កំណើននៃការប្រើប្រាស់ម៉ាស៊ីន ដើម្បីបំពេញការងារក្នុងពិភពលោកហាក់កើនឡើងជាលំដាប់ ។ បើយោងតាមទិន្នន័យដែលចេញផ្សាយដោយសហព័ន្ធរ៉ូបូតអន្តរជាតិ (IFR) បានបង្ហាញថា ដង់ស៊ីតេរ៉ូបូត (robot density) ជាមធ្យមនៅក្នុងវិស័យឧស្សាហកម្មផលិត បានបំបែកកំណត់ត្រាពិភពលោក ដោយមាន ៧៤គ្រឿងក្នុងចំណោមកម្មករ ១ម៉ឺននាក់នៅឆ្នាំ២០១៦កើនដល់ ១១៣គ្រឿងក្នុងឆ្នាំ ២០២១។ ក្នុងនោះ តំបន់អឺរ៉ុបខាងលិច មាន ២២៥គ្រឿង/១ម៉ឺននាក់ អឺរ៉ុបខាងជើង ២០៤គ្រឿង/១ម៉ឺននាក់ តាមពីក្រោមដោយ អាមេរិកខាងជើង មាន ១៥៣គ្រឿង​/១ពាន់នាក់ និងអាស៊ីអាគ្នេយ៍ ១១៩គ្រឿង/១ម៉ឺននាក់។

ស្ថិតិរ៉ូបូតពិភពលោកចុងក្រោយបង្អស់ ដែលចេញផ្សាយដោយ សហព័ន្ធរ៉ូបូតអន្តរជាតិ(IFR) បានបង្ហាញពីប្រទេសចំនួន ១០ ដែលប្រើបច្ចេកវិទ្យាស្វ័យប្រវត្តិច្រើនបំផុតលើពិភពលោករួមមាន សិង្ហបុរី កូរ៉េ ជប៉ុន អាល្លឺម៉ង់ ស៊ុយអែត ដាណឺម៉ាក ចិន អាមេរិក និងប៊ែលហ្សិក។

លោក Milton Guerry ប្រធានសហព័ន្ធរ៉ូបូតអន្តរជាតិ បានលើកឡើងថា «ដង់ស៊ីតេរ៉ូបូត គឺជាចំនួននៃមនុស្សយន្តឧស្សាហកម្មប្រតិបត្តិការធៀបនឹងចំនួនកម្មករ»។ លោកបន្ថែមថា «ការវាស់ស្ទង់កម្រិតនេះ អនុញ្ញាតឱ្យមានការប្រៀបធៀបប្រទេសដែលមានទំហំសេដ្ឋកិច្ចខុសៗគ្នា នៅក្នុងការប្រកួតប្រជែងបច្ចេកវិទ្យាស្វ័យប្រវត្តិកម្ម»។

ប្រទេសដែលមានដង់ស៊ីតេរ៉ូបូតខ្ពស់ជាងគេបំផុតលើពិភពលោកគឺ សិង្ហបុរី ដែលមានរ៉ូបូតរហូតដល់ ៩១៨គ្រឿង/១ម៉ឺននាក់ នៅក្នុងឆ្នាំ២០១៩។ ឧស្សាហកម្មផលិតគ្រឿងអេឡិចត្រូនិចដូចជា ស៊ីមីខន់ដាក់ទ័រ (semiconductor) និងបំណែកកុំព្យូទ័រ (Computer Peripheral) ជាផលិតកម្មចម្បង នៃឧស្សាហកម្មរ៉ូបូតក្នុងប្រទេសនេះ ដែលមានភាគហ៊ុនរហូតដល់ ៧៥ភាគរយ នៃភាគហ៊ុនប្រតិបត្តិការសរុប។

កូរ៉េ ស្ថិតនៅក្នុងចំណាត់ថ្នាក់លេខ២ដែលមានការប្រើរ៉ូបូតប្រមាណ ៨៦៨គ្រឿង/១ម៉ឺននាក់ នៅក្នុងឆ្នាំ ២០១៩។ ប្រទេសនេះ គឺជាទីផ្សារឈានមុខគេ ក្នុងវិស័យផលិតកម្ម LCD និង Memory Chip ដែលមានក្រុមហ៊ុន Samsung និង LG ជារោងកម្មន្តសាល។ ជាពិសេស កូរ៉េក៏ជាទីតាំងផលិតរថយន្ត និងយន្តអគ្គិសនីផងដែរ។

បន្ទាប់ពីនេះ ជប៉ុន (៣៦៤រ៉ូបូត/១ម៉ឺននាក់) និងអាល្លឺម៉ង់ (៣៤៥រ៉ូបូត/១ម៉ឺននាក់) ឈរនៅចំណាត់ថ្នាក់លេខ ៣ និងលេខ៤ ។ ជប៉ុន គឺជាប្រទេសដែលផលិតរ៉ូបូតច្រើនបំផុតរបស់ពិភពលោក ដែលសូម្បីតែរ៉ូបូតអាចដំឡើងរ៉ូបូតគ្នាឯងបាន ។ ៤៧ភាគរយ នៃផលិតកម្មរ៉ូបូតសកលត្រូវបានបង្កើតឡើងនៅក្នុងទីក្រុង Nippon នៃប្រទេសជប៉ុន ។ ឧស្សាហកម្មអគ្គិសនី និងគ្រឿងអេឡិចត្រូនិច មានភាគហ៊ុនចំនួន ៣៤ភាគរយ ឧស្សាហកម្មរថយន្ត ៣២ភាគរយ ឧស្សាហកម្មលោហៈ និងគ្រឿងម៉ាស៊ីន ១៣ភាគរយ នៃភាគហ៊ុនប្រតិបត្តិការ។

ទន្ទឹមនឹងនេះ អាល្លឺម៉ង់ គឺជាទីផ្សារម​នុស្សយន្តដ៏ធំបំផុតក្នុងទ្វីបអឺរ៉ុប ដែលមានទំហំ ៣៨ភាគរយនៃប្រតិបត្តិការរ៉ូបូតឧស្សាហកម្មក្នុងរោងចក្រ។ ដង់ស៊ីតេរ៉ូបូតក្នុងឧស្សាហកម្មរថយន្តអាល្លឺម៉ង់ ស្ថិតក្នុងចំណោមប្រទេសដែលមានអត្រាខ្ពស់បំផុត។ ការងារក្នុងវិស័យនេះបានកើនឡើងជាបន្តបន្ទាប់ ពីកម្មករចំនួន ៧២ម៉ឺននាក់ក្នុងឆ្នាំ២០១០ រហូតដល់ ៨៥ម៉ឺននាក់ក្នុងឆ្នាំ២០១៩។

ប្រទេសស៊ុយអែតស្ថិតក្នុងចំណាត់ថ្នាក់លេខ៥ ក្នុងនាមជាប្រទេសដែលមានដង់ស៊ីតេរ៉ូបូតក្នុងវិស័យឧស្សាហកម្មខ្ពស់បំផុតរបស់ពិភពលោក។ មានរ៉ូបូត ២៧៤គ្រឿង/១ម៉ឺននាក់ ដោយមាន៣៥ភាគរយ ដំណើរការក្នុងឧស្សាហកម្មលោហៈ និង៣៥ភាគរយនៅក្នុងឧស្សាហកម្មរថយន្ត និង៣០ភាគរយទៀត នៅក្នុងឧស្សាហកម្មចម្រុះ។ ដោយឡែក ដង់ស៊ីតេមនុស្សយន្តនៅអាមេរិកកើនឡើងដល់ ២២៨គ្រឿង/១ម៉ឺននាក់។ នៅឆ្នាំ ២០១៩ ទីផ្សាររថយន្តអាមេរិកបានឡើងទៅកាន់ចំណាត់ថ្នាក់លេខ២លើពិភពលោក បន្ទាប់ពីប្រទេសចិន។ ទាំងសហរដ្ឋអាមេរិក និងចិនត្រូវបានចាត់ទុកថាជាទីផ្សារ ដែលមានការប្រកួតប្រជែងខ្លាំងក្នុងការផលិតរថយន្តរបស់ពិភពលោក។

គួរជម្រាបជូនផងដែរថា ការអភិវឌ្ឍដង់ស៊ីតេរ៉ូបូតនៅក្នុងប្រទេសចិននៅតែបន្តយ៉ាងខ្លាំងក្លា ។ បច្ចុប្បន្ន ចិនស្ថិតក្នុងចំណាត់ថ្នាក់លេខ១៥ ក្នុងនាមជាប្រទេសដែលមានដង់ស៊ីតេរ៉ូបូតខ្ពស់ជាងគេ។ ក្រៅពីឧស្សាហកម្មរថយន្ត វិស័យដែលមានការប្រើប្រាស់រ៉ូបូតច្រើន រួមមានជាអាទិ៍ ឧបករណ៍អេឡិចត្រូនិច ធុងអាគុយ ស៊ីមីខន់ដាក់ទ័រ(semiconductor) និងមីក្រូឈីប(microchips)៕