បរទេស ៖រដ្ឋាភិបាលឥណ្ឌូនេស៊ីនឹងបង្កើតបញ្ជីឈ្មោះជាតិ ដើម្បីកត់ត្រាស្ថិតិស្ដីពីការប៉ុនប៉ងធ្វើអត្តឃាត និងធ្វើអត្តឃាតជោគជ័យ ដែលនេះគឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលក្នុងការបង្ការ ការធ្វើអត្តឃាតដែល​កំពុងកើនឡើងក្នុងប្រទេស។ 

ការចុះបញ្ជីនេះ ស្ថិតក្នុងចំណោមគោលនយោបាយសុខភាពជាច្រើន ដែលមាននៅក្នុងបទបញ្ញត្តិថ្មី ចេញផ្សាយដោយប្រធានាធិបតី Joko Widodo កាលពីចុងខែមុន (ថ្ងៃទី៣០ ខែកក្កដា), នេះបើយោងតាមទីភ្នាក់ងារសារព័ត៌មានឥណ្ឌូនេស៊ី Kompas បានរាយការណ៍។ 

ការចុះបញ្ជីត្រូវបានគេរំពឹងថា នឹងរួមបញ្ចូលទិន្នន័យលម្អិតមួយចំនួនដូចជា ភេទ អាយុ ទីតាំង វិធីសាស្ត្រធ្វើអត្តឃាត និងកត្តាហានិភ័យ ដែលជំរុញបុគ្គលម្នាក់សម្រេចចិត្តធ្វើអត្តឃាត។ 

យោងតាមលទ្ធផលស្រាវជ្រាវមួយ ដែលចេញផ្សាយក្នុងខែកុម្ភៈ បានបង្ហាញថា ជនជាតិឥណ្ឌូនេស៊ីធ្វើអត្តឃាត ដែលមិនបានរាយការណ៍មានប្រហែល ៨៦០ភាគរយនៅទូទាំងប្រទេស។ នេះបើផ្អែកលើទិន្នន័យពីឆ្នាំ២០១៦ ដល់ឆ្នាំ២០១៨។ ហេតុផល គឺរួមមានការស្នើសុំមិនរាយការណ៍ពីសំណាក់សាច់ញាតិ និងការមិនចាប់អារម្មណ៍ស៊ើបអង្កេតពីសំណាក់ប៉ូលីស។

ព័ត៌មានភាគច្រើននឹងទទួលបានពីប៉ូលីសជាតិឥណ្ឌូនេស៊ី (Polri) ប្រជាជន និងកំណត់ត្រាស៊ីវិល និងទីភ្នាក់ងារដែលពាក់ព័ន្ធក្នុងការប្រមូលទិន្នន័យ ដូចជាភ្នាក់ងារសេវាសុខភាពជាដើម។

បទបញ្ជារបស់ប្រធានាធិបតីក៏បានគូសបញ្ជាក់ផងដែរ អំពីវិធានការកាត់បន្ថយ និងទប់ស្កាត់ការធ្វើអត្តឃាត ដោយតម្រូវឱ្យប្រព័ន្ធផ្សព្វផ្សាយធំៗ និងបណ្ដាញសង្គម ត្រូវផ្សព្វផ្សាយអំពីការធ្វើអត្តឃាតប្រកបដោយទំនួលខុសត្រូវ ក៏ដូចជា បង្កើនការណែនាំស្ដីពីការកាត់បន្ថយគំនិតនៃការធ្វើបាបខ្លួនឯង តាមរយៈការអភិវឌ្ឍជំនាញបំណិនជីវិត ជំនាញសង្គម និងការគ្រប់គ្រងអារម្មណ៍។

តាមការណែនាំ អ្នកដែលមានហានិភ័យធ្វើអត្តឃាត គួរតែត្រូវបានតាមដាន ឬដាក់កម្រិតក្នុងការប្រើប្រាស់សម្ភារៈ ឧបករណ៍ ឬរបស់របរផ្សេងៗ ដែលផ្ដល់ភាពងាយស្រួលសម្រាប់ពួកគេធ្វើសកម្មភាព។ រដ្ឋាភិបាលឥណ្ឌូនេស៊ី បានផ្ដល់ឱ្យប្រជាជនគ្រប់រូបនូវលទ្ធភាពទទួលបានសេវាប្រឹក្សាផ្លូវចិត្ត តាមរយៈខ្សែទូរស័ព្ទបន្ទាន់ ដើម្បីការពារការធ្វើអត្តឃាត។

ភ្នាក់ងាររដ្ឋាភិបាលដែលពាក់ព័ន្ធនឹងបញ្ហានេះ នឹងការពារអ្នកដែលមានបញ្ហាផ្លូវចិត្ត ពីការបោះបង់ចោល ការឃុំទុក ឬចាក់ច្រវាក់ក្នុងផ្ទះ និងការទទួលរងនូវអំពើហិង្សា។ នេះបើតាមបទបញ្ញាត្តិសុខភាពឥណ្ឌូនេស៊ីបានបង្ហាញ។

អត្រាប៉ុនប៉ងធ្វើអត្តឃាតរបស់ជនជាតិឥណ្ឌូនេស៊ី គឺ ២,២៥ដង ក្នុងចំណោមមនុស្ស ១០ម៉ឺននាក់។ នេះបើយោងតាមការសិក្សាមួយដែលមានចំណងជើងថា «ប្រវត្តិរូបស្ថិតិការធ្វើអត្តឃាតដំបូងរបស់ឥណ្ឌូនេស៊ី ៖ ការវិភាគលើអត្រាធ្វើអត្តឃាត និងការប៉ុនប៉ង» ក្នុងនោះស្ត្រីមានអត្រា ១ ដង និងបុរសមានអត្រា ២,១១ ដង។

ក្នុងចំណោមអ្នកធ្វើអត្តឃាតទូទាំងប្រទេស អត្រាអ្នកធ្វើអត្តឃាតមានខ្ពស់បំផុតនៅ កោះបាលី កោះរីអ៊ូ (ទីក្រុង យ៉ូហ្គីយ៉ាកាតា) កោះជ្វាភាគកណ្ដាល និងកោះកាលីម៉ានតាន់ភាគកណ្ដាល។ នេះបើយោងតាមការសិក្សាមួយ ដែលបានចេញផ្សាយនៅក្នុង The Lancet Regional Health Asia Southeast Asia៕