ភ្នំពេញ – កីឡាស៊ីហ្គេម គឺជាទិវាកីឡាដ៏ធំ និងមានប្រជាប្រិយភាពរបស់ប្រជាជាតិក្នុងបណ្តាប្រទេសតំបន់អាស៊ីអាគ្នេយ៍ប្រារព្វឡើង២ឆ្នាំម្តងតាមអក្ខរក្រម។ ទន្ទឹមគ្នានេះ នៅដើមខែឧសភា និងមិថុនាខាងមុខ កម្ពុជាទទួលបានឱកាសរៀបចំព្រឹត្តិការណ៍ប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ។ តើកម្ពុជាទទួលបានផលប្រយោជន៍អ្វីខ្លះ ពីការ​ធ្វើជាម្ចាស់ផ្ទះ ក្នុង​ព្រឹត្តិការណ៍ទាំង២នេះ?

លោកបណ្ឌិត ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា មានប្រសាសន៍ថា នេះជាលើកទីមួយហើយដែលកម្ពុជាមានសមត្ថភាពទទួលបានឱកាសរៀបចំព្រឹត្តិការណ៍ប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២  ដែលបានបង្ហាញពីសមត្ថភាពរបស់កម្ពុជា ព្រមទាំងជាឱកាសធ្វើឱ្យបរទេសស្គាល់ប្រទេសកម្ពុជាកាន់តែច្បាស់។

លោកបណ្ឌិត ឈត ប៊ុនថង បានលើកឡើងអំពីអត្ថប្រយោជន៍៤ ដែលកម្ពុជាទទួលបាន ក្នុងការធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដោយរួមមាន៖

១. បង្ហាញពីសមត្ថភាពរៀបចំការប្រកួត និងទាក់ទាញវិនិយោគិន ៖ ការចូលរួមរបស់កម្ពុជាក្នុងការរៀបចំប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ នឹងធ្វើឱ្យសាកលលោកមើលឃើញអំពីពីស្ថានភាពពិតរបស់ប្រទេសកម្ពុជា។ លើសពីនេះ បានចូលរួមទាក់ទាញវិនិយោគិនពីបរទេសចាប់អារម្មណ៍មកនិយោគនៅប្រទេសកម្ពុជា។

២. កេរ្តិ៍ឈ្មោះល្បីរន្ទឺនៅលើឆាកអន្តរជាតិ ៖ ការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ក៏ជាផ្នែកមួយដែលជួយឱ្យកម្ពុជាអាចទទួលបានមេដាយមាស មេដាយសំរិទ្ធ  និងមេដាយប្រាក់ ជាពិសេសកេរ្តិ៍ឈ្មោះល្បីរន្ទឺនៅលើឆាកអន្តរជាតិ។ ក្នុងនោះ ការទទួលរៀបចំទីតាំងប្រកួតដែលមានការចូលរួមពីយុវជនស្ម័គ្រចិត្ត និងការស្វាគមន៍គណៈប្រតិភូកីឡាដ៏កក់ក្ដៅជាដើម ។ ម៉្យាងវិញទៀត កម្ពុជាក៏អាចបង្កើតវិញ្ញសាប្រកួតដែលជារបស់ខ្មែរមកបញ្ចូលក្នុងការប្រកួតដែលសមស្របតាមគោលការណ៍នៃការប្រកួតបានផងដែរ។

៣. ផ្សព្វផ្សាយពីវប្បធម៌ខ្មែរ ៖ ការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ក៏ជាឱកាសដែលកម្ពុជាអាចបង្ហាញពីវប្បធម៌នៃការទំនាក់ទំនងក្នុងនាមជាម្ចាស់ផ្ទះ ការស្វាគមន៍ ព្រមទាំងមរតកវប្បធម៌ខ្មែរ ដូចជា របាំ ល្បុក្កតោ និងភារកិច្ចខ្មែរជាដើម។ លើសពីនេះ បើទោះជាកម្ពុជាសព្វថ្ងៃមិនទាន់ក្លាយជាប្រទេសអ្នកមានក៏ពិតមែន ប៉ុន្តែមានទឹកចិត្តធំទូលាយផ្ដល់ឱកាសឱ្យប្រតិភូកីឡា កីឡាករ កីឡាការិនី សាធារណៈជន បានចូលរួមប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២  ខាងមុខនេះ ដោយឥតគិតថ្លៃ។

៤. លើកកម្ពស់នយោបាយ សេដ្ឋកិច្ចក្នុងតំបន់ និងពិភពលោក ៖ ផ្នែកនយោបាយកម្ពុជាព្យាយាមរក្សាសម្ព័ន្ធភាពល្អ មិនរើសអើងចំពោះប្រទេសជិតខាងលើបញ្ហានយោបាយ។ ទន្ទឹមគ្នានេះ កម្ពុជាកំពុងចង់បង្ហាញទៅកាន់ពិភពលោកថា កម្ពុជាមានសមត្ថភាពគ្រប់គ្រាន់ក្នុងការធ្វើជាម្ចាស់ផ្ទះប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២។ ជាពិសេស បញ្ជាក់ថា កម្ពុជាមានសន្តិភាព និងសន្តិសុខនយោបាយ និងមានធនធានសមរម្យសម្រាប់ការរៀបចំការប្រកួត។

ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា ក៏បានសំណូមពរដល់ ប្រជាពលរដ្ឋខ្មែរទាំងអស់ត្រូវមានមោទនភាពថាយើងអាចធ្វើបានក្នុងការរៀបចំព្រឹត្តិការណ៍ប្រកួតនេះ។ លើសពីនេះ សូមចូលរួមជាមួយអាជ្ញាធរ រក្សាសណ្ដាប់ធ្នាប់ គោរពច្បាប់ចរាចរណ៍។ ជាពិសេស ផ្សព្វផ្សាយឱ្យបានទូលំទូលាយពីការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២  និងលើកទឹកចិត្តកីឡាករកម្ពុជា និងបរទេសឱ្យទទួលបានជោគជ័យ៕