ក្រសួងអប់រំចិនបានអនុម័តជាបន្ទាន់ក្នុងការដំណើរការសាកលវិទ្យាល័យថ្មីចំនួន២៩ ដែលភាគច្រើនផ្ដោតលើបច្ចេកវិទ្យាទំនើបចុងក្រោយបំផុត, វិទ្យាសាស្ត្រ និងវិស្វកម្មបន្ទះឈីប (Semiconductor) និងបញ្ញាសិប្បនិម្មិត (AI)។

ក្រសួងអប់រំចិនបានប្រកាសកាលពីថ្ងៃអង្គារថា ការសម្រេចចិត្តនេះ គឺស្របតាមយុទ្ធសាស្ត្រជាតិ ការវិវឌ្ឍន៍របស់ប្រទេស និងការប្ដេជ្ញាចិត្តរបស់ចិន ចំពោះការអភិវឌ្ឍខ្លួនឱ្យក្លាយជាប្រទេស ដែលមានការអប់រំកម្រិតខ្ពស់។

មុខវិជ្ជាថ្មីផ្ដោតលើផលប្រយោជន៍ ក្នុងយុទ្ធសាស្ត្រជាតិ ដែលនឹងដាក់ដំណើរការ រួមមាន វិទ្យាសាស្ត្រ និងបច្ចេកវិទ្យាសមុទ្រ វិស័យសុខភាព និងសន្តិសុខផ្នែកវេជ្ជសាស្ត្រ។

ជាការឆ្លើយតបទៅនឹងភាពជឿនលឿន នៃបច្ចេកវិទ្យា មានមុខវិជ្ជាថ្មីមួយចំនួន ត្រូវបានបង្កើតឡើង រួមមាន វិស្វកម្ម​ម៉ូលេគុលឆ្លាតវៃ វិស្វកម្មឧបករណ៍ និងបរិក្ខាវេជ្ជសាស្ត្រ និងវិស្វកម្មព័ត៌មាន spatiotemporal ។

ដើម្បីបន្ស៊ីជាមួយនិន្នាការ និងតម្រូវការទីផ្សារការងារ ដែលកំពុងរីកចម្រើន វិស័យថ្មីៗដូជា ការគ្រប់គ្រងនាវាអន្តរជាតិ និងវិទ្យាសាស្ត្រអាកាសចរណ៍ ត្រូវបានបញ្ចូលបន្ថែមក្នុងមុខវិជ្ជាសិក្សា។

ដោយឆ្លុះបញ្ចាំងពីសារៈសំខាន់កាន់តែខ្លាំងឡើងនៃបញ្ញាសិប្បនិម្មិត (AI) នៅក្នុងសង្គមទំនើប ក្រសួងក៏បានណែនាំមុខវិជ្ជាសំខាន់ៗដូចជា ការអប់រំ AI, វិស្វកម្មសោតទស្សន៍ឆ្លាតវៃ និងរឿងល្ខោនឌីជីថល (Digital drama) ផងដែរ។

ដើម្បីធានាបាននូវវិធីសាស្ត្រឆ្លើយតបកាន់តែច្រើនចំពោះយុទ្ធសាស្ត្រជាតិ ក្រសួងបានអនុវត្តយន្តការថ្មី សម្រាប់​កែសម្រួល​កម្មវិធីសិក្សាឱ្យបានកាន់តែឆាប់រហ័ស ក្នុងគោលដៅឆ្លើយតបទៅនឹងវិស័យយុទ្ធសាស្ត្រអាទិភាពថ្មី។

ជាមួយគ្នានេះ ដោយមើលឃើញពីការអភិវឌ្ឍយ៉ាងលឿន នៃសេដ្ឋកិច្ចរយៈកម្ពស់ទាប (Low-altitude Economy) សាកលវិទ្យាល័យចំនួន ៦ រួមទាំងសាកលវិទ្យាល័យ Beihang បានរៀបចំឱ្យមានការបណ្ដុះបណ្ដាលជំនាញ លើផ្នែកបច្ចេកវិទ្យា និងវិស្វកម្មកម្ពស់ទាប (low-altitude technology and engineering) ។

លោក Wang Peng សហការីស្រាវជ្រាវ នៃបណ្ឌិត្យសភាវិទ្យាសាស្ត្រសង្គមប៉េកាំង បាននិយាយនៅក្នុងបទសម្ភាសន៍​មួយជាមួកាសែត Global Times ថា មុខជំនាញថ្មីទាំងនេះ ត្រូវបានគេរំពឹងថា នឹងបណ្ដុះធនធានមនុស្ស ដែលមានទេពកោសល្យឯកទេសសម្រាប់វិស័យសំខាន់ៗ ដើម្បីបង្កើតសមត្ថភាពប្រកួតប្រជែង និងឥទ្ធិពលរបស់​ចិនលើ​ឆាកអន្តរជាតិ ព្រមទាំងគាំទ្រដល់កំណើនឧស្សាហកម្ម និងទំនើបកម្មរបស់ខ្លួន។

ខណៈស្ថិតិថ្មីៗនេះ ពីសារព័ត៌មាន Xinhua បានបង្ហាញថា ប្រទេសចិនកំពុងប្រឈមនឹងកង្វះកម្លាំងពលកម្មជាង ៥លាននាក់ នៅក្នុងវិស័យបញ្ញាសិប្បនិម្មិត (AI) ២,៣លាននាក់ នៅក្នុងជំនាញទិន្នន័យទិន្នន័យធំ និងជាង ១លាននាក់ នៅក្នុងឧស្សាហកម្មរថយន្តថាមពលថ្មី (new-energy vehicles) និងជាង ១លាននាក់ សម្រាប់ប្រតិបត្តិករ យន្តហោះគ្មានមនុស្សបើកសម្រាប់សេដ្ឋកិច្ចរយៈកម្ពស់ទាប (Low-altitude Economy)៕