នៅថ្ងៃចន្ទនេះ (២៥ សីហា) ខេត្តពោធិ៍សាត់បានប្រកាស​ជា​ខេត្ត​ទី២៤ ដែលបញ្ចប់ការ​បន្ទោបង់ពាសវាលពាសកាល (ODF) ដូច្នេះ​នៅ​សល់តែ​ខេត្ត​មួយ​ទៀត​ប៉ុណ្ណោះ ប្រទេស​កម្ពុជានឹង​បញ្ចប់​ការ​បន្ទោ​បង់ពាសវាលពាសកាលទាំងស្រុង។

ការបញ្ចប់ការបន្ទោបង់ពាសវាលពាសកាល (ODF) មិនមែនសំដៅលើអនាម័យប៉ុណ្ណោះទេ ពោល គឺ អំពីសេចក្តីថ្លៃថ្នូរ សុខភាព និង ឱកាស ជាពិសេសសម្រាប់កុមារ និង កុមារី។ ការបញ្ចប់ការបន្ទោរបង់ពាសវាលពាសកាលនឹងចូលរួមកាត់បន្ថយជំងឺ ធ្វើអោយប្រសើរឡើងនូវការចូលរៀន និងផ្តល់សិទ្ធិអំណាចដល់សហគមន៍ឱ្យរីកចម្រើន។

ឯកឧត្តម ពៅ ពិសិដ្ឋ អភិបាលរងខេត្តពោធិ៍សាត់ មានប្រសាសន៍ថា បច្ចុប្បន្ន​ជីវភាព​រស់​នៅ​របស់​ប្រជាពលរដ្ឋ​មានការ​ផ្លាស់ប្តូរ​ទម្លាប់​ក្នុងការ​រស់នៅ​តាមរយៈ​ការ​បរិភោគ និង​ប្រើប្រាស់ទឹកស្អាត ព្រមព្រមទាំងការប្រតិបត្តិអនាម័យជាក់ស្ដែង ដោយនៅក្នុងខេត្តពោធិ៍សាត់ មានខ្នងផ្ទះប្រើប្រាស់បង្គន់អនាម័យ ស្មើនឹង ១០០% ក្នុងនោះខ្នងផ្ទះមានបង្គន់ប្រើប្រាស់ផ្ទាល់ខ្លួន ៩៤% និងខ្នងផ្ទះប្រើប្រាស់បង្គន់រួម ៦%។

ក្នុង​ឱកាស​នោះ លោក យី គឹមថាន នាយកស្ដីទីអង្គការភ្លែនអន្ដរជាតិប្រចាំកម្ពុជា ក្នុងនាមតំណាងអង្គការដៃគូ បានសម្ដែងការអបអរសាទរ និងមោទនភាពចំពោះជ័យលាភី ODF របស់ខេត្តពោធិ៍សាត់ ដែលបង្ហាញពីលទ្ធផលនៃកិច្ចសហប្រតិបត្តិការល្អរវាងក្រសួងអភិវឌ្ឍន៍ជនបទ ជាមួយដៃគូអភិវឌ្ឍន៍ និង អង្គការមិនមែនរដ្ឋាភិបាល ព្រមទាំងប្តេជ្ញាចិត្តក្នុងការចូលរួមជាមួយក្រសួងអភិវឌ្ឍន៍ជនបទក្នុងការជំរុញបញ្ចប់ការបន្ទោបង់ពាសវាលពាសកាលកម្រិតខ្ពស់ទូទាំងប្រទេសនៅឆ្នាំ២០៣០។

ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានសម្តែងនូវការកោតសរសើរ និងវាយតម្លៃខ្ពស់ចំពោះការរីកចម្រើន និងសមិទ្ធផលនានា ដែលខេត្តពោធិ៍សាត់សម្រេចបាននាពេលកន្លងមកលើគ្រប់វិស័យ ជាពិសេសការផ្លាស់ប្តូរកម្រិតជីវភាពរស់នៅរបស់ប្រជាពលរដ្ឋ ការកែលម្អលក្ខខណ្ឌនៃការរស់នៅ តាមរយៈការផ្គត់ផ្គង់សេវាទឹកស្អាត និងការប្រើប្រាស់បង្គន់អនាម័យបានត្រឹមត្រូវ។ ឯកឧត្តម​ក៏​បាន​ជំរាបជូនអំពីយុទ្ធសាស្ដ្រគន្លឹះទាំង ៥ របស់ក្រសួង ដែលមានចក្ខុវិស័យ “កសាងតំបន់ជនបទកម្ពុជាឱ្យមានវិបុលភាព ប្រកបដោយបរិយាបន្ន និងចីរភាព ទាំងផ្នែកសេដ្ឋកិច្ច សង្គមកិច្ច និងវប្បធម៌”។

ពាក់ព័ន្ធនឹងវិស័យទឹកស្អាត និងអនាម័យជនបទ បើតាម​ឯកឧត្តមរដ្ឋមន្រ្តី ក្រសួងកំពុងអនុវត្តផែនការសកម្មភាពជាតិសម្រាប់ការផ្គត់ផ្គង់ទឹកស្អាតជនបទ និងអនាម័យ ដោយ​បច្ចុប្បន្នកំពុងគ្របដណ្តប់ប្រហែល ៩១.៩៨% ហើយ​រំពឹងថា នៅឆ្នាំ២០៣០ ប្រជាពលរដ្ឋទាំងអស់នឹងទទួលបានទឹកស្អាត អនាម័យពេញលេញ និងរស់នៅប្រកបដោយនិរន្តរភាព៕