ក្រសួងអប់រំចិន បានចេញ​បំរាម ដោយ​ហាមឃាត់សិស្សនៅ​កម្រិត​សាលាបឋមសិក្សា ប្រើឧបករណ៍បញ្ញាសិប្បនិម្មិត (AI) ដើម្បីធ្វើកិច្ចការផ្ទះរបស់ពួកគេ ដោយសង្កត់ធ្ងន់ថា AI គួរតែបម្រើត្រឹមជាឧបករណ៍ជំនួយក្នុងការអប់រំ គឺគ្រប់គ្រាន់។

នៅក្នុងសេចក្ដីណែនាំ ដែលចេញផ្សាយកាលពីពេលថ្មីៗនេះ ក្រសួងអប់រំចិនបានបញ្ជាក់ថា សិស្សសាលាបឋមសិក្សា ត្រូវបានហាមឃាត់មិនឱ្យប្រើឧបករណ៍ AI ដើម្បីបំពេញកិច្ចការផ្ទះដោយខ្លួនឯង។ ដោយឡែក​សិស្សវិទ្យាល័យត្រូវបានអនុញ្ញាតឱ្យស្វែងយល់អំពី «រចនាសម្ព័ន្ធឡូជីខល – Logical structure» នៃមាតិកាដែលបង្កើតដោយ AI ហើយសិស្សវិទ្យាល័យ អាចប្រើប្រាស់ AI សម្រាប់សកម្មភាពសិក្សា ដែលទាក់ទងនឹងបច្ចេកវិទ្យា។

យោងតាម Global Times គ្រូបង្រៀនចិន ត្រូវបានណែនាំឱ្យធានាថា AI នៅតែជាឧបករណ៍ជំនួយ ហើយមិនត្រូវបានប្រើដើម្បីបង្កើតចំណាត់ថ្នាក់ បង្កើតចម្លើយ ឬគ្រប់គ្រងទិន្នន័យរស៊ើបនោះទេ។

ខណៈពេលដែលសាលារៀនត្រូវបានលើកទឹកចិត្តឱ្យបញ្ចូល AI ទៅក្នុងការបង្រៀន ពួកគេក៏ត្រូវតែពង្រឹងវិធានការសុវត្ថិភាពទិន្នន័យផងដែរ។ ឪពុកម្ដាយត្រូវបានជំរុញឱ្យត្រួតពិនិត្យការប្រើប្រាស់ AI របស់កូនពួកគេ ដើម្បីការពារព័ត៌មានផ្ទាល់ខ្លួន និងចៀសវាងការពឹងផ្អែកខ្លាំងលើបច្ចេកវិទ្យា។

ក្រសួងក៏បានអំពាវនាវឱ្យអាជ្ញាធរមូលដ្ឋានបង្កើតគោលនយោបាយអភិបាលកិច្ចស្របតាមបរិបទតំបន់របស់ខ្លួន រួមទាំងបទបញ្ញត្តិស្ដីពីការការពារទិន្នន័យ ក្របខ័ណ្ឌវាយតម្លៃសីលធម៌ និងបញ្ជីឧបករណ៍ AI ដែលបានអនុម័តសម្រាប់ការអប់រំ។

ការចេញផ្សាយគោលការណ៍ណែនាំទាំងនេះ កើតឡើងចំពេលមានការកើនឡើង នៃឧបករណ៍ AI ជាពិសេស ChatGPT និង DeepSeek នៅក្នុងថ្នាក់រៀន។

មន្ត្រីក្រសួងជាន់ខ្ពស់មួយរូបបានប្រាប់កាសែត China Daily ថា «AI គឺជាបច្ចេកវិទ្យាយុទ្ធសាស្ត្រ ដែលជំរុញឱ្យមានរលកថ្មី នៃការផ្លាស់ប្ដូរបច្ចេកវិទ្យា និងឧស្សាហកម្ម។ វាបានកែប្រែជីវិតរស់នៅប្រចាំថ្ងៃ និងកំណត់ការអប់រំលើដំណើរថ្មី នៃកំណែទម្រង់ និងការអភិវឌ្ឍន៍។»

មន្ត្រីរូបនេះ បន្ថែមថា ការជំរុញការអប់រំ AI គឺចាំបាច់ ដើម្បីតាមទាន់ល្បឿននៃការវិវត្តន៍បច្ចេកវិទ្យាជាសកល ជំរុញការអភិវឌ្ឍន៍ជាតិ និងការបណ្ដុះបណ្ដាលអ្នកជំនាញបច្ចេកវិទ្យា សម្រាប់អនាគត។

នៅក្នុងសារាចរណែនាំនេះ ក្រសួងបាននិយាយថា ខ្លួននឹងបង្កើនការវិនិយោគលើហេដ្ឋារចនាសម្ព័ន្ធអប់រំ AI និងបង្កើតមូលដ្ឋានអប់រំ AI ជាបណ្ដើរៗនៅក្នុងសាលាបឋមសិក្សា និងមធ្យមសិក្សា។ វាក៏ជាគម្រោងផ្ដល់ជូននូវកម្មវិធីបណ្ដុះបណ្ដាលបន្ថែមទៀត ដើម្បីជួយគ្រូបង្រៀនឱ្យយល់កាន់តែច្បាស់ និងប្រើប្រាស់ឧបករណ៍ AI ។

ការសែតចិន ស៊ីនហួរ បានរាយការណ៍ថា ពាក់ព័ន្ធនឹងការផ្លាស់ប្ដូរនេះ ទីក្រុងប៉េកាំង បានប្រកាសកាលពីខែមីនាថា ខ្លួននឹងដំណើរការវគ្គសិក្សា AI សម្រាប់សិស្សថ្នាក់បឋមសិក្សា និងមធ្យមសិក្សា។

ចាប់ពីឆមាសរដូវស្លឹកឈើជ្រុះខាងមុខនេះ សាលារៀននានានៅទូទាំងទីក្រុងប៉េកាំងនឹងដំណើរការបង្រៀន AI យ៉ាងហោចណាស់ ៨ម៉ោង ក្នុងមួយឆ្នាំសិក្សា។

យោងតាមផែនការការងារ ដែលបានចេញផ្សាយនាពេលថ្មីៗនេះ នៅលើគេហទំព័រផ្លូវការរបស់គណៈកម្មការអប់រំក្រុងប៉េកាំង មេរៀនទាំងនេះ អាចត្រូវបានបង្រៀនជាវគ្គដាច់ដោយឡែក ឬបញ្ចូលទៅក្នុងមុខវិជ្ជាព័ត៌មានវិទ្យា៕