ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាម WE Forum បានឱ្យដឹងថា ជំងឺរាតត្បាត COVID–19 និងសង្គ្រាមរុស្ស៊ី-អ៊ុយក្រែន បានរួមចំណែកធ្វើឱ្យពិភពលោកជួបបញ្ហាអតិផរណា ដែលជំរុញឱ្យតម្លៃអាហារ ថ្លៃថាមពល និងការចំណាយមូលដ្ឋានផ្សេងៗទៀតបានកើនឡើង។ ជាលទ្ធផល មនុស្សជាច្រើនបានជួបការលំបាកក្នុងការចិញ្ចឹមជីវិត និងគ្រួសារ។
វេជ្ជបណ្ឌិត Hina Shahid ជាអ្នកជំនាញព្យាបាលជំងឺទូទៅក្នុងទីក្រុងឡុងដ៍បានលើកឡើងថា បច្ចុប្បន្នលោកស្រីបានឃើញការកើនឡើងចំនួនអ្នកជំងឺ ដែលស្វែងរកជំនួយផ្នែកវេជ្ជសាស្ត្រក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែក្នុងរយៈពេល ១២ខែចុងក្រោយ មានចំនួនអ្នកជំងឺកើនឡើងកាន់តែខ្លាំង។ Shahid បានបន្ថែមថា មនុស្សដែលមករកជំនួយពីលោកស្រី ភាគច្រើនគឺដោយសារតែជំងឺផ្លូវចិត្ត ដែលកើតឡើងដោយសារការកើនឡើងថ្លៃរស់នៅ វិក្កយបត្រប្រចាំខែ និងបំណុល។
តាមការបញ្ជាក់របស់អ្នកជំនាញខាងលើបានឱ្យដឹងថា បញ្ហាតម្លៃថាមពល បានធ្វើឱ្យប្រជាជនអង់គ្លេស ជាពិសេសមនុស្សចាស់ លែងហ៊ានប្រើម៉ាស៊ីនកម្ដៅនៅក្នុងផ្ទះ។ មូលហេតុនេះ បានបណ្ដាលឱ្យមនុស្សចាស់ជាច្រើន ធ្លាក់ខ្លួនឈឺ ខណៈមានបុរសម្នាក់កើតជំងឺរលាកសួតធ្ងន់ធ្ងរ ដោយសារគាត់រស់នៅក្នុងបន្ទប់ត្រជាក់សើម។
ជាមួយគ្នានេះ លោកវេជ្ជបណ្ឌិត Bob Gill ក៏បានយល់ស្របទៅនឹងការលើកឡើងរបស់ វេជ្ជបណ្ឌិត Hina Shahid ផងដែរ។ លោកបានលើកឡើងថា មនុស្សជាច្រើនបានធ្លាក់ខ្លួនឈឺ ដោយសារស្ថានភាពហិរញ្ញវត្ថុ និងសម្ពាធជីវិត។ ខណៈមនុស្សមួយចំនួន ជ្រើសរើសការប្រើប្រាស់ថ្នាំប្រឆាំងនឹងជំងឺបាក់ទឹកចិត្ត ដើម្បីជួយពួកគេទប់ទល់នឹងសម្ពាធចំពោះមុខ។ អ្នកជំងឺមួយចំនួនទៀត ហាក់ពង្រើយកន្ដើយនឹងបញ្ហាសុខភាពតែម្ដង ដោយសារតែគេចាត់ទុកការថែទាំគ្រួសារគឺជាកិច្ចការអាទិភាពដែលគេត្រូវធ្វើ៕
