ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកវិទ្យាសាស្ត្រ AI របស់ក្រុមហ៊ុន Google ដ៏កំពូលម្នាក់ និងជាជ័យលាភីណូបែលឆ្នាំ២០២៤ បានលើកឡើងថា ជំនាញសំខាន់បំផុត ដែលមនុស្សជំនាន់ក្រោយត្រូវមាន គឺ ការរៀនពីរបៀបរៀន ដើម្បីតាមឱ្យទាន់ការផ្លាស់ប្ដូរយ៉ាងឆាប់រហ័ស នៃបច្ចេកវិទ្យាបញ្ញាសិប្បនិម្មិត (AI) ដែលកំពុងផ្លាស់ប្ដូរការអប់រំ និងរបៀបធ្វើការ រួមទាំងការប្រកបមុខរបរ។
ថ្លែងនៅក្នុងរោងមហោស្រពរ៉ូមាំងនៅជើងភ្នំ Acropolis ក្នុងទីក្រុង Athens កាលពីពេលថ្មីៗនេះ លោក Demis Hassabis នាយកប្រតិបត្តិ នៃ DeepMind របស់ Google បាននិយាយថា ការផ្លាស់ប្ដូរដ៏ឆាប់រហ័សនៃបច្ចេកវិទ្យាទាមទារ ឱ្យមនុស្សមានវិធីសាស្ត្រថ្មីក្នុងការរៀនសូត្រ និងការអភិវឌ្ឍជំនាញ។
លោក Hassabis បានប្រាប់ទស្សនិកជនថា វាពិបាកណាស់ក្នុងការព្យាករណ៍អនាគត ដូចជា ចាប់ពីពេលនេះ រហូតដល់ ១០ឆ្នាំក្រោយ ថា គ្រប់យ៉ាងនឹងនៅតែធម្មតា។ វាកាន់តែពិបាកក្នុងថ្ងៃនេះ ដោយសារ AI កំពុងផ្លាស់ប្ដូរអ្វីគ្រប់យ៉ាងក្នុងល្បឿនដ៏លឿន សូម្បីតែពីមួយសប្ដាហ៍ទៅមួយសប្ដាហ៍ក៏ពិបាកព្យាករណ៍ដែរ។ រឿងតែមួយគត់ ដែលអាចនិយាយបានយ៉ាងប្រាកដនោះគឺថា ការផ្លាស់ប្ដូរដ៏ធំនឹងមកដល់។
អ្នកវិទ្យាសាស្ត្រខាងសរសៃប្រសាទ និងជាអតីត អ្នកលេងអុក បាននិយាយថា បញ្ញាសិប្បនិម្មិតទូទៅ ដែលជាចក្ខុវិស័យអនាគតនៃម៉ាស៊ីនឆ្លាតវៃយ៉ាងខ្លាំងដូចមនុស្ស ឬយ៉ាងហោចណាស់អាចធ្វើអ្វីៗបានច្រើន ដូចមនុស្សអាចធ្វើបានដែរ ហើយទិដ្ឋភាពនេះ អាចនឹងមកដល់ក្នុងរយៈពេលមួយទសវត្សរ៍ខាងមុខ។
លោកបាននិយាយថា សកម្មភាពនេះ នឹងនាំមកនូវភាពជឿនលឿនយ៉ាងខ្លាំង ហើយធនធាននាពេលអនាគតនឹងកាន់តែសម្បូរបែប ព្រមជាមួយនឹងតម្លៃសមរម្យ។
លោក Hassabis បានសង្កត់ធ្ងន់លើតម្រូវការសម្រាប់ «Meta-Skill» ដែលជាសមត្ថភាពក្នុងការយល់អំពីរបៀបរៀន និងការបង្កើនប្រសិទ្ធភាព ក្នុងការរៀនជំនាញថ្មី រួមជាមួយនឹងមុខវិជ្ជាបែបប្រពៃណី ដូចជា គណិតវិទ្យា វិទ្យាសាស្ត្រ និងមនុស្សសាស្ត្រ។ លោកបន្តថា រឿងមួយដែលយើងនឹងដឹងច្បាស់ គឺអ្នកនឹងត្រូវបន្តរៀន ពេញមួយជីវិតការងារ៕
