បើតាមរបាយការណ៍របស់ WE Forum បានបង្ហាញថា ដើម្បីដោះស្រាយភាពញឹកញាប់ នៃភ្លើងឆេះព្រៃនៅទីក្រុង Türkiye ប្រទេសទួកគី ស្ថាប័ន WE Forum, ក្រុមហ៊ុន Koç Holding, ក្រសួងកសិកម្ម និងរុក្ខាប្រមាញ់ទួរគី និងក្រុមហ៊ុន Deloitte បានចាប់ផ្តើមគំនិតផ្តួចផ្តើម វេទិកាមួយដែលមានឈ្មោះថា FireAId កាលពីខែមករាឆ្នាំ២០២២។ ការផ្តួចផ្តើមនេះ ធ្វើឡើងក្នុងគោលបំណងប្រើបញ្ញាសិប្បនិម្មិត (AI) ដើម្បីព្យាករណ៍ និងការការពារភ្លើងឆេះព្រៃ។

ចាប់តាំងពីការបើកដំណើរការ វេទិកានេះបានកសាងសហគមន៍ពិភពលោកមួយ ដែលជំរុញឱ្យមានសកម្មភាពផ្លាស់ប្តូរចំណេះដឹងបច្ចេកវិទ្យាឱ្យបានកាន់តែទូលំទូលាយ ដែលមានការចូលរួមពីស្ថាប័នជាច្រើនដូចជា Microsoft, Google, Hewlett Packard Enterprise, Scale AI, Conservation International, Inter-American Development Bank, NASA, Lockheed Martin, Sempra, Qcentroid, Patrick J, មូលនិធិ McGovern, Planet Labs និងសាកលវិទ្យាល័យ Miami ។ ក្រៅពីនេះ ប្រទេសព័រទុយហ្គាល់ និងអាហ្វ្រិកខាងត្បូងក៏ចូលរួមផងដែរ។

ជាផ្នែកមួយនៃកម្មវិធីសាកល្បងនៅ​តំបន់ Türkiye ផែនទីហានិភ័យភ្លើងឆេះព្រៃត្រូវបានបង្កើតឡើង ដោយប្រើបញ្ញាសិប្បនិម្មិត (AI) ក្បួនដោះស្រាយរបស់ម៉ាស៊ីនសិក្សា (Machine Learning) និងមានការចូលរួមពីអ្នកជំនាញជុំវិញពិភពលោក។ ផែនទីនេះត្រូវបានគូរដោយផ្អែកលើប្រភពទិន្នន័យជាច្រើន រួមទាំង ទិន្នន័យប្រវត្តិសាស្រ្ត ឧតុនិយម និងភូមិសាស្រ្ត។ ការអនុវត្តជោគជ័យលើកដំបូងនៅតំបន់ Türkiye បាននាំឱ្យមានអត្រាភាពត្រឹមត្រូវ ៨០% ក្នុងការទស្សន៍ទាយភ្លើងឆេះព្រៃ ២៤ម៉ោងមុនពេលការផ្ទុះឡើង។ ភាពជោគជ័យនៃការសាកល្បង បានបង្ហាញពីប្រសិទ្ធភាពបញ្ញាសិប្បនិម្មិត (AI) ក្នុងការគាំទ្រអាជ្ញាធរក្នុងការជួយសង្គ្រោះជីវិត ការពារទ្រព្យសម្បត្តិ ថែរក្សាបរិស្ថាន និងកាត់បន្ថយការខូចខាតភ្លើងឆេះព្រៃ។

បញ្ហា​ប្រឈម​បណ្ដាលមកពី​អាកាសធាតុ​

បច្ចុប្បន្ន បញ្ហាបម្រែបម្រួលអាកាសធាតុនៅតែជាកង្វល់ធំមួយ ហើយឥទ្ធិពលរបស់វាអាចកើនឡើងកាន់តែច្រើន និងធ្ងន់ធ្ងរខ្លាំង។ ជាពិសេស ភ្លើងឆេះព្រៃអាចរីករាលកាន់តែច្រើនតំបន់នៅជុំវិញពិភពលោក។ យោងតាមទិន្នន័យដែលប្រមូលបានដោយ National Interagency Fire Center (NIFC) ផ្ទៃដីប្រមាណ ៣លានហិចតាបានរងផលប៉ះពាល់ដោយអគ្គិភ័យជារៀងរាល់ឆ្នាំចាប់តាំងពីឆ្នាំ១៩៨៣។ នៅពេលគណនាឡើងវិញពីឆ្នាំ២០០០ចំនួននេះកើនឡើងដល់ ៧លានហិចតាជារៀងរាល់ឆ្នាំ។

ភ្លើងឆេះព្រៃ គឺជាការគម្រាមកំហែងដ៏ធំដល់ព្រៃឈើ តំបន់ជនបទ និងសហគមន៍មនុស្ស ដោយអាចបំផ្លាញផ្ទះ ហេដ្ឋារចនាសម្ព័ន្ធ និងផ្ទៃដីកសិកម្មយ៉ាងឆាប់រហ័ស។ លើសពីនេះសត្វព្រៃជាញឹកញាប់ត្រូវបានបាត់បង់ក្នុងចំនួនដ៏ច្រើន ដែលបង្កឱ្យមានការព្រួយបារម្ភអំពីបរិស្ថាន ក៏ដូចជាការបំផ្លិចបំផ្លាញទ្រព្យសម្បត្តិ និងធនធានធម្មជាតិ។ ភ្លើងឆេះព្រៃអាចផ្តល់ផលវិបាកយ៉ាងធ្ងន់ធ្ងរដល់សុខុមាភាពមនុស្សនៅក្នុងតំបន់ដែលងាយរងផលប៉ះពាល់ ដោយសារគុណភាពខ្យល់មានគ្រោះថ្នាក់។

វិធីសាស្រ្តប្រើបច្ចេកវិទ្យា AI ក្នុងការព្យាករណ៍ និងការការពារភ្លើងឆេះព្រៃ

ក្នុងកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក (WE Forum) ឆ្នាំ២០២៣ នៅទីក្រុងដាវ៉ូស នាយកប្រតិបត្តិក្រុមហ៊ុន Koç Holding លោក Levent Çakıroğlu បានពន្យល់ពីមុខងាររបស់បច្ចេកវិទ្យា ហើយបានគូសបញ្ជាក់ថា ក្បួនដោះស្រាយ និងកូដប្រភពនឹងត្រូវបង្ហាញជាសាធារណៈ ដើម្បីជាគន្លឹះក្នុងការបង្កើនសមត្ថភាពរបស់ FireAId ។

លោក David Thogmartin នាយកផ្នែក AI និង Data Analytics និងទីប្រឹក្សាហានិភ័យរបស់ Deloitte បានលើកឡើងថា «ការព្យាករណ៍កាន់តែប្រសើរឡើងនៃការផ្ទុះ និងការរីករាលដាលនៃអគ្គិភ័យដោយប្រើបច្ចេកវិទ្យាដូចជា AI, cloud និង digital twins – មានសក្តានុពលក្នុងការធ្វើឱ្យប្រសើរឡើងនូវផែនការរក្សាធនធាន និងជួយសន្សំសំចៃពេលវេលារបស់អ្នកពន្លត់អគ្គីភ័យ។» អ្នកស្រាវជ្រាវកំពុងបន្តសិក្សាបច្ចេកទេសថ្មី ដើម្បីបង្កើនប្រសិទ្ធភាពបច្ចេកវិទ្យា FireAId ដើម្បីដោះស្រាយជាមួយនឹងបញ្ហាភ្លើងឆេះព្រៃ ដែលមិនអាចទាយទុកមុន។ FireAId Global Coalition កំពុងត្រូវបានបង្កើតឡើង ដើម្បីបង្កើនការយល់ដឹងជាសកលឆ្ពោះទៅរកការដោះស្រាយភ្លើងឆេះព្រៃ ដោយប្រើប្រាស់បច្ចេកវិទ្យា AI៕