ្វើឱ្យពោះវៀនមានបញ្ហា រំខានដល់ការសម្រាក។

៤. ប៉េងប៉ោះ (Tomatoes)

ទោះបីជាវាសម្បូរវីតាមីន C ក៏ដោយ ប៉ុន្តែប៉េងប៉ោះមានជាតិអាស៊ីតខ្ពស់។ វាអាចបណ្តាលឱ្យមានអាការៈក្រហាយទ្រូង និងច្រាលអាស៊ីត (Acid Reflux) ជាពិសេសនៅពេលអ្នកគេងរាបស្មើ។

៥. ទឹកជ្រលក់ហឹរ (Hot Sauce)

អាហារហឹរគឺជាសត្រូវដ៏ធំនៃដំណេក ព្រោះវាបង្កឱ្យមានការច្រាលអាស៊ីត។ អ្នកជំនាញណែនាំឱ្យញ៉ាំអាហារហឹរយ៉ាងហោចណាស់ ៣ ម៉ោងមុនពេលចូលគេង ដើម្បីឱ្យរាងកាយមានពេលរំលាយអាហារបានសព្វគ្រប់។

៦. ទឹក (Water)

ការផ្តល់ជាតិទឹកដល់រាងកាយជារឿងល្អ ប៉ុន្តែការញ៉ាំទឹកច្រើនពេកមុនពេលចូលគេង នឹងបង្ខំឱ្យអ្នកក្រោកឡើងទៅបន្ទប់ទឹកញឹកញាប់ ដែលធ្វើឱ្យដាច់ដំណេក និងមានអារម្មណ៍អស់កម្លាំងនៅព្រឹកបន្ទាប់។

៧. គ្រឿងស្រវឹង (Alcohol)

មនុស្សជាច្រើនយល់ថាគ្រឿងស្រវឹងជួយឱ្យងងុយគេងលឿន ប៉ុន្តែវានឹងកាត់បន្ថយគុណភាពនៃដំណេក (ដំណាក់កាលគេងលក់ស្កប់)។ វាក៏ធ្វើឱ្យសាច់ដុំបំពង់កសម្រាកខ្លាំងពេក ដែលនាំឱ្យមានការស្រមុកខ្លាំងពេលគេង។

យ៉ាងណាក៏ដោយ ជាដំបូន្មានរបស់អ្នកជំនាញ ប្រសិនបើអ្នកមានអារម្មណ៍ឃ្លានមុនពេលចូលគេង គួរជ្រើសរើសអាហារសម្រន់ស្រាលៗដូចជា ចេកជាមួយយ៉ាអួរ ឬ នំបុ័ងធញ្ញជាតិជាមួយប៊ឺសណ្តែកដី ព្រោះវាជួយរក្សាកម្រិតជាតិស្ករក្នុងឈាមឱ្យមានស្ថេរភាព និងជួយឱ្យគេងលក់បានស្កប់ស្កល់ជាងមុន៕