ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រទេសក្នុងទ្វីបអឺរ៉ុប ជាពិសេសប្រទេសនៅក្នុងសហភាពអឺរ៉ុប ត្រូវបានគេចាត់ទុកថាជាតំបន់មួយ ក្នុងចំណោមតំបន់ដែលមានការរីកចម្រើនបំផុតក្នុងពិភពលោក។ ទោះបីជារុងរឿងយ៉ាងនេះក៏ដោយ ក៏មនុស្សវ័យក្មេងជាច្រើន នៅក្នុងតំបន់នេះកំពុងប្រឈមនឹងបញ្ហាសុខុមាលភាពដែរ នេះក៏ដោយសារតែការកើនឡើងខ្លាំង នៃបញ្ហាសុខភាពផ្លូវចិត្ត, នេះបើយោងតាម Euro News ។
កាលពីខែមុន អង្គការសង្គមកុមារ ដែលជាអង្គការសប្បុរសធម៌ ដែលមានមូលដ្ឋាននៅចក្រភពអង់គ្លេស បានផ្សាយរបាយការណ៍មួយ ដែលសិក្សាអំពីសុខុមាលភាពរបស់មនុស្សវ័យក្មេងក្នុងចក្រភពអង់គ្លេស និងប្រៀបធៀបស្ថានភាពសុខុមាលភាពរបស់ពួកគេទៅនឹងប្រជាជននៅអឺរ៉ុប។
របាយការណ៍ដែលមានឈ្មោះថា 2024 Good Childhood Report បានរកឃើញថា ជាមធ្យម ១៦,៦ភាគរយ នៃយុវជនអឺរ៉ុបមិនពេញចិត្តនឹងជីវិតរបស់ខ្លួន ដែលស្មើនឹង មនុស្ស១ ក្នុងចំណោម ៦នាក់ទូទាំងទ្វីបអឺរ៉ុប។ ក្នុងនោះ ប្រទេសហូឡង់ មានកុមារដែលមិនពេញចិត្តនឹងជីវិតខ្លួនឯងទាបបំផុត ក្នុងទ្វីបអឺរ៉ុប ក្នុងនោះមានក្មេងជំទង់អាយុ ១៥ឆ្នាំ ត្រឹមតែ ៦,៧ ភាគរយប៉ុណ្ណោះ ដែលបានរាយការណ៍ថា មិនពេញចិត្តនឹងជីវិតខ្លួនឯង។ ទន្ទឹមនឹងនេះ ប្រទេសហ្វាំឡង់ និងដាណឺម៉ាក ក៏ជាប្រទេសដែលទទួលបានចំណាត់ថ្នាក់ល្អផងដែរ ដោយមានតែ ១០,៨ ភាគរយ និង ១១,៣ភាគរយប៉ុណ្ណោះ ដែលរាយការណ៍មិនពេញចិត្តនឹងជីវិតរបស់ខ្លួន។
ផ្ទុយទៅវិញ មនុស្សវ័យក្មេងក្នុងចក្រភពអង់គ្លេស បានរាយការណ៍ពីកម្រិតខ្ពស់បំផុត នៃការមិនពេញចិត្តនឹងជីវិតរបស់ខ្លួន ក្នុងនោះមាន ២៥,២ ភាគរយ បន្ទាប់មកគឺ ប៉ូឡូញ មាន ២៤,៤ភាគរយ និងម៉ាល់តា មាន ២៣,៦ភាគរយ។
ការសិក្សាបង្ហាញថា កុមារ និងមនុស្សវ័យក្មេង ២នាក់ ក្នុងចំណោម ៥នាក់ មានការបារម្ភអំពីការកើនឡើងថ្លៃ នៃការចំណាយ ខណៈកុមារ ៥០ភាគរយ បានរាយការណ៍ថា បញ្ហាហិរញ្ញវត្ថុបានរារាំងពួកគេពីការចូលរួមសកម្មភាពផ្សេងៗដូចជា ការជួបជុំមិត្តភក្តិ ឬចុះទស្សនកិច្ចសិក្សាជាដើម។ លើសពីការចំណាយ កុមារអង់គ្លេស ក៏បានបង្ហាញពីការព្រួយបារម្ភអំពី ការកើនឡើងតម្លៃនៃការរស់នៅក្នុងប្រទេស បញ្ហាឧក្រិដ្ឋកម្ម សុវត្ថិភាពអនឡាញ និងបញ្ហាបរិស្ថានផងដែរ។
បញ្ហាចម្បងមួយទៀត ក្នុងការរស់នៅរបស់កុមារអង់គ្លេស ដែលធ្វើឱ្យពួកគេមានបញ្ហាសុខុមាលភាព គឺបញ្ហាទាក់ទងនឹងសាលារៀន។ នៅឆ្នាំ២០២៤ យុវជន ១៤,៣ ភាគរយ បានរាយការណ៍ថា មិនពេញចិត្តនឹងបទពិសោធន៍ក្នុងការសិក្សានៅសាលារៀនពួកគេ។ ការព្រួយបារម្ភនោះ គឺជុំវិញបញ្ហាសុវត្ថិភាពក្នុងសាលារៀន, អារម្មណ៍នៃការមិនទទួលស្គាល់ និងកង្វះបរិយាប័ន្ន, សម្ពាធនៃការសិក្សា និងការគម្រាមកំហែងនៅសាលា៕
