ភាពជឿនលឿន នៃបច្ចេកវិទ្យា រួមទាំងវត្តមាននៃបញ្ញាសិប្បនិមិត្ត កំពុងផ្តល់មធ្យោបាយថ្មីៗយ៉ាងសម្បូរបែបដល់ឧក្រិដ្ឋជនតាមអ៊ីនធឺណិត ដើម្បីវាយប្រហារ ឬលួចទិន្នន័យលើប្រព័ន្ធអនឡាញ។ ខណៈដែលគ្រប់វិស័យទាំងអស់សុទ្ធតែប្រឈមនឹងហានិភ័យនៃការវាយប្រហារពីពួកឧក្រិដ្ឋជន ការស្រាវជ្រាវថ្មីមួយបានបង្ហាញវិស័យធំៗមួយចំនួនដែលមានហានិភ័យខ្ពស់ជាងគេ ក្នុងការវាយប្រហារ។

អ្នកវិភាគនៅ checkpoint.com បានរកឃើញថា ស្ថាប័នអប់រំ និងស្រាវជ្រាវ ប្រឈមមុខនឹងហានិភ័យខ្ពស់បំផុត ដែលងាយរងការវាយប្រហារតាមអ៊ីនធឺណិតនៅក្នុងត្រីមាសទី១ ឆ្នាំ ២០២៣។ ទិន្នន័យបង្ហាញថា វិស័យនេះបានប្រឈមមុខនឹង “ការវាយប្រហារជាមធ្យម ២,៥០៧ ក្នុងមួយអង្គភាពក្នុងមួយសប្តាហ៍ ដែលសម្គាល់ការកើនឡើង ១៥ % បើប្រៀបធៀបទៅនឹងត្រីមាសទី១ឆ្នាំ២០២២។ ការសិក្សារបស់ Checkpoint បង្ហាញថា ស្ថាប័នអប់រំជាច្រើននៅតែ ពិបាកក្នុងការធានាឱ្យបាននូវសុវត្ថិភាពប្រព័ន្ធរបស់ខ្លួន បន្ទាប់ពីការផ្លាស់ប្តូរទៅការរៀនពីចម្ងាយក្នុងអំឡុងពេលជំងឺរាតត្បាត។

រីឯស្ថាប័នរដ្ឋាភិបាល និងយោធា ក៏កំពុងស្ថិតក្នុងហានិភ័យនៃវាយប្រហារ ដោយឧក្រិដ្ឋជនតាមអ៊ីនធឺណិតផងដែរ ដោយការវាយប្រហារបានកើនឡើងដល់ ១,៧២៥ ​​ក្នុងត្រីមាសទីមួយនៃឆ្នាំ ២០២៣។ នោះ​គឺ​ជា​ការ​កើន​ឡើង ៣% ធៀប​នឹង​ឆ្នាំ​មុន។ ចំណែកវិស័យសុខាភិបាល ការទំនាក់ទំនង និងធនាគារក៏ជាគោលដៅដ៏ធំមួយរបស់ក្រុមឧក្រិដ្ឋជនដែរ។

ទិដ្ឋភាពហានិភ័យនៃឧក្រិដ្ឋកម្មតាមអ៊ីនធឺណិត

បច្ចេកវិទ្យាទំនើបគ្រាន់តែជាកត្តាមួយនៅពីក្រោយហានិភ័យនៃឧក្រិដ្ឋកម្មតាមអ៊ីនធឺណិតដែលកំពុងកើនឡើងប៉ុណ្ណោះ។ Global Cybersecurity Outlook 2023 របស់វេទិកាសេដ្ឋកិច្ចពិភពលោក (WE Forum) បានបង្ហាញថា អស្ថិរភាពភូមិសាស្ត្រនយោបាយពិភពលោក និងកង្វះអ្នកជំនាញក្នុងការបំពេញការងារ គឺជាកត្តាជំរុញដ៏សំខាន់នៃឧក្រិដ្ឋកម្មអនឡាញ។ តាមការស្រាវជ្រាវរបស់ WE Forum បានបង្ហាញថា អ្នកគ្រប់គ្រងអាជីវកម្មអាចការពារស្ថាប័នពីការគំរាមកំហែងតាមអ៊ីនធឺណិតបាន ប៉ុន្តែអ្នកគ្រប់គ្រងផ្នែកប្រព័ន្ធសុវត្ថិភាពព័ត៌មានវិទ្យាក្នុងអាជីវកម្មភាពច្រើនមិនបានដឹងច្បាស់អំពីទំហំនៃការវាយប្រហាររបស់ឧក្រិដ្ឋជនថា ស្ថិតក្នុងកម្រិតណានោះទេ។ យ៉ាងណាក្តី តាមរយៈរបាយការណ៍បានរកឃើញនូវឆន្ទៈរបស់ក្រុមអ្នកជំនាញ ក្នុងការកាត់បន្ថយហានិភ័យនៃការវាយប្រហារតាមអ៊ីនធឺណិតរបស់ក្រុមអ្នកការពារប្រព័ន្ធសុវត្ថិភាព។

ជាង ៧០% នៃអ្នកដឹកនាំធុរកិច្ច និងអ្នកដឹកនាំផ្នែកប្រព័ន្ធសុវត្ថិភាពអ៊ីនធឺណិតទទួលស្គាល់ពីតម្រូវការក្នុងការរឹតបណ្ដឹងគោលនយោបាយជុំវិញការចូលប្រើទិន្នន័យដោយភាគីទីបី។ ក្រៅពីនេះ ក៏គួរមានកិច្ចព្រមព្រៀងពាក់ព័ន្ធនឹងការវាយតម្លៃថា តើប្រទេសណាដែលត្រូវធ្វើអាជីវកម្មជាមួយ។

របាយការណ៍នេះជម្រុញឱ្យអ្នកដឹកនាំ

“គិតឱ្យបានស៊ីជម្រៅបន្ថែមទៀតអំពីសុវត្ថិភាពអ៊ីនធឺណិត និងស្តាប់អ្នកជំនាញផ្នែកសុវត្ថិភាពអ៊ីនធឺណិតដោយយកចិត្តទុកដាក់បន្ថែមទៀត ដើម្បីធានាបាននូវភាពធន់រួមគ្នា សម្រាប់ទាំងអស់គ្នា”៕