ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ហូជីមិញ – បច្ចុប្បន្នប្រទេសវៀតណាមជាប់ចំណាត់ថ្នាក់ក្នុងតារាងកំពូលទាំង១០ នៅលើពិភពលោកទាក់ទងនឹងការចល័តនិស្សិតបន្តការសិក្សានៅក្រៅប្រទេស ដើម្បីផ្លាស់ប្តូរបទពិសោធន៍ ពង្រឹងសមត្ថភាព អភិវឌ្ឍន៍ជំនាញ និងសិក្សាភាសាបរទេស ។ ការសម្រេចចិត្តបន្តការសិក្សានៅក្រៅប្រទេសនេះ ជាឱកាសជួយឱ្យយុវជនពង្រីកសក្តានុពលផ្ទាល់ខ្លួនឱ្យកាន់តែទូលាយនៅទីផ្សារការងារក្នុងតំបន់អាស៊ី ។ នេះបើតាមការចុះផ្សាយរបស់មជ្ឈមណ្ឌលស្រាវជ្រាវការអប់រំ ICEF Monitor នៅពាក់កណ្តាលឆ្នាំ២០២៣ ។
ហេតុផលចម្បងដែលជំរុញឱ្យម្តាយឪពុក និងអាណាព្យាបាលវៀតណាម សម្រេចិត្តឱ្យកូនបន្តការសិក្សានៅក្រៅប្រទេស ក្នុងគោលដៅពង្រីកសក្តានុពលការងារកូនចៅ ។ ការសិក្សានៅក្រៅប្រទេសក៏ជាឱកាសជំរុញឱ្យយុវជនវៀតណាម អាចពង្រឹងសមត្ថភាពភាសាបរទេសបានយ៉ាងប្រសើរផងដែរ ។ ប្រទេសកូរ៉េខាងត្បូង និងជប៉ុន មានយុវជនវៀតណាមទៅបន្តការសិក្សាច្រើនជាងគេ ខណៈគុណភាពអប់រំនៅប្រទេសទាំងពីរនេះ កំពុងរីកចម្រើនប្រណាំងប្រជែងនឹងការអប់រំនៅបណ្តាប្រទេសលោកខាងលិច ។
តួលេខជាក់លាក់របស់ភ្នាក់ងារ Capstone Education មានមូលដ្ឋាននៅប្រទេសវៀតណាម បានបង្ហាញថា កូរ៉េខាងត្បូង គឺជាប្រទេសទីមួយដែលមានយុវជនចុះឈ្មោះចូលរៀន និងបន្តការសិក្សាចំនួន ៦ម៉ឺនប្រាំមួយពាន់នាក់ក្នុងឆ្នាំ២០២២ ។ ចំណែកនៅប្រទេសជប៉ុនជាប្រទេសទីបីមានសិស្សនិស្សិតវៀតណាមចុះឈ្មោះចូលរៀន និងបន្តការសិក្សាចំនួនជាង ៤ម៉ឺននាក់ក្នុងឆ្នាំ២០២១ ។
ទន្ទឹមគ្នានេះ សិស្សនិស្សិតវៀតណាមក៏បានបន្តការសិក្សានៅតាមបណ្តាប្រទេសនានា ដូចជា សហរដ្ឋអាមេរិក, អូស្ត្រាលី, តៃវ៉ាន់ , កាណាដា, ណូវេលសេឡង់, និងសាធារណៈរដ្ឋប្រជាមានិតចិន ។ ការសិក្សាបានរកឃើញថា មូលហេតុពីក្រោយខ្នងដែលជំរុញឱ្យគ្រួសារវៀតណាមបញ្ជូនកូនទៅក្រៅប្រទេស ដោយសារម្តាយឪពុកជនជាតិវៀតណាមឱ្យតម្លៃខ្ពស់ដល់គុណភាពអប់រំនៅបរទេស (ប្រទេសសេដ្ឋកិច្ចជឿនលឿន), ស្ថានភាពជីវភាពគ្រួសាររីកចម្រើន, ព្រមទាំងតម្លៃសាលាក្នុងស្រុកកើនឡើង ។
ទិន្នន័យចុងក្រោយរបស់អង្គការ UNESCO បង្ហាញថា ឆ្នាំ២០២០ និស្សិតវៀតណាមចំនួន ១៣២,៥៦០នាក់ បានចុះឈ្មោះចូលរៀនថ្នាក់ឧត្តមសិក្សានៅបរទេស ។ និស្សិតវៀតណាមបានសិក្សាមុខវិជ្ជាបម្រើដល់វិស័យជាច្រើន រាប់ទាំងកម្រិតសញ្ញាបត្រ កម្រិតជំនាញបច្ចេកទេស និងការសិក្សាភាសា ។ ជាមួយគ្នានេះ ក្រសួងអប់រំ និងបណ្តុះបណ្តាលវៀតណាម (MoET) ក៏បានទទួលស្គាល់ថា វៀតណាមមាននិស្សិតប្រហែល ១៩០,០០០ នាក់ដែលបានបន្តសិក្សានៅបរទេសក្នុងឆ្នាំសិក្សា ២០១៩ – ២០២០ ។
សូមជម្រាបថា តាមការសិក្សារបស់ធនាគារពិភពលោក (World Bank) បានរកឃើញថា កត្តារីកចម្រើនសេដ្ឋកិច្ចគ្រួសារ (គ្រួសារមានចំណូលមធ្យម) បានធ្វើឱ្យប្រជាជនវៀតណាមមានឱកាសច្រើនបញ្ជូនកូនចៅឱ្យទៅបន្តការសិក្សានៅក្រៅប្រទេស ។ នៅឆ្នាំ២០២៣ ការបង្វែរទិសដៅអប់រំកូនចៅនៅក្រៅប្រទេសជាជម្រើសពេញនិយមសម្រាប់គ្រួសារ និងយុវជនវៀតណាម ខណៈរដ្ឋាភិបាលក៏កំពុងលើកកម្ពស់គុណភាពអប់រំនៅក្នុងស្រុក ៕
