ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គិតត្រឹមខែសីហា ឆ្នាំ២០២៣ គឺមានរយៈពេល៣ឆ្នាំហើយ បន្ទាប់ពីមានការចុះអនុស្សារណៈ នៃការយោគយល់គ្នារវាងក្រសួងទេសចរណ៍ និងអង្គការ Swisscontact Cambodia លើគម្រោងបណ្តុះបណ្តាលបដិសណ្ឋារកិច្ចកម្ពុជា ដែលអនុវត្តគម្រោងដោយគណៈកម្មការគ្រប់គ្រងគម្រោង ហូកា នៃក្រសួងទេសចរណ៍ នៅខេត្តគោលដៅចំនួន១០ រួមមាន ខេត្តក្រចេះ ស្ទឹងត្រែង ព្រះវិហារ រតនគិរី មណ្ឌលគិរី ពោធិ៍សាត់ បាត់ដំបង់ ប៉ៃលិន បន្ទាយមានជ័យ និងឧត្តរមានជ័យ។
យោងតាមរបាយការណ៍ដែលចេញផ្សាយដោយក្រសួងទេសចរណ៍បានបង្ហាញថា ក្រោមកិច្ចសហការជាមួយវិស័យឯកជន សមាគមឧស្សាហកម្មទេសចរណ៍ សាលាបណ្តុះបណ្តាលវិជ្ជាជីវៈទេសចរណ៍ និងដៃគូរពាក់ព័ន្ធ គណៈកម្មការគ្រប់គ្រងគម្រោង ហូកា បានធ្វើការបណ្តុះបណ្តាលពង្រឹងសមត្ថភាព (Up-Skilling) ដល់អ្នកជំនាញទេសចរណ៍សរុបចំនួន ៣,៣៤៧នាក់ (ស្រី ២,០៦៣នាក់) លើជំនាញសំខាន់ៗរួមមាន ៖ (១) ជំនាញសេវាកម្មម្ហូបអាហារនិងភេសជ្ជៈចំនួន ១,២៨៤នាក់ (ស្រី៨៤៩នាក់), (២) ជំនាញការិយាល័យជួរមុខចំនួន ៦០៨នាក់ (ស្រី ៣៨១នាក់), (៣) ជំនាញគេហកិច្ចចំនួន ៥០៧ នាក់ (ស្រី២៩៩នាក់), (៤) ជំនាញឆុងកាហ្វេចំនួន ២៣៤នាក់ (ស្រី១៣១នាក់), (៥) ជំនាញចុងភៅចំនួន ១៦២នាក់ (ស្រី ១១០នាក់), (៦) ជំនាញមគ្គុទ្ទេសក៍ទេសចរណ៍សហគមន៍ចំនួន ១៥៩នាក់ (ស្រី៨៣នាក់), (៧) គ្រូបង្គោល ហូកា ចំនួន ៣៥៣នាក់ (ស្រី១៩៦នាក់), (៨) អ្នកវាយតម្លៃបង្គោលចំនួន ២៣នាក់ (ស្រី៨នាក់) និង (៩) កម្មវិធីហ្វឹកហាត់អាជីវកម្ម (Professional Placement Programme-PIP) ចំនួន ១៨នាក់ (ស្រី៨នាក់)។
តាមរយៈការបណ្តុះបណ្តាលនេះ គណៈកម្មការគ្រប់គ្រងគម្រោង ហូកា នៃក្រសួងទេសចរណ៍បានចុះកិច្ចព្រមព្រៀងបណ្តុះបណ្តាលជាមួយប្រតិបត្តិករទេសចរណ៍សរុបចំនួន ១០៦ អាជីវកម្ម ដែលបានបញ្ជូនបុគ្គលិក អ្នកគ្រប់គ្រង ឬម្ចាស់អាជីវកម្មផ្ទាល់មកចូលរៀនវគ្គបណ្តុះបណ្តាលជំនាញនានាខាងលើ។
សូមបញ្ជាក់ថា កម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa) គឺជាផ្នែកមួយរបស់ កម្មវិធីអភិវឌ្ឍន៍ជំនាញ (SDP) ដើម្បីធ្វើការបណ្តុះបណ្តាលជំនាញបដិសណ្ឋារកិច្ចដល់យុវជន យុវនារី អ្នកជំនាញកម្រិតទាប ម្ចាស់អាជីវកម្ម និងសហគមន៍ទេសចរណ៍ នៅខេត្តចំនួន៥ នៅភូមិភាគឦសាន និងខេត្តចំនួន៥ទៀតនៅជុំវិញបឹងទន្លេសាប៕
