នាយកដ្ឋានកិច្ចការផ្ទៃប្រទេសអូស្ត្រាលីបានប្រកាសថា និស្សិតអន្តរជាតិនៅសាកលវិទ្យាល័យចំនួន ១២ នឹងទទួលបានទិដ្ឋាការរបស់ពួកគេលឿនជាងមុន ក្នុងគោលបំណងដើម្បីកាត់បន្ថយការកកស្ទះដំណើរការធ្វើទិដ្ឋាការ ទៅសិក្សានៅសាកលវិទ្យាល័យល្បីៗរបស់អូស្ត្រាលី។

ក្នុងចំណោមស្ថាប័នអាទិភាពទាំង ១២ សាកលវិទ្យាល័យបច្ចេកវិទ្យា Swinburne មានសិទ្ធិទទួលនិស្សិតអន្តរជាតិច្រើនជាងគេ ជាមួយនឹងកន្លែងសម្រាប់និស្សិតសិក្សាចំនួន ៤,៥២៣កន្លែង បន្ទាប់មកគឺសាកលវិទ្យាល័យ La Trobe មានចំនួន ៤១០០កន្លែង, នេះបើយោងតាមគោលការណ៍ របស់នាយកដ្ឋានស្ដីពីចំនួននិស្សិតអន្តរជាតិអតិបរមា ដែលអាចចុះឈ្មោះចូលរៀននៅឆ្នាំ២០២៥ ដែលបានចេញផ្សាយកាលបីសប្ដាហ៍មុន។

សាកលវិទ្យាល័យ Edith Cowan, សាកលវិទ្យាល័យ Griffith និងសាកលវិទ្យាល័យ Wollongong មានសិទ្ធិទទួលនិស្សិតអន្តរជាតិចំនួន ៣៦០០ កន្លែង ក្នុងមួយសាកលវិទ្យាល័យ។ សាកលវិទ្យាល័យ ដែលនៅសល់មានសិទ្ធិទទួលនិស្សិតអន្តរជាតិ តិចជាង​ ៣០០០កន្លែង។

និស្សិត ដែលបានចូលរៀននៅសាកលវិទ្យាល័យទាំងនេះ នឹងទទួលបានការពិចារណាលើការជំរុញដំណើរការរៀបចំពាក្យស្នើសុំទិដ្ឋាការរបស់ពួកគេឱ្យបានកាន់តែលឿន។ ការផ្លាស់ប្ដូរនេះ មានគោលបំណងការពារសាកលវិទ្យាល័យធំៗ ពីការទទួលបានពាក្យស្នើសុំបន្តការសិក្សាច្រើនលើសលប់ ខណៈដែលស្ថាប័នដែលមិនសូវលេចធ្លោ ត្រូវបានទុកចោល។

យោងតាមនាយកដ្ឋានកិច្ចការផ្ទៃក្នុង ការជំរុញល្បឿននៃការធ្វើទិដ្ឋាការអាទិភាពនេះ មិនប៉ះពាល់ដល់ដំណើរការងារ និងលទ្ធផលទិដ្ឋាការទូទៅនោះទេ។ ពាក្យសុំទិដ្ឋាការសិស្សទាំងអស់ត្រូវបានវាយតម្លៃដោយមន្ត្រី ដែលមានការអនុញ្ញាត ដោយមិនគិតពីកម្រិតអាទិភាពរបស់អ្នកផ្ដល់សេវា។

គិតត្រឹមខែមិថុនាឆ្នាំមុន ពេលវេលាដំណើរការជាមធ្យមគឺ៩៤ថ្ងៃ សម្រាប់ទិដ្ឋាការកម្មវិធីថ្នាក់បរិញ្ញាបត្រ និង ១៧១ថ្ងៃ សម្រាប់កម្មវិធីបណ្ដុះបណ្ដាលជំនាញវិជ្ជាជីវៈ។

ក្នុងរយៈពេល ២ឆ្នាំ កន្លងមកនេះ អូស្ត្រាលី បានរឹតបន្តឹងគោលនយោបាយទិដ្ឋាការ ដើម្បីទប់ស្កាត់ការចំណាកស្រុកខុសច្បាប់ ដែលប៉ះពាល់ដល់ចំនួននិស្សិតអន្តរជាតិ មកបន្តការសិក្សាក្នុងប្រទេសនេះ។

សិទ្ធិការងារក្រោយការសិក្សា ត្រូវបានកាត់បន្ថយពី ៤ ទៅ ៦ឆ្នាំ មកត្រឹម ២ ទៅ ៤ឆ្នាំ ហើយតម្រូវការសមត្ថភាពភាសាអង់គ្លេសបានកើនឡើងពី IELTS 6.0 ទៅ 6.5 (កើនឡើង 0.5)។ ភស្ដុតាង នៃរបាយការណ៍ធនាគារ​ បានកើនឡើងដល់ ២៩៧១០ ដុល្លារអូស្ត្រាលី (១៩៥៨៤ ដុល្លារអាមេរិក) ប្រហែល ២០ភាគរយ ខ្ពស់ជាងកាលពីមុន ខណៈដែលថ្លៃស្នើសុំទិដ្ឋាការសិស្សបានកើនឡើង ដល់ ២០០០ដុល្លារអូស្ត្រាលី ក្នុងចំណោមតម្លៃខ្ពស់បំផុតនៅលើពិភពលោក៕