ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បេក្ខជនចូលសាកលវិទ្យាល័យវៀតណាមជាងពាក់កណ្តាលនៅឆ្នាំ២០២៦នេះ បានជ្រើសរើសសិក្សាលើមុខជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ដែលឆ្លុះបញ្ចាំងពីការកើនឡើងនៃទំនុកចិត្តលើឱកាសការងារ ស្របពេលរដ្ឋាភិបាលកំពុងបង្កើនការវិនិយោគលើការអភិវឌ្ឍធនធានមនុស្ស ដើម្បីបំពេញតម្រូវការកម្លាំងពលកម្មមានជំនាញខ្ពស់សម្រាប់ឧស្សាហកម្មយុទ្ធសាស្ត្ររបស់ប្រទេស។
យោងតាមសារព័ត៌មាន Vietnam Plus ចុះផ្សាយកាលពីពេលថ្មីៗនេះថា ក្រសួងអប់រំ និងបណ្តុះបណ្តាលវៀតណាមបានបង្ហាញថា មានបេក្ខជនប្រមាណ ៤៦៧,៦០០ នាក់ ក្នុងចំណោមបេក្ខជនចូលសាកលវិទ្យាល័យជាង ៨៧៤,៨០០ នាក់ បានចុះឈ្មោះជ្រើសរើសមុខជំនាញ STEM សម្រាប់ចូលរៀនឆ្នាំ២០២៦ ដែលស្មើនឹង ៥៣,៤៥ ភាគរយនៃបេក្ខជនសរុប។
បេក្ខជនទាំងនេះបានដាក់ជម្រើសសិក្សាទាក់ទងនឹងមុខវិជ្ជា STEM ជិត ២,៣៧ លានជម្រើស ឬប្រហែលមួយភាគបី នៃពាក្យសុំចូលសាកលវិទ្យាល័យទាំងអស់។
ក្រសួងបានឱ្យដឹងថា នេះជាលើកដំបូងដែលទិន្នន័យលម្អិតស្តីពីការជ្រើសរើសមុខជំនាញ STEM ត្រូវបានផ្សព្វផ្សាយជាសាធារណៈ។ ក្រុមអ្នកជំនាញអប់រំបានវាយតម្លៃថា និន្នាការនេះបង្ហាញពីការផ្លាស់ប្តូរយ៉ាងច្បាស់ នៃការជ្រើសរើសអាជីពរបស់យុវជន បន្ទាប់ពីមុខជំនាញផ្នែកសេដ្ឋកិច្ច និងវិទ្យាសាស្ត្រសង្គមបានទទួលការពេញនិយមអស់រយៈពេលជាច្រើនឆ្នាំ។
លោក Bui Hoai Thang ប្រធានការិយាល័យបណ្តុះបណ្តាល នៃសាកលវិទ្យាល័យបច្ចេកវិទ្យាទីក្រុងហូជីមិញ ក្រោមសាកលវិទ្យាល័យជាតិវៀតណាម-ទីក្រុងហូជីមិញ បានមានប្រសាសន៍ថា ការកើនឡើង នៃការជ្រើសរើសមុខជំនាញ STEM គឺជាលទ្ធផលនៃការគាំទ្រគោលនយោបាយរបស់រដ្ឋ ការរីកចម្រើនយ៉ាងឆាប់រហ័សនៃបច្ចេកវិទ្យា និងឱកាសការងារកាន់តែទូលំទូលាយ។
ចំណែកលោកសាស្ត្រាចារ្យ Nguyen Van Hieu អនុប្រធានសាកលវិទ្យាល័យ Phenikaa និងជាសាកលវិទ្យាធិការ នៃសាលាវិស្វកម្ម Phenikaa បានឱ្យដឹងថា អនុក្រឹត្យលេខ ១៧៩ នឹងជួយលើកទឹកចិត្តនិស្សិតដែលមានសមត្ថភាពខ្ពស់ឱ្យបន្តការសិក្សាក្នុងវិស័យ STEM តាមរយៈការពង្រឹងការយល់ដឹងអំពីអាជីពវិទ្យាសាស្ត្រ និងបច្ចេកវិទ្យា ព្រមទាំងបង្កើនការលើកទឹកចិត្តសម្រាប់បេក្ខជនដែលមានសមិទ្ធផលសិក្សាល្អ។
ទោះជាយ៉ាងណា អ្នកជំនាញបានអះអាងថា ការផ្តល់អាហារូបករណ៍តែមួយមុខមិនទាន់គ្រប់គ្រាន់សម្រាប់ការកសាងកម្លាំងពលកម្មដែលមានជំនាញខ្ពស់នោះទេ។ វៀតណាមនៅតែត្រូវបន្តវិនិយោគលើគុណភាពអប់រំ ការស្រាវជ្រាវ និងការពង្រឹងកិច្ចសហការរវាងសាកលវិទ្យាល័យ និងវិស័យឧស្សាហកម្ម ដើម្បីធានាការអភិវឌ្ឍធនធានមនុស្សប្រកបដោយចីរភាព និងគាំទ្រដល់កំណើនសេដ្ឋកិច្ចរយៈពេលវែង៕
