សៀមរាប – សិស្សានុសិស្ស​នៃវិទ្យាល័យ​បាគង ប្រមាណជា​២រយនាក់ កាលពីសប្តាហ៍​កន្លងទៅនេះ បាន​ទទួល​នូវ​ការ​តម្រង់ទិសក្នុង​ការ​ជ្រើសរើស​ជំនាញ​សិក្សា​ក្រោយ​បញ្ចប់ថ្នាក់វិទ្យាល័យ ព្រមជាមួយ​នឹង​ការ​ជំរុញការអាន​ តាមរយៈ​កិច្ច​ពិភាក្សាដំណើរជីវិត ដោយ​មានការចូលរួមចែករំលែកពី ឯកឧត្តម វ៉េង សិរីវុឌ្ឍ អតីតរដ្ឋមន្រ្តីក្រសួងទេសចរណ៍, លោក ឡាំ ឡាយ ស្ថាបនិក អំណានយុវជន និង​ អៀង សៀកឡេង ម្ចាស់ទំព័រ Light Up Your Light ។

លោក ឡាំ ឡាយ ស្ថាបនិកអំណានយុវជន បានលើក​ឡើងថា កិច្ចពិភាក្សាដំណើរជីវិត និងការជ្រើសរើសជំនាញសិក្សានៅមហាវិទ្យាល័យ ត្រូវ​បាន​បង្កើតឡើងដើម្បីជាការ​តម្រង់ទិសសិស្សនៅវិទ្យាល័យបាគង ឱ្យកាន់តែសម្រួចខ្លួនឯង ដើម្បីត្រៀមខ្លួនជ្រើសរើសជំនាញសិក្សានាថ្ងៃអនាគត ពិសេស គឺផ្ដល់ជូននូវការឈ្វេងយល់បន្ថែមអំពីខ្លួនឯងឱ្យកាន់តែច្បាស់ថា ពួកគាត់ គឺជាអ្នកបន្តវេន ជៀសវាងខាតពេល លើការជ្រើសរើសជំនាញខុស ឬសម្រេចចិត្តខុស។

ជាមួយគ្នានេះដែរ នៅក្នុង​កិច្ច​ពិភាក្សា​នោះ ក៏​មាន​បញ្ចូលការ​ជំរុញ​ការអាន​ទៅ​ដល់សិស្សានុសិស្ស ដោយ​លោក ឡាំ ឡាយ លើក​ឡើងថា ការអានក៏ជាចំណែកសំខាន់ដែលក្រុមអំណានយុវជន តែងតែចាត់ទុកជាអាទិភាពក្នុងការតឿន ឬលើកទឹកចិត្តសិស្សឱ្យប្រឹងអាន ។ ក្នុងនោះ​លោក​ក៏​មើលឃើញដែរថា ការ​អានរបស់យុវជន​នៅ​មានដំណើរយឺត ដោយ​ទាមទារ​ឱ្យ​មានការ​ជំរុញបន្ថែម​។

លោក ឡាំ ឡាយ

“ខ្ញុំសង្កេតឃើញថា ការអាន នៅតែដើរយឺត ពោល គឺអានតាមដំណើរ ដោយខ្វះខាតបច្ចេកទេស ការជំរុញ សម្ភារៈ សៀវភៅ និងពិសេសគឺការដឹកនាំ ផ្ដួចផ្ដើមគំនិត បង្កើតក្រុមការងារ ដើម្បីជំរុញការអានឱ្យមានប្រសិទ្ធភាព នេះបើនិយាយតែវិទ្យាល័យបាគង”

ស្ថាបនិក អំណានយុវជន រំលេចបន្ថែមថា  បើនិយាយជារួមអំពីខេត្តសៀមរាបវិញ គឺការអានមានសន្ទុះ ប្រសិនជាធៀបនឹងកាលប្រមាណ៤ឆ្នាំមុន។ ក្នុងនោះក្រុមរបស់​លោកក៏​បាន​ចូលរួម​ក្នុង​ការបង្កើតបណ្ណាល័យចល័ត បណ្ណាល័យភូមិ បង្កើតទម្លាប់អានថ្ងៃអាទិត្យ បង្កើតវេទិកាពិភាក្សា បង្កើតក្រុមការងារបណ្ដុះបណ្ដាល និងការពិព័រណ៌សៀវភៅជាដើម ដើម្បីជាការជំរុញការអាន។ មិនតែប៉ុណ្ណោះ ហាងកាហ្វេខ្លះ ឬស្ថាប័នខ្លះ ក៏​មានទំនោរលើការបង្កើតបណ្ណាល័យតូចៗ ដើម្បីជំរុញការអាន ទៅកាន់មហាជន និងបុគ្គលិកខ្លួនផងដែរ។

លោក ឡាំ ឡាយ

“បើទោះបីជាសន្ទុះបានកើនឡើង ក៏ប៉ុន្តែសន្ទុះនេះ ពុំមែនបានសេចក្ដីថា ល្អទាំងស្រុងឡើយ ប្រសិនបើមានសន្ទុះត្រឹមតែមួយចម្អិនកំពិសវិញ (រយៈពេលខ្លី) ក៏មិនហៅថា វប្បធម៌អានប្រសើរឡើងដែរ គឺត្រូវការវប្បធម៌អានជាប្រចាំតែម្ដង”

ស្ថាបនិក អំណានយុវជន បញ្ជាក់ថា ក្រុមការងារនឹងនៅតែបន្តបេសកកម្មខ្លួនជាមួយនឹងយុវជនខ្មែរ ផ្ដល់ជូនការអានប្រកបដោយការពិចារណាបែបស៊ីជម្រៅជាយានសម្រាប់ការជ្រើសរើសរបៀបរស់នៅ របៀបសម្រេចចិត្ត របៀបនៃការឆ្លើយតបជាមួយនឹងបញ្ហាតាមរយៈវេទិកាអំណាន វេទិកាចែករំលែកបទពិសោធន៍ វេទិកាតម្រង់ទិស និងចែកសៀវភៅអំណានជាអំណាចជូនមហាជនទូទាំងប្រទេស។ ហើយអ្វីដែលនឹងធ្វើឱ្យក្រុមអំណានយុវជន កាន់តែរីករាយនោះ គឺការចូលរួមគាំទ្រពីសំណាក់បងប្អូននានា ដើម្បីធ្វើឱ្យកិច្ចការងារមួយនេះ កាន់តែសាយភាយនិងមានប្រសិទ្ធភាព។

គួរជម្រាបជូនថា ក្រុមអំណានយុវជន បង្កើតដើមឆ្នាំ ២០១៧ ជំរុញសកម្មភាពអំណាននៅជុំវិញរាជធានីខេត្តទៅកាន់យុវជនកម្ពុជាតាមរយៈការ ផ្ដល់ជូនវេទិកាបណ្ដុះបណ្ដាល, ជាសារសំឡេង ឬសំឡេងអំណានទៅកាន់យុវជនកម្ពុជា, មានវេទិកាជំនួបអ្នកអាន និងអ្នកនិពន្ធ, ការស្រាវជ្រាវ និងការបណ្ដុះបណ្ដាលក្នុងវិស័យអំណាន និងរៀបចំជាវេទិការវាងអ្នកនិពន្ធ និងអ្នកអានដើម្បីផ្សព្វផ្សាយស្នាដៃថ្មីៗជាដើម៕