ភ្នំពេញ – បច្ចេកវិទ្យាភូមិសាស្ត្រ (GIS) នឹងជួយជំរុញឱ្យការរស់នៅរបស់មនុស្សកាន់តែមានភាពងាយស្រួលជាងមុន ។ នេះបើតាមការលើកឡើងរបស់ លោក ជុំ បូរី នាយកកម្មវិធីយុវជនបច្ចេកវិទ្យា និងនវានុវត្តន៍ នៃ ស.ស.យ.ក នៅក្នុងវគ្គបណ្តុះបណ្តាលបច្ចេកវិទ្យា និងចំណេះដឹងអំពីប្រព័ន្ធព័ត៌មានភូមិសាស្ត្រ (GIS) និងការប្រើប្រាស់សុសវែរ ArcGIS Pro រៀបចំដោយ សហភាពសហព័ន្ធយុវជនកម្ពុជា រាជធានីភ្នំពេញ សហការជាមួយ STEAMING Cambodia និងក្រុមហ៊ុន ESRI Thailand កាលពីថ្ងៃទី២៥ ខែមេសា ឆ្នាំ២០២៣។

លោក ជុំ បូរី មានប្រសាសន៍ថា បច្ចេកវិទ្យាភូមិសាស្ត្រ (GIS) និងការប្រើប្រាស់សុសវែរ ArcGIS Pro ជាវិទ្យាសាស្ត្រនៃការសិក្សាថ្មីមួយសម្រាប់កម្ពុជា ដែលវិទ្យាសាស្ត្រនៃការសិក្សានេះ រាប់បញ្ចូលនូវសមាសធាតុ៣ គឺប្រព័ន្ធព័ត៌មានវិទ្យាភូមិសាស្ត្រ (GIS), Remote Sensing (RS), និង GPS។ លោកបន្តថា នៅកម្ពុជាមានតម្រូវការជំនាញនេះច្រើន ដោយសារជំនាញ GIS នឹងជួយឱ្យរាជរដ្ឋាភិបាល ឬក្រុមហ៊ុន បង្កើតផែនទីការប្រើប្រាស់ដី ផែនទីសម្រាប់ការគ្រប់គ្រងទីក្រុង ការផលិតប្លង់ដី ការបង្កើត Smart City និងជួយក្រុមហ៊ុនដឹកជញ្ជូន ដែលមានសារៈសំខាន់ទាំងការប្រើប្រាស់នៅក្នុងការគ្រប់គ្រង និងប្រើប្រាស់សម្រាប់ជីវភាពទូទៅ។

លោក ជុំ បូរី ជានាយកកម្មវិធីយុវជនបច្ចេកវិទ្យា និងនវានុវត្តន៍នៃស.ស.យ. ក រាជធានីភ្នំពេញ

“យើងធ្វើសិក្ខាសាលាថ្ងៃនេះ ដើម្បីបណ្ដុះបណ្ដាល និងធ្វើបច្ចុប្បន្នភាព GIS ថ្មីៗ ពីព្រោះបច្ចេកវិទ្យា GIS ប្រៀបដូចជាទូរស័ព្ទដែរ ដែលត្រូវធ្វើបច្ចុប្បន្នភាពជារៀងរាល់ឆ្នាំដើម្បីដើរឱ្យទាន់សភាពការរបស់ពិភពលោក”

នាយកកម្មវិធីយុវជនបច្ចេកវិទ្យា និងនវានុវត្តន៍ បន្ថែមថា ក្រោយបញ្ចប់ការសិក្សាជំនាញ GIS សិស្ស និស្សិត អាចមានឱកាសធ្វើការក្នុងក្រុមហ៊ុនដឹកជញ្ជូន ក្រុមហ៊ុនធ្វើស្ពានថ្នល់ ឬក្រសួងសាធារណការនិងដឹកជញ្ជូន ក្រសួងដែនដីនិងនគរូបនីយកម្ម ក្រសួងបរិស្ថានដែលកំពុងតែមានតម្រូវការជាចាំបាច់។ លើសពីនេះ បើសិនយុវជនចាប់អារម្មណ៍លើការងារធុរៈកិច្ចថ្មី (Start Up) សហគ្រិន ឬចង់ធ្វើការនៅក្នុងក្រុមហ៊ុន ឬស្ថាប័នរដ្ឋ ជំនាញនេះក៏អាចជាផ្នែកមួយដើម្បីជួយយុវជនឱ្យអាចដំណើរការបានផងដែរ។

លោក Panuwat Thipruck អ្នកគ្រប់គ្រងវគ្គបណ្ដុះបណ្ដាល ESRI មានប្រសាសន៍ថា នៅក្នុងសិក្ខាសាលានេះ សិស្សានុសិស្សពួកគេនឹងដឹងអំពីរបៀបប្រើប្រាស់កម្មវិធី GIS សម្រាប់បំពេញការងាររបស់ពួកគេនៅថ្ងៃអនាគត ព្រោះបច្ចុប្បន្នក្រុមហ៊ុនជាច្រើន នៅប្រទេសថៃ កម្ពុជា និងនៅតំបន់ឥណ្ឌូចិនទាំងមូល កំពុងប្រើទិន្នន័យជាច្រើនដោយផ្អែកលើ Location base ។ ហើយទិន្នន័យទាំងនោះរួមបញ្ចូលនូវ texture data និងទិន្នន័យអំពីទីតាំង ដែលបង្កើតដោយ យន្តហោះ UAV ដ្រូន ឬក៏រូបភាពដែលចាប់ដោយផ្កាយរណប (Satellite image)។

លោក Panuwat Thipruck បន្ថែមថា មុខងាររបស់ GIS បានរួមបញ្ចូលនូវបច្ចេកវិទ្យាថ្មីៗជាច្រើន ដូចជា Deep learning ឬ មុខងារបញ្ញាសប្បនិម្មិត ដែលអាចរកឃើញកម្មវត្ថុជាច្រើនដូចជា ផ្ទះ ឡាន ឬការផ្លាស់ប្ដូរនៃតំបន់មួយដោយស្វ័យប្រវត្តិ។ កាលពីសម័យមុន យើងត្រូវគូសផែនទីដោយដៃ ដើម្បីកំណត់ថា តើតំបន់មួយមានភូមិសាស្ត្របែបណាខ្លះ? ប៉ុន្តែឥឡូវយើងអាចប្រើមុខងារ Detect object ដើម្បីដឹងពីទិន្នន័យទាំងនេះ។

លោក Panuwat Thipruck អ្នកគ្រប់គ្រងវគ្គបណ្ដុះបណ្ដាល ESRI

“យុវជនជាច្រើនកំពុងចាប់អារម្មណ៍ការសិក្សាអំពីបច្ចេកវិទ្យាថ្មីៗ ហើយសកម្មភាពនេះ នឹងជំរុញឱ្យកម្ពុជាមានអ្នកជំនាញផ្នែក GIS កាន់តែច្រើននៅថ្ងៃអនាគត ដែលអាចបំពេញការងារជូនរាជរដ្ឋាភិបាល និងក្រុមហ៊ុនឯកជនផងដែរ”

យុវសិស្ស គង់ ដេត ជានិស្សិតឆ្នាំទី៣ សិក្សាជំនាញភូមិវិទ្យានៃសាកលវិទ្យាល័យភូមិន្ទភ្នំពេញ និយាយថា រូបគេសម្រេចចិត្តចូលរួមសិក្ខាសាលាថ្ងៃនេះ ដោយសារកម្មវិធីនេះទាក់ទងលើជំនាញដែលខ្លួនកំពុងសិក្សាជំនាញប្រព័ន្ធព័ត៌មានភូមិសាស្ត្រ (GIS) ដែលសិក្សាលើការប្រើប្រាស់បច្ចេកវិទ្យាមានដូចជា Drone, Satellite និង Sensor ជាដើម។

យុវសិស្ស គង់ ដេត បន្ថែមថា ជំនាញប្រព័ន្ធព័ត៌មានភូមិសាស្ត្រ (GIS) មានសារៈសំខាន់ណាស់សម្រាប់យុវជន បើនិយាយពីបច្ចេកវិទ្យាមិនថាបច្ចេកវិទ្យាអ្វីទេ ជាពិសេសបច្ចេកវិទ្យា GIS ឬ ArcGIS ដែលអាចប្រើកំណត់ទីតាំងនៅពេលមានការរីករាលនៃជំងឺកូវីដ-១៩ លើតំបន់ប្រឈមតិច និងតំបន់ប្រឈមច្រើន ដើម្បីមើល និងដឹងច្បាស់ឱ្យច្បាស់ពីតំបន់ប្រឈមខ្លាំងជៀសជាងការចុះទៅផ្ទាល់។ ដេត ក៏បានលើកទឹកចិត្តយុវជនឱ្យខិតខំសិក្សាលើជំនាញដែលខ្លួនកំពុងរៀន ព្រមទាំងអនុវត្តឱ្យបានច្រើនចំពោះមេរៀនបច្ចេកវិទ្យា តាមរយៈការចូលរួមសិក្ខាសាលា ការស្រាវជ្រាវតាមរយៈយូធូបជាដើម។

គួរជម្រាបជូនថា សិក្ខាសាលាបណ្តុះបណ្តាលបច្ចេកវិទ្យា និងចំណេះដឹងអំពី GIS និងការប្រើប្រាស់សុសវែរ ArcGIS Pro ធ្វើឡើងដើម្បីពង្រឹងចំណេះដឹង និងជំនាញទាក់ទងនឹង GIS ក៏ដូចជាផែនដីវិទ្យាជូននិស្សិត និងសាស្ត្រាចារ្យប្រមាណ១៥០នាក់ មកពីគ្រឹះស្ថានឧត្តមសិក្សារដ្ឋចំនួន០៤ គឺសាកលវិទ្យាល័យភូមិន្ទភ្នំពេញ,សាកលវិទ្យាល័យភូមិន្ទកសិកម្ម វិទ្យាស្ថានបច្ចេកវិទ្យាកម្ពុជា និងវិទ្យាស្ថានជាតិកសិកម្មព្រែកលៀប៕