ក្នុងសន្និបាតបូកសរុបការងារអប់រំ យុវជន និងកីឡាឆ្នាំសិក្សា ២០២៣-២០២៤ និងលើកទិសដៅការងារឆ្នាំសិក្សា ២០២៤-២០២៥ នាព្រឹកថ្ងៃទី២៥ ខែកុម្ភៈ ឆ្នាំ២០២៥ ឯកឧត្តម ចាន់ សុភា អនុរដ្ឋលេខាធិការក្រសួងអប់រំ យុវជន និងកីឡា លើកឡើងថា មកដល់ពេលនេះ សិស្សប្រមាណ ៨៧% ស្ថិតក្នុងសាលាគោលដៅដែលកំពុងអនុវត្តកញ្ចប់សម្ភារៈអំណានថ្នាក់ដំបូង។

ឯកឧត្តម ចាន់ សុភា មានប្រសាសន៍ថា ការអនុវត្តកម្មវិធីកញ្ចប់សម្ភារៈអំណានថ្នាក់ដំបូង បច្ចុប្បន្ននេះ មានគ្រូឧបទ្ទេស ជាង១ពាន់នាក់ ដើម្បីអនុវត្ត និងគ្រូបង្រៀនថ្នាក់ទី១ ទី២ និងទី៣ ជាង២ម៉ឺននាក់ ក្នុងចំណោម៣ម៉ឺននាក់ បានទទួលការបំពាក់បំប៉ន។ ក្នុងនោះ តាមរយៈការអនុវត្តកញ្ចប់សម្ភារៈអំណាន និងគណិតវិទ្យាថ្នាក់ដំបូង មកដល់ពេលនេះ លោកគ្រូ អ្នកគ្រូ បានផ្លាស់ប្ដូរឥរិយាបទក្នុងការបង្រៀនបែបគ្រូមជ្ឈមណ្ឌល មកជាសិស្សមជ្ឈមណ្ឌលពេញលេញ។ ឯកឧត្តមបន្តថា នៅក្នុងការអនុវត្តវិធីសាស្រ្តបង្រៀនថ្មីនេះ កុមារត្រូវចូលរួមសកម្មភាពរៀនជាមួយលោកគ្រូ អ្នកគ្រូ មានន័យថា សកម្មភាពរៀន ហើយលេង។

បើតាម ឯកឧត្តម ចាន់ សុភា នៅក្នុងវិធីសាស្រ្តអនុវត្តកញ្ចប់សម្ភារៈអំណានថ្នាក់ដំបូង គ្រូបង្រៀនត្រូវធ្វើយ៉ាងណាឱ្យសិស្សស្គាល់ តួអក្សរ ស្គាល់សូរ ចេះពាក្យ ចេះអានស្ទាត់ និងយល់ន័យ។ ម៉្យាងវិញទៀត បណ្ដុះទម្លាប់អានតាំងពីក្មេង ហើយការអនុវត្តក៏បានផ្សារភ្ជាប់តេស្តថ្នាក់តំបន់ (SEA-PLM)។ ជាពិសេសជំរុញការចូលរួមរបស់មាតាបិតា អ្នកអាណាព្យាបាលសិស្ស ក្នុងការគាំទ្រ និងតាមដានការសិក្សារបស់កូន តាមរយៈសម្ភារៈរៀនតាមផ្ទះ និងវីដេអូរបៀបសម្របសម្រួលការរៀនសូត្ររបស់កូននៅផ្ទះ។

“សមត្ថភាពគ្រូជាបញ្ហាគន្លឹះក្នុងការអនុវត្តកញ្ចប់សម្ភារៈអំណាន និងគណិតវិទ្យាថ្នាក់ដំបូង អាចអនុវត្តបានរលូន និងមានប្រសិទ្ធភាព”

អនុរដ្ឋលេខាធិការក្រសួងអប់រំ បន្ថែមទៀតថា សម្រាប់កញ្ចប់សម្ភារៈអំណានថ្នាក់ដំបូង ចាប់ពីថ្នាក់ទី១ ដល់ថ្នាក់ទី៣ មានការរៀបចំជាសៀវភៅណែនាំគ្រូ សៀវភៅជំនួយសិស្ស បណ្ណអក្សររូបភាព សៀវភៅរឿងងាយៗ មានប្រមាណ​៦០ចំណងជើង ដើម្បីសិស្សអានបន្ថែម។ កញ្ចប់សម្ភារៈគណិតថ្នាក់ដំបូង បានអភិវឌ្ឍឯកសារពីថ្នាក់ទី១ ដល់ថ្នាក់ទី៣ ដោយមានសៀវភៅណែនាំគ្រូ សៀវភៅជំនួយសិស្ស សៀវភៅកិច្ចការផ្ទះ សៀវភៅលំហាត់ដែលមានភ្ជាប់វីដេអូ បង្ហាញទៅដល់មាតាបិតាសិស្ស ឬអាណាព្យាបាលជួយបង្រៀនកូននៅផ្ទះ។ ក្នុងនោះ សម្រាប់កញ្ចប់សម្ភារៈគណិតវិទ្យាថ្នាក់ទី៣ ក្រសួងបានរៀបចំសៀវភៅជួយគ្រូង្រៀនផលិតសម្ភារៈឧបទ្ទេសជួយក្នុងការបង្រៀន និងរៀន តាមរយៈការស្កេន QRCode។

គួរជំរាបជូនថា ក្រសួងអប់រំ យុវជន និងកីឡា បានប្រកាសដាក់ឱ្យអនុវត្តសាកល្បងកញ្ចប់សម្ភារៈអំណានថ្នាក់ដំបូងនៅខេត្តកំពង់ធំ និងសៀមរាប នៅឆ្នាំ២០១៨ និងបានចាប់ផ្ដើមអភិវឌ្ឍកញ្ចប់សម្ភារៈគណិតវិទ្យាថ្នាក់ដំបូង ហើយអនុវត្តសាកល្បងក្នុងឆ្នាំសិក្សា២០១៩-២០២០។ ស្របគ្នានេះ ការអនុវត្តកញ្ចប់សម្ភារៈអំណាន និងគណិតវិទ្យាថ្នាក់ដំបូង ក៏បានដាក់បញ្ជូលក្នុងកម្មវិធីបណ្ដុះបណ្ដាលគ្រូកម្រិតបឋមសិក្សា នៅតាមវិទ្យាស្ថានគរុកោសល្យរាជធានី/ខេត្តផងដែរ៕