ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្ងៃសៅរ៍ ទី១ ខែវិច្ឆិកា ឆ្នាំ២០២៥ គឺជាថ្ងៃបបើករវេសនកាលឆ្នាំសិក្សា២០២៥-២០២៦ សម្រាប់សាលារៀនភាគច្រើននៅទូទាំងប្រទេសកម្ពុជា សាលារៀនភាគច្រើន បើកបវេសនកាលឆ្នាំសិក្សាថ្មីនៅលើដែនដីគោក ប៉ុន្តែសាលាបឋមសិក្សា និងអនុវិទ្យាល័យក្នុងភូមិចំនួន ៦ នៃស្រុកឯកភ្នំ ខេត្តបាត់ដំបង បើកឆ្នាំសិក្សាថ្មីលើផ្ទៃទឹក។
លោក ម៉ឺល សុផល អភិបាលស្រុកឯកភ្នំ ឱ្យដឹងថា សាលារៀនទាំងនោះ ស្ថិតក្នុងឃុំកោះជីវាំង ដែលជាភូមិសាស្រ្តស្ថិតនៅក្នុងបឹងទន្លេសាប។ លោកអភិបាលស្រុកបន្ថែមថា សិស្សានុសិស្សនៅទីនេះមានទម្លាប់ក្នុងការធ្វើដំណើរទៅរៀនកាត់ទឹកទៅហើយ។
លោក ពុំ ចិន មេឃុំកោះជីវាំង នៃស្រុកឯកភ្នំ ឱ្យដឹងថា ភូមិចំនួន៦ រួមមានភូមិថ្វាង ភូមិកំពង់ប្រហុក ភូមិអន្លង់តាអួរ ភូមិព្រែកទាល់ ភូមិពាក់កន្ទេល និងភូមិក្បាលតោល ក្នុងឃុំរបស់លោកលិចទឹក៦ខែ និងគោក៦ខែ។ ដូច្នេះសិស្សទាំង ១៦៩៣នាក់ នៃសាលាបឋមសិក្សា និងអនុវិទ្យាល័យទាំង ១៦ខ្នង ត្រូវធ្វើដំណើរតាមទូក ឬកាណូតទៅរៀន។
យោងតាមក្រសួងអប់រំ យុវជន និងកីឡា ក្រៅពីសាលារៀនទាំង ១៦ ក្នុងឃុំកោះជីវាំង ស្រុកឯកភ្នំ ខេត្តបាត់ដំបង ក៏នៅមានសាលារៀនមួយចំនួនទៀត ក្នុងខេត្តកំពង់ឆ្នាំង កំពង់ធំ ពោធិសាត់ និងខេត្តសៀមរាប ក៏មានសាលារៀនលិចទឹក ហើយតម្រូវឱ្យសិស្សានុសិស្សធ្វើដំណើរតាមទូក និងកាណូតទៅរៀនដែរ។
យោងតាមការប្រកាសរបស់ក្រសួងអប់រំ សម្រាប់ឆ្នាំសិក្សាថ្មី២០២៥-២០២៦ សិស្សសរុបចាប់ពីមត្តេយ្យសិក្សារហូតដល់មធ្យមសិក្សាទុតិយភូមិមានប្រមាណ៣លាន ៣សែន ៦ម៉ឺន និងគ្រូបង្រៀនប្រមាណ១៣ម៉ឺននាក់។
ក្នុងឱកាសបវេសនកាលឆ្នាំថ្មី២០២៥-២០២៦ សម្តេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានចេញសាលិខិតជំរុញ ឱ្យដំណើរការអប់រំក្នុងឆ្នាំសិក្សាថ្មី២០២៥-២០២៦ ទទួលបានលទ្ធផលកាន់តែល្អប្រសើរ ពិសេសកុមារនៅតាមតំបន់ដាច់ស្រយ៉ាល និងកុមាររងផលប៉ះពាល់ដោយសារបញ្ហាសង្គ្រាមនៅតាមបណ្តោយព្រំដែន៕
អត្ថបទ ៖ វិន ឈុនហ៊ាត
