ក្រសួងអប់រំរបស់ចិនបានប្រាប់ទៅសាលាបឋមសិក្សា និងមធ្យមិសក្សាទូទាំងប្រទេសថា សាលាទាំងអស់ត្រូវតែបង្កើនការអប់រំផ្នែកវិទ្យាសាស្ត្រ ខណៈប្រទេសចិនកំពុងជំរុញការបង្កើតថ្មីផ្នែកវិទ្យាសាស្ត្រ បច្ចេកវិទ្យា និងការបង្កើតថ្មី។

សេចក្ដីណែនាំនេះធ្វើឡើងប៉ុន្មានថ្ងៃ បន្ទាប់ពីប្រទេសចិន បានចេញផែនការសកម្មភាពជាតិដំបូងរបស់ខ្លួន ក្នុងការកសាង ប្រទេសឱ្យមានការអប់រំរឹងមាំនៅឆ្នាំ២០៣៥ ដែលផែនការសកម្មភាពនេះ នឹងជួយសម្រួលការអភិវឌ្ឍន៍ការអប់រំ កែលម្អប្រសិទ្ធភាពក្នុងការបង្កើតថ្មី និងកសាងប្រទេសឱ្យរឹងមាំ។

ចេញផ្សាយដោយក្រសួងអប់រំចិន និងបានរាយការណ៍ការពីថ្ងៃពុធសប្ដាហ៍មុន ដោយទីភ្នាក់ងារសារព័ត៌មានរដ្ឋ Xinhua សេចក្ដីណែនាំបានថ្លែងថា សាលារៀនត្រូវតែអនុវត្តកម្មវិធីសិក្សាវិទ្យាសាស្ត្រឱ្យកាន់តែទូលំទូលាយ, គ្រូបង្រៀនមុខវិជ្ជាវិទ្យាសាស្ត្រត្រូវតែពង្រឹងសមត្ថភាពបន្ថែម និងបញ្ចូលធនធានអ្នកអប់រំផ្នែកវិទ្យាសាស្ត្រទៅក្នុងប្រព័ន្ធអប់រំឱ្យកាន់តែប្រសើរ។

ក្រសួងអប់រំ បានបញ្ជាក់ថា សាលាបឋមសិក្សានីមួយៗ ត្រូវតែមានគ្រូបង្រៀនមុខវិជ្ជាវិទ្យាសាស្ត្រយ៉ាងហោចណាស់ម្នាក់ ដែលមានសញ្ញាបត្រអនុបណ្ឌិតផ្នែក វិទ្យាសាស្ត្រ បច្ចេកវិទ្យា វិស្វកម្ម ឬគណិតវិទ្យា។

សាលារៀនត្រូវតែងតាំងនាយករងផ្នែកវិទ្យាសាស្ត្រយ៉ាងតិចមួយរូប ដែលទទួលបន្ទុកដឹកនាំការបង្រៀន ផ្នែកវិទ្យាសាស្ត្រ និងអភិវឌ្ឍកម្មវិធីសិក្សាផ្នែកវិទ្យាសាស្ត្រ។

ការអប់រំផ្នែកវិទ្យាសាស្ត្រក៏ត្រូវដាក់បញ្ចូលនៅក្នុងសកម្មភាពបន្ថែមទៀត បន្ទាប់ពីសកម្មភាពសាលា ដើម្បីលើកទឹកចិត្តសិស្សឱ្យចាប់អារម្មណ៍ជំនាញវិទ្យាសាស្ត្រ ខណៈសាលារៀន ត្រូវបានគេរំពឹងថា នឹងផ្ដល់ការលើកទឹកចិត្តដល់យុវជនឱ្យសិក្សាជំនាញវិទ្យាសាស្ត្រនៅថ្នាក់ឧត្តមសិក្សា។

ប្រធានាធិបតីចិន លោក Xi Jinping បាននិយាយកាលពីខែមិថុនា ឆ្នាំ២០២៤ថា ប្រទេសចិននឹងជំរុញឱ្យមានបរិយាកាសប្រកួតប្រជែងជាសកល សម្រាប់ការបង្កើតថ្មីផ្នែកវិទ្យាសាស្ត្រ និងបច្ចេកវិទ្យា ព្រមទាំងពង្រីកបន្ថែម សកម្មភាពការផ្លាស់ប្ដូរ និងកិច្ចសហប្រតិបត្តិការអន្តរជាតិ។

គួរបញ្ជាក់ថា ចិន បាននិងកំពុងជំរុញការគាំទ្រវិស័យឧស្សាហកម្ម ដែលកំពុងអភិវឌ្ឍយ៉ាងឆាប់រហ័ស ដែលក្នុងនោះរួមមាន រថយន្តអគ្គិសនី ការផលិតសម្ភារៈថ្មីៗ ជើងហោះហើរពាណិជ្ជកម្ម បច្ចេកវិទ្យាកង់ទិច និងវិទ្យាសាស្ត្រជីវិត ដើម្បីទប់ទល់ជាមួយនឹងភាពទន់ខ្សោយ ក្នុងវិស័យអចលនទ្រព្យ ដែលក្នុងអូសបន្លាយក្នុងប្រទេសចិន៕