ប្រធានាធិបតីបារាំងលោក Emmanuel Macron បានប្រកាសពីកិច្ចសន្យាក្នុងការវិនិយោគបច្ចេកវិទ្យាបញ្ញាសិប្បនិម្មិត (AI) របស់បារាំង ដែលមានតម្លៃ ១០៩ ពាន់លានយូរ៉ូ (១១២ ពាន់លានដុល្លារ) ខណៈដែល អឺរ៉ុបកំពុងស្វែងរកកន្លែងឈរជើងក្នុងឧស្សាហកម្ម AI ដែលកំពុងត្រួតត្រាដោយ អាមេរិក និងចិន, នេះបើតាមការចេញផ្សាយដោយ សារព័ត៌មាន Reuters និង Financial times។

លោក Macron បានបង្ហាញពីមូលនិធីគាំទ្រថ្មីនៅក្នុងកិច្ចប្រជុំកំពូលសកម្មភាព AI នៅទីក្រុងប៉ារីស កាលពីថ្ងៃចន្ទ។ ការផ្ដួចផ្ដើមគំនិតវិនិយោគនេះ កើតឡើងបន្ទាប់ពីប្រធានាធិបតីអាមេរិក លោក Donald Trump បានបង្ហាញការសាទរចំពោះគម្រោងហេដ្ឋរចនាសម្ព័ន្ធ AI ដែលមានតម្លៃ ៥០០ពាន់លានដុល្លារ ដែលត្រូវបានគេស្គាល់ថា Stargate ត្រូវបានសាងសង់ក្នុងសហរដ្ឋអាមេរិក ដោយ OpenAI និង SoftBank ។

ស្របពេលជាមួយគ្នានេះ ក្រុមហ៊ុនបច្ចេកវិទ្យាធំៗ ដូចជា Google, Amazon, Microsoft និង Meta បានចំណាយដើមទុនវិនិយោគ AI សរុបប្រមាណជា ៣០០ពាន់លានដុល្លារ សម្រាប់ឆ្នាំ ២០២៥។

ជាមួយនឹងការរីកចម្រើន ក្នុងវិស័យ​ AI នៅអាមេរិក ក្រុមហ៊ុនចិន DeepSeek កំពុងបោះជំហានយ៉ាងធំក្នុងការអភិវឌ្ឍបច្ចេកវិទ្យា AI ដែលមានតម្លៃទាប ប៉ុន្តែមានការប្រកួតប្រជែងខ្ពស់ ខណៈដែលក្រុមហ៊ុន Huawei ក៏កំពុងវិនិយោគខ្លាំងក្នុងការផលិតបន្ទះឈីប ដែលអាចប្រកួតប្រជែងជាមួយក្រុមហ៊ុននាំមុខក្នុងទីផ្សារ Nvidia។

ក្នុងបរិយាកាស ដែលមានការប្រកួតប្រជែងខ្ពស់បែបនេះ លោក Macron បានលើកឡើង នៅក្នុងកិច្ចសម្ភាសន៍ជាមួយទូរទស្សន៍ France 2 កាលពីសប្ដាហ៍កន្លងទៅថា អឺរ៉ុប និងបារាំង ត្រូវតែពន្លឿនការវិនិយោគរបស់ខ្លួន ក្នុងឧស្សាហកម្ម AI ។

គម្រោង AI ដែលមានតម្លៃ ១០៩ ពាន់លានអឺរ៉ូ ក្នុងប្រទេសបារាំង គឺផ្ដោតសំខាន់លើការកសាងហេដ្ឋារចនាសម្ព័ន ដូចជា បច្ចេកវិទ្យា Computer Cluster និងមជ្ឈមណ្ឌលទិន្នន័យ ដែលមានសមត្ថភាពកម្រិត gigawatts ក្នុងគោលបំណងប្រកួតប្រជែងជាមួយការពង្រីកសមត្ថភាព ដ៏ធំរបស់អាមេរិក។

លោក Macron បានបង្ហាញការប្ដេជ្ញាចិត្តថា បារាំង និងអឺរ៉ុប នឹងមិនមើលរំលងការប្រកួតប្រជែង ដើម្បីអភិវឌ្ឍ និងធ្វើពាណិជ្ជកម្មបច្ចេកវិទ្យាទំនើបនោះទេ។ ខណៈក្រុមហ៊ុនវិនិយោគ Brookfield របស់កាណាដា បានប្រកាសវិនិយោគទឹកប្រាក់ ២០ពាន់លានអឺរ៉ូ ដើម្បីសាងសង់ហេដ្ឋារចនាសម្ព័ន្ធ AI ក្នុងប្រទេសបារាំង។

គម្រោងនេះ ត្រូវបានគាំទ្រ ដោយក្រុមហ៊ុនអឺរ៉ុប ជាង ៦០ រួមទាំងក្រុមហ៊ុនផលិតរថយន្តអាល្លឺម៉ង់ Volkswagen ក្រុមហ៊ុនស្ទ្រីមតន្ត្រីស៊ុយអែត Spotify និងក្រុមវិនិយោគអ៊ីតាលី-ហូឡង់ Exor ។ ក្រុមហ៊ុនទាំងនេះកំពុងសន្យាថានឹង «បង្កើនល្បឿន និងទទួលយក AI» ប៉ុន្តែមិនបានប្តេជ្ញាចិត្តចំពោះការចំណាយជាក់លាក់លើបច្ចេកវិទ្យានេះទេ។

ការចាប់ផ្ដើមអភិវឌ្ឍ AI នៅអឺរ៉ុប មានការយឺតយ៉ាវជាងអាមេរិក និងចិន ព្រោះអឺរ៉ុបប្រឈមនឹងកង្វះមូលនិធិគាំទ្រសម្រាប់ផលិត លទ្ធភាពទទួលបានកុំព្យូទ័រ ដែលមានថាមពលខ្លាំង និងកង្វះភាពច្បាស់លាស់អំពីរបៀបគ្រប់គ្រង AI ៕