កម្មវិធី Bag to School ឬគម្រោង ‘ទៅរៀនដើម្បីអនាគតខ្ញុំ’ បានរៀបចំជាថ្មីម្តងទៀត កាលពីចុងខែកក្កដា កន្លងទៅនេះ នៅ​ភូមិ​កំពង់គោក្រោម ឃុំ​កំពង់គោ ស្រុកកំពង់ស្វាយ ខេត្តកំពង់ធំ ដែលរៀបចំ​ឡើង​ដោយ​សភាយុវពាណិជ្ជករ​កម្ពុជា​សាខាភ្នំពេញ។

កម្មវិធីនោះ ដឹកនាំដោយកញ្ញា ឈួន ឈុនលី ជាប្រធានគម្រោង នឹងចូលរួមដោយលោកស្រី ងួន លីដា ជាប្រធានថ្នាក់តំបន់ សហការជាមួយនឹងអនុប្រធាននៃJCI Marina ប្រទេសសាំងហ្គាពួរ Mr John YEO និងប្រធានថ្នាក់តំបន់នៃJCI South Saigon Mr Hieu Doan ព្រមទាំងការចូលរួមពីម្ចាស់ឧបត្ថម្ភ សប្បុរសជននានាគ្រប់ស្រទាប់វណ្ណៈនិងគ្រប់មជ្ឈដ្ឋានទាំងអស់។ 

គួរ​បញ្ជាក់ថា គោលបំណងធំរបស់ Bag to school គឺដើម្បីចូលរួមកាត់បន្ថយអាត្រាបោះបង់ការសិក្សារបស់សិស្សានុស្សនៅតំបន់ដាច់ស្រយាល ព្រមទាំងអប់រំជំរុញលើកទឹកចិត្តអាណាព្យាបាលឱ្យយល់កាន់តែច្បាស់ពីសារៈសំខាន់នៃការសិក្សាសម្រាប់អនាគតកូនៗនិង សង្គមជាតិនាថ្ងៃអនាគត។

ដោយឡែកគម្រោង ‘ទៅរៀនដើម្បីអនាគតខ្ញុំ’ ២០២៣ បានធ្វើការចែកសម្ភារៈសិក្សាម្នាក់មួយកញ្ចប់និងទឹកដោះគោម្នាក់មួយកេសជូនទៅដល់សិស្សានុសិស្សសរុប ៦០០នាក់ ដែលមកពីសាលាចំនួនពីររួមគ្នាគឺ សាលាបឋមសិក្សា កំពង់គោក្រោម និងសាលាបឋមសិក្សា កោះគ្របបាយ រួមទាំងមានសកម្មភាពសប្បាយៗជាច្រើនទៀតជាមួយសិស្សានុសិស្ស ។

មិនតែប៉ុណ្ណោះ Bag to school ក៏បានធ្វើការជំនួបសំណេះសំណាលជាមួយ លោកគ្រូ អ្នកគ្រូ និង អាណាព្យាបាលសរុប ១៩០រូប រួមទាំងមានវត្តមានការចូលរួមពីអនុប្រធានប្រតិបត្តិថ្នាក់ជាតិដែលជាតំណាងប្រធានថ្នាក់ជាតិ នៃសភាយុវពាណិជ្ជករអន្តរជាតិកម្ពុជា លោក លី ឧត្តម និង លោក អឹម វ៉ាន់នីដែលជាតំណាងមន្ទីរ អប់រំយុវជន និងកីឡា ខេត្តកំពង់ធំ លោកមេឃុំកពង់គោ សន ប៊ុនស លោក ចក អេង នាយកសាលាបឋមសិក្សាកំពង់គោក្រោម និង លោក ខេង គា នាយកសាលាបឋមសិក្សាកោះគ្របបាយ ផងដែរ ។

ក្រុមការងាររបស់សភាយុវពាណិជ្ជករកម្ពុជាសាខាភ្នំពេញ ( JCI Phnom Penh ) ទាំងមូល សូមថ្លែងអំណរអរគុណយ៉ាងជ្រាលជ្រៅទៅដល់ សប្បុរសជនទាំងឡាយ និងម្ចាស់ឧបត្ថម្ភកម្មនានា ដែលចូលរួមតាមរយៈ JCI Marina និង JCI South Saigon បានក្លាយជាកត្តាធំមួយយ៉ាងសំខាន់ក្នុងការធ្វើឱ្យកម្មវិធីនេះ ដំណើរទៅបានប្រកបដោយលទ្ធផលល្អប្រសើរ។ ជាមួយ​គ្នានេះ ក្រុមការងាររបស់គម្រោងនេះ ក៏មានភាពសោមនស្សរីករាយ ដែលបានពាំនាំស្នាមញញឹមជូនទៅដល់សិស្សានុសិស្ស លោកគ្រូអ្នកគ្រូ និងអាណាព្យាបាលគ្រប់រូបឱ្យចងចាំពីគម្រោងមួយនេះ ហើយរំពឹងនិងសង្ឃឹមទុកថា Bag to school នឹងនៅតែបន្តរទទួលបានការគាំទ្រពីសំណាក់មហាជន និងសប្បុរសជន ដើម្បីធ្វើឱ្យគម្រោងនេះបន្តរទៅដោយជោគជ័យនៅឆ្នាំបន្តរបន្ទាប់ទៀត ៕