ភ្នំពេញ – ក្នុងពិធីប្រកាសជ័យលាភីយុវជនមេត្រីបរិស្ថានក្នុងការប្រកួតប្រជែងរកស្នាដៃ និងគំនិតប្រឌិត យុទ្ធនាការកាត់បន្ថយការទិញ និងហូបសាច់សត្វព្រៃ និងយុទ្ធនាការបញ្ឈប់ការចោលសំរាមមិនត្រឹមត្រូវ កាលពីថ្ងៃទី១៤ ខែកក្កដា ឆ្នាំ២០២៣កន្លងទៅ លោកស្រី Kerry Pelzman នាយិកាបេសកកម្មនៃទីភ្នាក់ងារជំនួយអាមេរិក USAID មានប្រសាសន៍ថា យុទ្ធនាការដែលដឹកនាំដោយយុវជននេះ នឹងជំរុញប្រជាពលរដ្ឋកម្ពុជា ជាពិសេសយុវជនឱ្យនិយាយថាទេចំពោះសាច់សត្វព្រៃ និងបញ្ឈប់ការចោលសំរាមមិនបានត្រឹមត្រូវ។

លោកស្រី Kerry_Pelzman បានមានប្រសាសន៍ថា ការទិញនិងហូបសាច់សត្វព្រៃ គំរាមកំហែងយ៉ាងធ្ងន់ធ្ងរដល់ការរស់រានមានជីវិតរបស់សត្វព្រៃ និងប្រព័ន្ធអេកូឡូស៊ីរបស់ប្រទេសកម្ពុជា ក៏ដូចជាសុខភាពរបស់មនុស្សផងដែរ។ ទន្ទឹមគ្នានេះ ការទុកដាក់សំរាមមិនបានត្រឹមត្រូវ ប៉ះពាល់ដល់បរិស្ថាន សុខភាពមនុស្ស សត្វព្រៃ ក៏ដូចជាសកម្មភាពសេដ្ឋកិច្ច និងតម្លៃនៃធនធាន ។

យើងសង្ឃឹមថា យុទ្ធនាការដែលដឹកនាំដោយយុវជននេះ នឹងជំរុញប្រជាពលរដ្ឋកម្ពុជា ជាពិសេសយុវជន ឱ្យនិយាយថា ទេ ចំពោះសាច់សត្វព្រៃ និងបញ្ឈប់ការចោលសំរាមមិនបានត្រឹមត្រូវ

លោកស្រី Kerry Pelzman នាយិកាបេសកកម្មនៃទីភ្នាក់ងារជំនួយអាមេរិក USAID

ជាមួយគ្នានេះ ការប្រកួតប្រជែងរកស្នាដៃ និងគំនិតច្នៃប្រឌិតក្នុងយុទ្ធនាការទាំងពីរនេះ បានដំណើរការពីខែមេសា ឆ្នាំ២០២២ ដល់ ខែកុម្ភៈ ឆ្នាំ២០២៣ បានចូលរួមលើកទឹកចិត្ត បេក្ខនារី និងបេក្ខជន ឱ្យផលិត និងផ្សព្វផ្សាយសម្ភារដែលមានគំនិតច្នៃប្រឌិត និងទាក់ទាញ ក្នុងបំណងលើកកម្ពស់ការយល់ដឹងអំពីតម្លៃសត្វព្រៃ និងផលប៉ះពាល់អវិជ្ជមាននៃការបាត់បង់សត្វព្រៃ និងផលប៉ះពាល់ពីការទុកដាក់សំរាមមិនបានត្រឹមត្រូវ ដល់បរិស្ថាន សត្វព្រៃ និងមនុស្ស។

យុវជន ឌុច ច័ន្ទសុវិជ្ជា ម្ចាស់ជ័យលាភីលេខមួយ នៃយុទ្ធនាការបញ្ឈប់ការចោលសំរាមមិនត្រឹមត្រូវ បានលើកឡើងថា ការគ្រប់គ្រងកាកសំណល់ មិនត្រឹមតែជួយការពារបរិស្ថានប៉ុណ្ណោះទេ ថែមទាំងបង្ហាញថា អ្នកជាមនុស្សបែបណាផងដែរ។ ច័ន្ទសុវិជ្ជា ក៏បានសំណូមពរឱ្យមនុស្សគ្រប់គ្នាចូលរួមទាំងអស់គា្ន ទុកដាក់សំរាមឱ្យបានត្រឹមត្រូវ នាពេលបច្ចុប្បន្ន ដើម្បីប្រយោជន៍អនាគតនៃផែនដីយើង។

ដោយឡែក យុវតី កៅ ម៉េងហ័ង ម្ចាស់ជ័យលាភីលេខបី នៃយុទ្ធនាការកាត់បន្ថយការទិញ និងហូបសាច់សត្វព្រៃ បានលើកឡើងថា ក្នុងនាមជាយុវជន រូបគេគិតថាការរួមចំណែកកាត់បន្ថយការទិញ និងហូបសាច់សត្វព្រៃមានសារសំខាន់ណាស់ ព្រោះសត្វព្រៃបានផ្តល់ប្រយោជន៍ជាច្រើនដល់បរិស្ថានយើង ប៉ុន្តែវាកំពុងតែងរងគ្រោះ។ នេះមានន័យថា សត្វព្រៃនៅតែបន្តរងការគំរាមកំហែងដោយសារមានតម្រូវការហូប និងទិញសាច់សត្វព្រៃ ដែលអាចធ្វើឱ្យសត្វព្រៃបាត់បង់រហូតដល់ផុតពូជបាន ប៉ុន្តែអាចបញ្ឈប់ទង្វើនេះបាន។

ផ្តើមចេញពីខ្លួនយើង គ្រួសារយើង ដើម្បីការពារសត្វព្រៃ និងតុល្យភាពប្រព័ន្ធអេកូឡូស៊ីនៅកម្ពុជា

យុវតី កៅ ម៉េងហ័ង ម្ចាស់ជ័យលាភីលេខបី នៃយុទ្ធនការកាត់បន្ថយការទិញ និង​ហូបសាច់សត្វព្រៃ

យោងតាមអង្គការសហប្រជាជាតិ ជារៀងរាល់ឆ្នាំ មានប្លាស្ទិកពី ១៩ ទៅ ២៣ លានតោន ត្រូវបានបោះចោល ឬហូរចូលទៅក្នុងបឹង ទន្លេ និងមហាសមុទ្រ ដែលបានបង្កគ្រោះថ្នាក់ យ៉ាងធ្ងន់ធ្ងរដល់ទាំងមនុស្សនិងសត្វដែលរស់នៅក្នុងទឹក។ ទន្ទឹមគ្នានេះ ប្លាស្ទិកត្រូវការពេលប្រហែល១ពាន់ឆ្នាំ ដើម្បីរលាយនៅទីលានចាក់សំរាម ហើយវានឹងមិនងាយបំបែកធាតុឡើយ ប៉ុន្តែវានឹងបំបែកធាតុក្លាយជាមីក្រូប្លាស្ទិកដែលអាចបង្កភាពមហន្តរាយយ៉ាងធ្ងន់ធ្ងរ ដល់បរិស្ថាន។

ឆ្លើយតបទៅនឹងបញ្ហានេះ សកម្មភាពងាយៗដែលយើងអាចធ្វើបាន គឺយើងអាចចាប់ផ្តើមពីការប្រើប្រាស់ដបទឹក ថង់ឬកាបូប និងបំពង់បឺតបរិស្ថាន ដែលមិនបង្កផលប៉ះពាល់ខ្លាំងដល់បរិស្ថាន ជំនួសឱ្យការប្រើប្រាប់ដបទឹក ថង់ និងបំពង់បឺតប្លាស្ទិក។ លើសពីនេះ យើងអាចអនុវត្តវិធីសាស្ត្រ 4Rs ដោយ បដិសេធ កាត់បន្ថយ ប្រើប្រាស់ឡើងវិញ និងកែច្នៃផ្លាស្ទិកឡើងវិញ មិនតែប៉ុណ្ណោះយើងក៏អាចចូលរួមក្នុងការផ្សព្វផ្សាយ ការយល់ដឹងអំពី 4Rs បន្ថែមទៀត ផងដែរ។

គួរជម្រាបជូនថា ពិធីប្រកាសជ័យលាភីយុវជនមេត្រីបរិស្ថាននេះ បង្ហាញពីការប្ដេជ្ញាចិត្តរបស់ស្ថានទូតអាមេរិក និងរដ្ឋាភិបាលសហរដ្ឋអាមេរិក ក្នុងការលើកកម្ពស់កិច្ចគាំពារបរិស្ថាន ការប្រើប្រាស់ធនធានធម្មជាតិប្រកបដោយនិរន្តភាព និងសកម្មភាពជាវិជ្ជមានពីសាធារណជន ក្នុងការអភិរក្សកេរ្ដិ៍ដំណែលធម្មជាតិដ៏សម្បូរបែបរបស់កម្ពុជា ដើម្បីជាប្រយោជន៍ដល់ប្រជាពលរដ្ឋគ្រប់រូប ក៏ដូចជាកូនចៅជំនាន់ក្រោយៗទៀត៕