ក្រសួងអប់រំជប៉ុន គ្រោងនឹងបន្ធូរបន្ថយកម្រិតនៃការចុះឈ្មោះចូលរៀននៅសាកលវិទ្យាល័យសម្រាប់និស្សិតអន្តរជាតិចាប់ពីឆ្នាំ២០២៦ ដោយអនុញ្ញាតឱ្យដេប៉ាតឺម៉ងសិក្សាក្នុងសាកលវិទ្យាល័យធំៗ ពង្រីកលទ្ធភាពទទួលនិស្សិតចូលរៀន ក្នុងគោលបំណងទាក់ទាញមនុស្សពូកែមកពីជុំវិញពិភពលោកឱ្យកាន់តែច្រើន។

នៅក្រោមគោលនយោបាយថ្មី ដេប៉ាតឺម៉ង់ នៅតាមបណ្ដាសាកលវិទ្យាល័យ ដែលមានកូតាអនុញ្ញាតឱ្យទទួលសិស្សចុះឈ្មោះចូលរៀនចាប់ពី ៣០០នាក់ឡើងទៅ នឹងត្រូវអនុញ្ញាតឱ្យចុះឈ្មោះជិត ១១០ភាគរយ នៃសមត្ថភាពផ្លូវការររបស់ខ្លួន ពោលគឺកើនឡើងលើចំនួន​ ដែលបានកំណត់បច្ចុប្បន្ន ១០៥ភាគរយ។

យោងតាមក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យា បានឱ្យដឹងថា ការផ្លាស់ប្ដូរនេះ មានគោលបំណងលើកកម្ពស់ការប្រកួតប្រជែងជាសាកលរបស់សាកលវិទ្យាល័យជប៉ុន ដោយសារប្រទេសនេះ ដើរយឺតជាងប្រទេសជឿនលឿនជាច្រើនទៀត ជាពិសេសគឺ អង់គ្លេស និងកាណាដា ដែលបានទាក់ទាញនិស្សិតអន្តរជាតិបានយ៉ាងច្រើន, នេះបើយោងតាមក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យាជប៉ុន ដែលដកស្រង់ដោយ កាសែត The Straits Times ។

មានតែសាកលវិទ្យាល័យដែលបំពេញតាមលក្ខណៈវិនិច្ឆ័យជាក់លាក់ ដូចជា អត្រាចុះឈ្មោះខ្ពស់ជាប់លាប់ មានជំហរហិរញ្ញវត្ថុត្រឹមត្រូវ និងលិខិតថ្កោលទោស ដែលបញ្ជាក់ពីភាពស្អាតស្អំរយៈពេល ៣ឆ្នាំ នឹងមានសិទ្ធិចូលរៀនបាន។ ស្ថាប័នដែលមានសិទ្ធិទាំងអស់ ត្រូវដាក់សំណើរលម្អិត ដែលគូសបញ្ជាក់អំពីយុទ្ធសាស្ត្រ ដើម្បីបង្កើនចំនួននិស្សិតអន្តរជាតិ។

NHK បានរាយការណ៍ថា ក្រសួងនឹងពិនិត្យយ៉ាងដិតដល់នូវផែនការទាំងនេះ ដោយយកចិត្តទុកដាក់ជាពិសេស ទៅលើអត្រាបោះបង់ការសិក្សារបស់សិស្ស និងការត្រៀមលក្ខណៈហិរញ្ញវត្ថុ។

ប្រទេសជប៉ុន មានមហិច្ឆតា បង្កើនចំនួនការចុះឈ្មោះរបស់និស្សិតអន្តរជាតិឱ្យបានកាន់តែច្រើន។ នៅឆ្នាំ ២០២២ រដ្ឋាភិបាលបានកំណត់គោលដៅ នៃការស្ដារចំនួននិស្សិតឱ្យលើសចំនួន មុនការរីករាលដាលជំងឺកូវីដ ១៩ ដែលមាននិស្សិតចំនួន ៣១២,០០០នាក់ នៅឆ្នាំ២០២៧។

គោលបំណងរយៈពេលខ្លីនេះ គឺជាផ្នែកមួយនៃយុទ្ធសាស្ត្រដែលមានលក្ខណៈទូលំទូលាយ​ ដើម្បីអាចទទួលបាននិស្សិតអន្តរជាតិចំនួន ៤០ម៉ឺននាក់ នៅឆ្នាំ២០៣៣, នេះបើយោងតាម ICEF Monitor ដែលជាធនធានស៊ើបការណ៍ទីផ្សារសម្រាប់វិស័យអប់រំអន្តរជាតិ។

ទិន្នន័យចុងក្រោយបំផុតពីអង្គការសេវាកម្មនិស្សិតជប៉ុន (JASSO) បង្ហាញថា ប្រទេសជប៉ុន បានសម្រេចផែនការលើសពីគោលដៅដំបូងរបស់ខ្លួនរួចទៅហើយ ដោយទទួលបាននិស្សិតអន្តរជាតិចំនួន ៣៣៦,៧០៨នាក់ កាលពីឆ្នាំមុន។ ការកើនឡើងនេះ មានអត្រា ២១ភាគរយ ជារៀងរាល់ឆ្នាំ និងជាកម្រិតខ្ពស់បំផុតមិនធ្លាប់មាន។

និស្សិតអន្តរជាតិជនជាតិអាស៊ី គឺមានជាង ៩២,៥ភាគរយ នៃចំនួននិស្សិតអន្តរជាតិ ដែលសិក្សាក្នុងប្រទេសជប៉ុន។ ជនជាតិចិន មានចំណែកធំបំផុត ដោយមានចំនួន ១២៣,៤៨៥នាក់ បន្ទាប់មកគឺប្រទេសនេប៉ាល់ (៦៤,៨១៦នាក់) វៀតណាម (៤០,៣២៣នាក់) មីយ៉ាន់ម៉ា (១៦,៥៩៦នាក់)​ និងកូរ៉េខាងត្បូង (១៤,៥៧៩នាក់)។ ប្រទេសទាំង ៥នេះ មានចំនួនជិត ៨០ភាគរយ នៃចំនួននិស្សិតអន្តរជាតិសិក្សានៅជប៉ុនឆ្នាំ ២០២៤៕