យោងតាមអង្គការសុខភាពពិភពលោក (WHO) បានឱ្យដឹងថា ថ្នាំជក់បានសម្លាប់មនុស្សជាង ៨លាននាក់ក្នុងមួយឆ្នាំ។ ក្នុង​ចំណោម​អ្នក​ស្លាប់​ មាន ១,២​លាន​នាក់ ​ជា​មនុស្ស​ដែល​បាន​ស្រូបផ្សែង​ពីអ្នកជក់។ WHO លើកឡើងអំពីឥទ្ធិពលនៃថ្នាំជក់ថា «ជាការគំរាមកំហែងសុខភាពសាធារណៈដ៏ធំបំផុតមួយ ដែលពិភពលោកមិនធ្លាប់ជួបប្រទះ»។ លើសពីនេះ ការជក់បារីត្រូវបានគេមើលឃើញថា ជាកត្តាហានិភ័យដែលអាចបណ្តាលឱ្យមានជំងឺមហារីកសួត ជំងឺបេះដូង និងជំងឺដាច់សរសៃឈាមខួរក្បាល។

ខណៈពេលដែលប្រទេសជាច្រើនបានហាមឃាត់ការប្រើប្រាស់ថ្នាំជក់ក្នុងកន្លែងបិទជិតនៅទីសាធារណៈរួចហើយ ដំណាក់កាលបន្ទាប់គឺការហាមប្រាមការជក់បារីនៅខាងក្រៅ នៃទីសាធារណៈ។ យោងតាម WE Forum មានប្រទេសចំនួន ៥ កំពុងមានសកម្មភាពខ្លាំងក្នុងការលុបបំបាត់ការជក់បារី។

១. ព័រទុយហ្គាល់ ៖ ដាក់ចេញយុទ្ធនាការ «គ្មានផ្សែងបារីនៅឆ្នាំ ២០៤០ – Smoke free generation by 2040»

កាលពីខែឧសភាកន្លងទៅ រដ្ឋាភិបាលព័រទុយហ្គាល់បានប្រកាសសេចក្តីព្រាងច្បាប់ ដើម្បីរឹតបន្តឹងការលក់ថ្នាំជក់ និងការជក់បារីនៅទីសាធារណៈ ចាប់ពីឆ្នាំ ២០២៣ តទៅ ដែលទីតាំងទាំងនោះមានដូចជា ផ្នែកខាងក្រៅភោជនីយដ្ឋាន ហាងកាហ្វេ សាកលវិទ្យាល័យ សាលារៀន និងកន្លែងហាត់កីឡាជាដើម។ លើសពីនេះ ចាប់ពីឆ្នាំ២០២៥ ច្បាប់នេះ ក៏នឹងកំណត់ឱ្យលក់ផលិតផលថ្នាំជក់ទៅឱ្យតែអ្នកជក់បារីដែលមានអាជ្ញាប័ណ្ណប៉ុណ្ណោះ។ ជាមួយគ្នានេះ ដើម្បីសម្រេចគោលដៅ រដ្ឋាភិបាល នឹងបង្កើនការផ្សព្វផ្សាយអំពីផលអវិជ្ជមាននៃថ្នាំជក់ទៅដល់យុវជន។

២. កាណាដា ៖ បង្កើតសារព្រមានអំពីហានិភ័យនៃការជក់បារី នៅលើក្រដាសរុំថ្នាំជក់

ប្រទេសកាណាដាក៏មានបំណងសម្រេចបាននូវគោលដៅស្រដៀងគ្នានឹងព័រទុយហ្គាល់ដែរ ដោយកាត់បន្ថយការប្រើប្រាស់ថ្នាំជក់ឱ្យតិចជាង ៥ភាគរយ នៅឆ្នាំ ២០៣៥។ ដើម្បីសម្រេចបាននូវចំណុចនេះ រដ្ឋាភិបាលកាណាដានឹងបង្កើនការផ្សព្វផ្សាយអំពីហានិភ័យសុខភាពនៃការជក់បារី។ បើទោះជាមានស្លាកសញ្ញាព្រមាននៅលើកញ្ចប់បារីចាប់តាំងពីចុងទសវត្សរ៍ឆ្នាំ ១៩៨០ ក៏ដោយ ក៏កាណាដានៅតែបន្តបង្កើនការផ្សព្វផ្សាយ ដោយបោះពុម្ពសារព្រមាននៅលើក្រដាសរុំថ្នាំជក់បន្ថែមទៀត។

៣-៤. នូវែលហ្សេឡង់ និងអូស្ត្រាលី ៖ ផ្តោតសំខាន់លើការកាត់បន្ថយការជក់បារីក្នុងចំណោមយុវជន

ទន្ទឹមនឹងការជំរុញឱ្យមានប្រទេសគ្មានផ្សែងនៅឆ្នាំ២០២៥ ប្រទេសនូវែលសេឡង់ក៏បានចេញច្បាប់ហាមឃាត់ការលក់ថ្នាំជក់ដល់មនុស្សដែលកើតក្នុងឆ្នាំ ២០០៩ផងដែរ ដើម្បីទប់ស្កាត់ការញៀនថ្នាំជក់របស់យុវជន ។ ថ្មីៗនេះ នូវែលហ្សេឡង់ បានប្រកាសវិធាន ការកាត់បន្ថយការលក់ផលិតផលបារីអេឡិចត្រូនិចនៅក្បែរសាលារៀន ។ រដ្ឋាភិបាលក៏ប្រកាសឱ្យកាត់បន្ថយបរិមាណនីកូទីននៅក្នុងផលិតផលថ្នាំជក់ និងចំនួនអ្នកលក់រាយដែលលក់ឱ្យអ្នកប្រើប្រាស់ផងដែរ។

ទន្ទឹមនឹងនេះ រដ្ឋ Queensland ដែលជារដ្ឋដ៏ធំបំផុតរបស់ប្រទេសអូស្ត្រាលី ក៏បានចាប់ផ្តើមយុទ្ធនាការមួយ ដែលមានឈ្មោះថា «ទីសាធារណៈគ្មានផ្សែង-Smoke-free public places» ដែលទីកន្លែងទាំងនោះមានដូចជា ចំណតរថយន្តរបស់សាលារៀន និងទីកន្លែងដែលមានកុមារអាយុក្រោម ១៨ឆ្នាំទៅ។

៥. ម៉ិកស៊ិក ៖ បង្កើតច្បាប់ប្រឆាំងថ្នាំជក់យ៉ាងតឹងរឹង

ការជក់បារីមិនត្រឹមតែជាប្រភពនៃក្ដីកង្វល់សម្រាប់រដ្ឋាភិបាលរបស់ប្រទេសអភិវឌ្ឍន៍ប៉ុណ្ណោះទេ។ យោងតាមរបាយការណ៍អង្គការសុខភាពពិភពលោក (WHO) បានបង្ហាញថា អ្នកប្រើប្រាស់ថ្នាំជក់ជាង ៨០ភាគរយ រស់នៅក្នុងប្រទេស ដែលមានចំណូលទាប និងមធ្យម។

កាលពីពេលថ្មីៗនេះ ប្រទេសម៉ិកស៊ិក ដែលប្រទេសចំណូលមធ្យមកម្រិតខ្ពស់មួយនៅតំបន់អាមេរិកកណ្ដាល បានដាក់ចេញនូវច្បាប់ប្រឆាំងថ្នាំជក់ដ៏តឹងរឹងបំផុតមួយក្នុងពិភពលោក។ រដ្ឋាភិបាលបានពង្រឹងការហាមប្រាម ដែលមានស្រាប់ លើការជក់បារីនៅក្នុងកន្លែងបដិសណ្ឋារកិច្ច កន្លែងធ្វើការ និងសាធារណៈទាំងអស់ រួមទាំងសួនកម្សាន្ត និងឆ្នេរជាដើមនោះ។ ដោយក្នុងករណីដែលចង់ជក់បារី គឺអាចជក់នៅក្នុងផ្ទះ ជាលក្ខណៈឯកជនម្នាក់ឯងបាន។ ខណៈបច្ចុប្បន្ន ការផ្សព្វផ្សាយថ្នាំជក់ ត្រូវបានហាមឃាត់ទាំងស្រុង ដូច្នេះបារីប្រហែលជាមិនត្រូវបានដាក់តាំងបង្ហាញនៅក្នុងហាងទៀតទេ៕