វៀតណាម – បច្ចុប្បន្នប្រជាជនវៀតណាមមានចំនួនប្រមាណជាង ៩៨លាននាក់ ។ ប្រទេសវៀតណាមមានប្រជាជនច្រើនជាងគេទី២ ក្នុងតំបន់អាស៊ីអាគ្នេយ៍បន្ទាប់ពីប្រទេសឥណ្ឌូនេស៊ីដែលមានប្រជាជនប្រមាណជាង ២២៣លាននាក់ ។ រយៈពេលប៉ុន្មានឆ្នាំចុងក្រោយនេះ យុវជនវៀតណាមមាននិន្នាការរៀនភាសាបរទេស និងបន្តការសិក្សារបស់ខ្លួននៅក្រៅប្រទេសកាន់តែច្រើនក្រោមហេតុផលពង្រីងសមត្ថភាពការងារ និងត្រៀមខ្លួនសម្រាប់ទីផ្សារការងារក្នុងតំបន់ ។

ការចុះផ្សាយរបស់សារព័ត៌មាន VN Express នៅក្នុងសប្តាហ៍នេះ បានឱ្យដឹងថា គិតត្រឹមពាក់កណ្តាលឆ្នាំ២០២៣ វៀតណាមមានអ្នកសិក្សាភាសាកូរ៉េច្រើនជាងគេក្នុងតំបន់អាស៊ីអាគ្នេយ៍ ។ យុវជនវៀតណាមកាន់តែច្រើនឡើងកំពុងចាប់អារម្មណ៍សិក្សារៀនភាសាកូរ៉េ ។ ប្រទេសវៀតណាមមានសាលាបង្រៀនភាសាកូរ៉េផ្លូវការចំនួន៦០ និងអ្នកសិក្សាចំនួនជាង ៥ម៉ឺននាក់ ។

មូលហេតុចម្បងដែលជំរុញឱ្យយុវជនវៀតណាមចាប់ផ្តើមសិក្សាភាសាកូរ៉េ ដោយសារពួកគេសំឡឹងឃើញបានឱកាសការងារជាច្រើន តាមរយៈក្រុមហ៊ុនកូរ៉េខាងត្បូងកំពុងវិយោគនៅក្នុងប្រទេសវៀតណាម ។ ទន្ទឹមគ្នានេះ យុវជនវៀតណាមយល់ឃើញថា ភាសាកូរ៉េនឹងជួយឱ្យពួកគេមានឱកាសបន្តការសិក្សាជំនាញផ្សេងៗកាន់ទូលំទូលាយនៅប្រទេសកូរ៉េខាងត្បូង និងសិក្សាពីវប្បធម៌កូរ៉េបានយ៉ាងស៊ីជម្រៅផងដែរ ។

ការសិក្សាភាសាកូរ៉េកំពុងផ្តល់ឱកាសការងារក្នុងស្រុក និងក្នុងតំបន់កាន់តែច្រើនសម្រាប់ប្រជាជនវៀតណាម ។ ជាក់ស្តែងប្រទេសវៀតណាមមានក្រុមហ៊ុនកូរ៉េជាច្រើនកំពុងចូលមកវិនិយោគ ដូចជា ក្រុមហ៊ុន SAMSUNG, LG, និង Hyundai ជាដើម ។ ក្រុមហ៊ុនទាំងនេះ បានប្រើប្រាស់កម្លាំងពលកម្មវៀតណាមស្ទើរតែទាំងស្រុក ហើយបានផ្តល់លទ្ធភាពកាន់តែទូលាយសម្រាប់អ្នកចេះភាសាកូរ៉េ ។ ប្រទេសកូរ៉េខាងត្បូងជាដៃគូពាណិជ្ជកម្មដ៏ធំរបស់វៀតណាម ដែលមានទំហំទឹកប្រាក់វិនិយោគសរុបប្រមាណជាង ៨២ពាន់លានដុល្លារអាមេរិក ។

សូមជម្រាបថា ដោយសារសក្តានុពលវិយោគលើវិស័យសេដ្ឋកិច្ចរវាងប្រទេសទាំងពីរ ព្រមទាំងកំណើននៃការសិក្សាភាសាកូរ៉េរីកចម្រើននៅក្នុងប្រទេសវៀតណាម កាលពីថ្ងៃ២២ ខែមិថុនាកន្លងទៅ លោកប្រធានាធិបតីកូរ៉េខាងត្បូង Yoon Suk-yeol និងភរិយាបានទៅបំពេញទស្សនកិច្ចនៅវៀតណាម។

នៅទីក្រុងហានណូយ លោកប្រធានាធិបតី Yoon Suk-yeol បានទៅជួបយុវជនសាកលវិទ្យាល័យជាតិវៀតណាម (Vietnam National University) ហើយបាននិយាយថា ភាសាកូរ៉េកំពុងក្លាយជាភាសាមានប្រជាប្រិយភាពសម្រាប់យុវជនវៀតណាម ។ វាមិនមែនសម្រាប់តែនិស្សិតសាកលវិទ្យាល័យនោះទេ ភាសាកូរ៉េកំពុងទទួលបានការគាំទ្រពីសិស្សវិទ្យាល័យ និងអនុវិទ្យាល័យផងដែរ ។

គួររំលឹកថយក្រោយបន្តិចដែរ នៅក្នុងឆ្នាំ១៩៩៣ ប្រទេសវៀតណាមមានសាកលវិទ្យាល័យជាតិតែពីរគត់ដែលបានបើកថ្នាក់បង្រៀនភាសាកូរ៉េដំបូងគេ គឺសាកលវិទ្យាល័យហាណូយ និងសកលវិទ្យាល័យហូជីមិញ ។ បច្ចុប្បន្ននៅក្នុងប្រទេសវៀតណាមមានសាកលវិទ្យាល័យ និងវិទ្យាស្ថានចំនួន៦០ បានដាក់បញ្ចូលមុខវិជ្ជាភាសាកូរ៉េចូលទៅក្នុងកម្មវិធីសិក្សារបស់ខ្លួន ៕